***Spoilers*** Gotham – 01×05 – Viper

හැමදාම වගේ ගෝතම් කියන්නේ කුතුහලය පිරිලා තියන තැනක්. අලුතෙන් දකින්න ලැබෙන සිද්දි එක්ක ඒ කුතුහලය එන්න එන්නම වැඩි වෙන එකයි වෙන්නේ. හරි එහෙනම් කතාවේ වැදගත් කොටස් වලට යමු. ඊට කලින් පොඩි දෙයක් කියලා ඉන්න ඕනේ. ටීවී සිරිස් එකක් ගැන කතා කරද්දී සාමාන්‍යයෙන් අපි recap සහ review (සාරංශය සහ සමාලෝචනය) කියන ක්‍රම දෙක යොදා ගන්නවා. ඔයාලට මතක ඇති මුල්ම කොටස් කතාංග දෙක කතා කරද්දී සාරාංශය සහ සමාලෝචනය දෙකම භාවිතා කෙරුවත් ලිපිය ගොඩක් දිග වෙන හින්දා තුන්වෙනි කතාවේ ඉදලා යොදා ගත්තේ සමාලෝචන කොටස විතරයි. මීට පස්සේ දිගටම යොදා ගන්නේ සමාලෝචනය විතරයි.

• මම මේක ගොඩක් සැරයක් කියලා තියනවා අපිට කතාවේදී හම්බෙන බ්රුස් වේන් කියන්නේ වයසට වඩා පරිණත මිනිහෙක්. කොමික් වලට අනුව නම් එයාගේ දෙමව්පියෝ ඝාතනය කරන්නේ වයස අවුරුදු 8 දී. ඒත් වයස අවුරුදු 8 පොඩි එකෙකුට කරන්න බැරි තරම් දෙයක් මේ වෙද්දී බ්රුස් වේන් කරලා තියනවා. වේන් එන්ටර්ප්‍රයිසස් එකේ ඇතුලටම බැහලා විස්තර හොයන්න වගේම මේ පොඩි එකා සම්මුඛ සාකච්ඡා පවත්වලා කාරනා හොයා ගන්නත් දක්ෂයි. මීට වඩා ළමා ගතියක් බ්රුස් ට දුන්නා නම් කතාව මිට වඩා තාත්වික වෙන්න තිබ්බා. කතාව අවසානයේ ඇල්ෆ්‍රඩ්ට පවා තේරුම් ගන්න සිද්ධ වෙනවා බ්රුස් කියන්නේ පොඩි කෙනෙක් විදිහට සලකන්න බැරි කෙනෙක් කියලා. ඒක හින්දා ඇල්ෆ්‍රඩ් පවා බ්රුස් ට උදව් කරන්න පෙළඹෙනවා

• අපි දන්නවා කතා මාලවේ හැම කොටසකම පියවරක් ඉස්සරහට තියන කෙනෙක් ඉන්නවා. එයා තමයි ඔස්වල්ඩ්. වැදගත්ම දේ තමයි පෙන්ගුවින් කියන නමට අකමැති වෙලා හිටපු ඔස්වල්ඩ් මේ කතාවේ ඉදලා ඒක දිගටම භාවිතා කරන මට්ටමට එන එක. තමන්ගේ ඉලක්කය සපුරා ගන්න ඔස්වල්ඩ් ඕනෑම කැප කිරීමක් කරන්න ලෑස්තියි. ජිවිතය අවධානමට ලක් කරලා හරි ඔස්වල්ඩ් අන්තිමේ දී සැල් මැරෝනිගේ අවධානය ලබා ගන්නවා. අවස්තා දෙකක දීම පෙන්ගුවින්ට මරණ තර්ජනය ආවත් දවස අවසානයේ දිනලා තියෙන්නේ පෙන්ගුවින්.

• සැල් මැරෝනි ගැන මේ වෙද්දී අපිට පොඩි අවබෝධයක් තියනවා. ඒ වගේම ෆැල්කෝනි ගේ තියන “සන්සුන් දායක බිහිසුණු කම” වගේම භයානක “සිනහා මුසු භයානක කමක්” සැල් මැරෝනිට තියනවා. ෆැල්කෝනි ව පරද්දලා නගරයේ බලය අතට ගන්න තියන ආශාව කතාව පුරාම පේන්න තියනවා. ගෝර්ඩන් ව පැහැරගෙන එන සිද්දිය, පෙන්ගුවින් ගේ කතාවේ ඇත්ත නැත්ත හොයන එකෙන් මැරෝනි තමන්ගේ ඉලක්කයට ළං වෙන්න බලනවා.

• කතාවේ අරමුණක් ඇතිව වැඩ කරන අනිත් එක්කෙනා තමයි ෆිෂ් මුනි කියන්නේ. මේ වෙද්දී ෆිෂ් මුනි ගේ උපක්‍රමය අපිට පැහැදිලියි. ඒ තමයි ෆැල්කෝනි රවටා ගන්න ලීසා ආයුධයක් විදිහට යොදා ගන්න. ඉතාම ඉවසීමෙන් යුක්තව කරන ලිසාව පුහුණු කිරීම ඉතාම සාර්ථක එකක් වෙන්නේ අපි හිතන්නෙවත් නැති තරම් පහසුවෙන් ෆැල්කෝනි ලීසා ගේ වසඟයට පත් වීමෙන්. ඉස්සරට අපිට බලාගන්න පුළුවන් වෙයි ෆිෂ් කොහොමද මේ ආයුධය ප්‍රයෝජනයට ගන්නේ. ෆිෂ් මුනි ගේ මායම් ගැන අපිට කියලා දෙන තවත් තැනක් අපිට කතාව ඇතුලේ හම්බෙනවා. ඒ තමයි ෆැල්කෝනි ඉදිරිපිට නිකොලයි එක්ක රණ්ඩු වෙලා පස්සේ නිකොලායි ගේ තුරුලට වෙලා පෙම් සුව විදින සිද්දියෙන්. මේක දැක්ක ගමන් මට නම් හිතුනේ අපි නොදන්නවා උණාට ගෑනූ මායම් කියන්නේ සුපිරිම දුෂ්ටයන් ගේ අඳුරු බල වලට එහා ගිය එකක් කියලා

• අන්තිමේ දී මම කතාවේ ප්‍රධාන මාතෘකාව උණු වයිපර් කියන මත් ද්‍රව්‍ය ගැන කතා කරන්නම්. අපි දන්නවා ගෝතම් වල අඳුරු විදී අතරේ ඕනෑම ගණයේ දරුණු අපරාධයක් වෙන්න පුළුවන්. අපිට මේ පාර හම්බෙන්නේ තමන්ට වුනු ආසාධාරණයක් හින්දා ගෝතම් සමාජයේ බලවතුන් ගෙන් පලිගන්න හදන කෙනෙක් ගැන. ගොඩක් වෙලාවට වෙනවා වගේ එයාගේ අරමුණ සාධාරණ යි. ඒත් ඒ වෙනුවෙන් අනුගමනය කරන මාර්ගය අනුමත කරන්න බැරි එකක්. ඒ කියන්නේ නගරය යහපත් තැනකට ගේන්න නම් වඩා හොඳ සැකැස්මක් ගෝතම් වලට ඕන කියන එක. මේ හැම එකකින්ම අපිට පෙන්නුම් කරන්නේ අඳුරු නයිට් වරයා ගෝතම් වලට අවශ්‍යම යි කියන එක.

වෙනදා වගේම කතාවේ පැහැදිලිව පේන්න තියන අපරාධ කාරයා පසුපස පන්නන සිද්දිය අමතක කරලා අපිට අද කතාවේදී හම්බුනු සමහරක් දේවල් වල කොමික් පසුබිම හොයලා බලමු.

• වයිපර් සහ වෙනොම් – අපිට වයිපර් කියන නම DC කොමික් වල අහන්න ලැබෙන නමක්. ඒක හැබයි යෙදෙන්නේ චරිතයක් සම්බන්දයෙන්. ඒ නමින් තියන මත් ද්‍රව්‍යයක් ගැන නම් අපිට සඳහනක් නෑ. කතාවේ කියන විදිහට ඒක පරීක්ෂණයේ පලවෙනි පියවර. එකේ දෙවෙනි පියවර තමයි වෙනොම් කියන්නේ. මේක නම් අපිට බැට් මෑන් චරිතයත් එක්ක ගොඩක් සම්බන්දයි. Batman: Legends of the Dark Knight කියන කොමික් මාලාවේ දී මේක එලියට එනවා. (#1 පින්තුරය). එකේ තිබ්බ ජනප්‍රිය තාවය හින්දාම පස්සේ බැට්මෑන් – වෙනොම් කියලා මේ මත් ද්‍රව්‍යට ඇබ්බැහි උණු බැට් මෑන් ගැන කොමික් මාලාවකුත් එනවා (#2 පින්තුරය)

• නිකොලායි – DC කොමික් වල නිකොලායි ලා ගොඩක් හිටියට කතාවේ අපිට හම්බෙන විදිහේ කෙනෙක් නම් නෑ. එයත් ෆිෂ් මුනි වගේම මේ කතා මාලාවට හදපු කෙනෙක් වෙන්න ඉඩ තියනවා. හැබයි එයාගේ රුසියානු කල්ලියට සමාන ඔඩෙස්සා කල්ලිය කියලා කණ්ඩායමක් ගැන අපිට කොමික් වල දී හම්බෙනවා. මෙයාලා ගෝතම් නගරය තමයි මධ්‍යස්ථානය කරගෙන ඉන්නේ . ඒ හින්දා මේ කණ්ඩායම ගැන කතා කෙරුවා වෙන්න ඉඩ තියනවා.

ඊලඟට කතාවේ අපිට හම්බෙන චරිත කොමික් ලෝකේ චරිත වල ගති ලක්ෂණ ගන්න විදිහ ගැන කතා කරමු.
• බ්රුස් වේන් – අද කතාවේදී බ්රුස් වේන් හැසිරුනේ අති දක්ෂ රහස් පරීක්ෂකයෙක් විදිහට. ඇල්ෆ්‍රඩ් ගේ වචන වලින් ම කියනවා නම් “Fantastic detective work”. අපි දන්නවා අනාගත බැට් මෑන් කියන්නේ අති දක්ෂ රහස් පරික්ෂයෙක්. ඉතින් පුංචි කාලේ දීම අපිට එයාගේ ඒ හැකියාවන් දකින්න හම්බෙනවා.

• සෙලීනා කයිල් – ගිය සතියේ කොටසේ දකින්න හිටපු නැති සෙලිනා මේ සතියේ පොඩි කොටසකට ඉන්නවා. හැබයි ඒ ඉන්න ටික වෙලාවේදී එයා අනාගත චරිතයේ ලක්ෂණයක් අපිට පෙන්නලා දීලා යන්නේ. ඒ අපි දැනටමත් දන්න හොරකම් කිරීම, හොරෙන් ලිස්සලා යනවා වගේ ගති ගුණ වලට අමතරව. ඒක තමයි කැට් වෝල්ක් එක. බළලෙක් ඇවිදින විදිහට හොදටම ඇවිදින්න පුළුවන් ගැහැණු කෙනා වෙන්න ඕනේ ඒ නම ගත්තු චරිතය නේ. සෙලිනා මුදල් පසුම්බිය හොරකම් කරන්න කලින් ඇවිදගෙන යන්නේ කැට් වෝල්ක් එකෙන්. (#3 පින්තුරය)

• ඔස්වල්ඩ් – මේ සතියේ ඔස්වල්ඩ් නිල වශයෙන්ම පෙන්ගුවින් කියන නම භාවිතා කරන මට්ටමට ආවා. ඒක ඔස්වල්ඩ් කියන චරිතය අතුරුදහන් වෙලා හුරුපුරුදු පෙන්ගුවින් චරිතය එලි දකින්න ආසන්න අවස්ථාවක් කියලා කියන්න පුළුවන්.

අවසාන වශයෙන් කතාවේ අපිට හම්බෙන පුංචි පුංචි කාරණා.
• මැතිස් – ඔය කට්ටිය ගෝතම් වල දෙවෙනි කතාව ගැන මම ලියපු ලිපිය බැලුවා නම් එකේ ඩෝල් මේකර් කියන චරිතයක් ගැන සඳහනක් උණා. එයාගේ ඇත්ත නම් බාර්ටන් මැතිස්. එයාට දුවෙක් ඉන්නවා මැතිල්ඩා මැතිස් කියලා. වේන් එන්ටර්ප්‍රයිසස් එකේදී අපිට හම්බුනේ (#4 පින්තුරය) එයා කියලා හරියටම කියන්න බැරි උණාට මැතිස් පවුල ගැන කරන සඳහනක් වෙන්න පුළුවන්.

• සියුස් – සියුස් කියන්නේ ග්‍රීකවරුන්ගේ ප්‍රධාන දෙවියනේ. ගෝතම් වල කෙනෙක් ඉන්නවා එයා හිතන්නේ එයා තමයි සියුස් දෙවියා කියලා. එයාගේ නම තමයි මැක්සි සියුස්. අපිට කතාවේ මුලින්ම හම්බෙන ගිටාර් වාදකයා කඩේ මනුස්සයාට කියන්නේ “Do not vex me, mortal” කියලා. වෙක්ස් කියන්නේ ලතින් වලින් කරදර කරන්න එපා කියන එක. අනික එයා දෙවිවරු සාමන්‍ය මිනිස්සු හදුන්වන mortal (අමරණිය නොවන) කියන වචනය තමයි යොදා ගන්නේ. ඊට අමතරව කඩේ මනුස්සයා කතා කරන්නේ “Suit yourself, Zeus” කියලා. මේක පැහැදිලිවම ඒ සියුස් චරිතයට කරන සම්බන්දයක්

• 75 වසරක අබිමානය – ඔයලා දන්නවා ඇති බැට් මෑන් චරිතයට 2014 වෙද්දී අවුරුදු 75 ක් වෙනවා. ඒක පටන් ගත්තේ 1939 දී. අපිට මේ 39 අංකය කතාවේ දකින්න හම්බෙනවා. (#5 පින්තුරය)
• බේන් – බේන් කියන්නේ බැට් මෑන් ගේ ඉන්න ප්‍රධානම හතුරෙක් (#6 පින්තුරය). අනාගතේ දවසක මෙයා ගෝතම් කතා මාලාවට එකතු වෙන්න පුළුවන් කියන ඉඟි අපිට මේ කොටස පුරාවටම හම්බෙනවා. පලවෙනි එක තමයි වයිපර් කියන මත් ද්‍රව්‍ය වායුවක් විදිහට භාවිතා කරන එක. කොමික් කතා වලදී බේන් එයාගේ ශක්තිය ලබා ගන්නේ ඒ විදිහට වායුවක් ආඝ්‍රහනය කරලා. අනික තමයි බැට් මෑන් වගේම මෙයාත් වෙනොම් කියන මත් ද්‍රවයට තදින්ම ඇබ්බැහි වෙලා හිටියා. ඒ වගේම තමයි මෙයා මොන්ත ක්‍රිස්තෝ කතාවේ එන මොන්ත ක්‍රිස්තෝ චරිතයට ගොඩක් සමානයි. ඒ අවුරුදු ගානක් හිරකාරයෙක් විදිහට ඉදලා හැම දෙයක්ම නැති උණු කෙනෙක්. ඒකට පලිගැනීම තමයි මෙයාගේ අරමුණ. බ්රුස් වේන් ප්‍රවෘත්ති බලන්න කලින් ටීවී එකේ බල බලා හිටියේ මොන්ත ක්‍රිස්තෝ සිටුවරයා කතාව ඇතුලත් චිත්‍රපටියක් (#7 පින්තුරය) අපිට හිතන්න පුළුවන් මේකත් බේන් ගැන කරන සඳහනක්. අනිත් කාරණය තමයි බැට් මෑන් කතාවේ එන බේන් බැට් මෑන් ගේ කොඳු නාරටිය කඩන සුප්‍රසිද්ද සිද්දිය (#8 පින්තුරය). මේක ට කියන්නේ “break a bat “ කියලා. මේක වෙනස් විදිහකට අපිට කතාවේ දී දකින්න පුළුවන්. ඒ තමයි අපේ ගිටාර් වාදකයා පිත්තක් දෙකට මැදින් කඩනවා. ඉංග්‍රීසියෙන් කිව්වොත් ඒ කරන්නෙත් “break a bat” කියන එකමයි (#9 පින්තුරය)

• අන්තිමේ දී පුරුදු විදිහට කතාවේ එන ජෝකර් ඊස්ටර් එග් එක. අපිට වේන් එන්ටර්ප්‍රයිසස් එකේ පාටියේ දී දම් පාට මල් පොකුරක් අරගෙන එන සේවකයෙක් ගැන විශේෂයෙන් පෙන්නනවා. ඊට පස්සේ ස්ටෑන් අතේ තියෙන්නෙත් ඒ වර්ගයේම මල් වගයක් (#10 පින්තුරය). අපි හොදටම දන්නවා දම් පාට කියන්නේ ජෝකර් ගේ ඇදුමේ පාට කියලා. ඒ වගේම ජෝකර් හැම වෙලේම කබායේ මලක් ගහගෙන ඉන්නවා. හැම වෙලාවෙම නම් ඒ මල දම් පාට නෑ. ඒත් මෙතන දී අපිට ජෝකර් ගැන ඉඟියක් තමයි දෙන්නේ.

10898161_1526973560918984_6087799448781219280_n

(https://www.facebook.com/pages/Comic-Script/1519015728381434)
Comic Script (144 Posts)


Leave a Reply

Your email address will not be published. Required fields are marked *

error: Content is protected !!