Twilight Saga – ඉවරද..?! නැද්ද..?!

Stephenie Meyer ගේ ‘Twilight Saga‘ පොත් පෙළ ඇසුරින් හැදුණු එනමින්ම යුතු සිනමා පෙළ, ඉවර වුණා කියල නේද ඔබ හිතුවෙ? කනිං කොණිං ඇහෙන කතාවලින් කියැවෙන්නේ ඊට හාත්පසින්ම වෙනස් දෙයක් බවයි අපටනම් දැනගන්ඩ තියෙන්නේ. ඒ කියන්නේ තව ඉවර නෑ කියන එකයි.

ඇත්තෙන්ම කියනවානම් ඒ පොත් පෙළ ඇසුරින් තැනුණු ‘Twilight Saga (2008-2012)’ සිනමා පෙළ ඉවරයි තමයි. නමුත් Twilight කතා තේමාව තව ඉවර නෑ. ඒ කියන්නේ මෙහි චරිත තව විහිදුවන්ඩ, එහෙම විහිදුවමින් අලුත් සිනමා නිර්මාණයන්ට පිවිසෙන්ඩ මෙහි නිෂ්පාදනායතනය උනන්දුවෙන් ඉන්න බවක් තමයි කියන්නේ. “හොඳට දුවල වාර්තා තියන ගමන්, රන් පදක්කම් දිනවලා දෙන අශ්වයෙක් ඉස්තාලෙට දාල වහන්නෙ මොන තරග-තුරඟ හිමිකරුවාද?” කියල එයාල අහනවලු.

Twilight අන්තිම එකේ සිදුවුණ ඇතැම් සිදුවීම් වගයක් මේ වෙනුවෙන්ම සකස් කරපුවා බවකුත් කියැවෙනවා. කොහොම නමුත් යම් විදිහකින් මෙහි ඉදිරි දිගුවක් එළිදැක්වුණොත් එහි ප්‍රධාන අවධානය Jacob’ලගේ වෘක රොත්තට(Wolf Pack) යොමු වේවි කියල දැනට ආරංචි තියෙනවලු. එහෙමනම් මේ කතා පෙළේ රසිකයන්ට ඔන්න මනදොළ පිනන ආරංචියක් අපි දුන්නා.

හැබැයි මේ වග නිල නොවන විදිහකින් හෙළි වී ඇති නිසා; තවමත් ඒ ගැන ඉස්තීරෙටම කියන්ඩ බැරි ගතියක් තියෙන්නේ. මේ වග ඉන්තීරුවෙන් දැනගත්තු හැටියෙම අපි ඒ වගත් ඔබට දන්වන්නම්. ඔබ ඉතිං ඉන්නවනේ අපිත් එක්කම…

උදා (217 Posts)

උදා