සුපිරි නිර්මාණ තුනක, අනාගත සැලසුම්….

මේ වන විට සුපිරි සිනමාපට තුනක් සිය ඉදිරි නිර්මාණ පිළිබඳ තහවුරු කර ඇත. එනම් G.I. Joe 3, Star Trek 3 සහ Transformers 5 යන සිනමාපට තුනයි. මේ තුනේම පෙර කොටස් අතිශය සාර්ථක වූ නිසා මේ අලුත් ආරංචිය පිළිබඳව සිනමා රසිකයන් අමන්දානන්දයට පත් වී සිටී.

G.I. Joe 3

Hasbro කොමික් පොත් වලට අනුව සහ 80 දශකයේ කාටූන් පෙළක් වූ G.I.Joe පාදක කර ගනිමින් ‘G.I.Joe-The Rise of Cobra (2009)’ සහ ‘G.I Joe Retaliation (2013)’ ලද  සාර්ථකත්වය නිසාම මෙහි තුන්වන කොටස මේ වන විට තහවුරු කර ඇත. ඒ අනුව මෙය 2016 වසරේ තිරගත වනු ඇති බවක් දැනගන්නට ලැබෙනවා. දෙවෙනි නිර්මාණයේ මෙන්ම මෙහිද ප්‍රධාන චරිතය සුපිරි රෙස්ලින් තරුව Dwayne Johnson හට ලබා දීමට තීරණය කර ඇත.

දෙවන සිනමාපටය අධ්‍යක්ෂණ කළ Jon M. Chu මෙවරද අධ්‍යක්ෂණය කරනු ඇත. Evan Daugherty ගේ තිර රචනයකට අනුව මෙය Paramount Pictures චිත්‍රාගාරය මූලික කරගනිමින් නිර්මාණය කිරීමට සැලසුම් කර ඇත. දැනට දක්වා ඇති පරිදි මෙවරද C.O.B.R.A කණ්ඩායමේ තෙවන ආගමනයට එරෙහිව G.I.Joe කණ්ඩායම සටන් වදිනු ඇත. බොහෝ දුරට මුල් සිනමා පට අතර ඇතිව තිබූ නොගැළපීම් මෙවර සකස් කරනු ඇති බව පැවසේ. විශේෂයෙන්ම පළමු කොටසේදී මියගිය ස්ටෝම් ෂැඩෝ දෙවන කොටසේදී ජීවත්ව සිටීම වැනි නොගැළපීම් මෙවර නිවැරදි කෙරෙනු ඇත.

Star Trek 3

අතිශය ජනප්‍රිය රූපවාහිනී කතා මාලාවක නූතන සිනමා සම්ප්‍රාප්තිය වූ ‘2009 දී පැමිණි Star Trek’ මෙන්ම එහි දෙවැන්න වූ ‘2013 පැමිණි Star Trek Into Darkness’ අති ජනප්‍රිය නිර්මාණයෙන් පසු එහි තෙවන කොටස ලෙස 2016දී Star Trek 3 තිරගත වනු ඇත.

1966 න් රුපවාහිනී කතා මාලාවක් ලෙස ආරම්භ වූ Star Trek 2016 වසරේ සිය 50වන සංවත්සරයට සමගාමීව මෙම Star Trek 3 තිරගත කිරීමට සැලසුම් කර ඇත. පෙර නිර්මාණ ද්විත්වයම සාර්ථකත්වයට බලපෑමක් එල්ල කල අධ්‍යක්ෂ JJ Abrams මෙවර එයින් ඉවත්ව ඇත. ඒ Star Wars VII’හි කටයුතු නිසාය. එම නිසා මෙවර අධ්‍යක්ෂක ලෙස Roberto Orci පත්කර ඇත.මෙවර තිර රචනය Patrick McKay, Roberto Orci විසින් කරන අතර රංගනයෙන් Chris Pine, Zachary Quinton, Zoe Saldana ඇතුළු පෙර ප්‍රධාන රංගන තරු පිරිසම එක්වනු ඇති බව පැවසේ.

Transformers 5

Transformers සිනමාපට අතරින් මේ වසරේ තිරගත වූ හතරවැන්න වෙමින්ම, නව ආරම්භයක් ලබාගත් Transformers: Age of Extinction’හි මීළඟ ඈඳුතුව හෙවත් සමස්ථ  Transformers කතා මාලාවේ පස්වැනි නිර්මාණය 2016 වසරේ තිරගත කිරීම සිදු කරන බවට පැරමවුන්ට් චිත්‍රාගාරය නිවේදනය කළේය.

Transformers: Age of Extinction මගින් පටන් ගත් නව ආරම්භයේ දෙවෙනි කොටස ලෙස මෙය නිර්මාණය වනු ඇත. මෙහි කතාව රචනයට, Ehren Kruger හට භාර දී ඇති බව පැවසෙන අතර තවමත් වැඩිදුර තොරතුරු දක්වා නොමැත. නමුත් අධ්‍යක්ෂ මයිකල් බේ මීට පෙර පවසා සිටියේ Transformers: Age of Extinction නවතම Transformers සිනමාපට ත්‍රිත්වයක පළමුවැන්න බවයි. එමනිසා පස්වැන්න, Age of Extinction මගින් ඇරඹු කතාව ඉදිරියට ගෙනයන්නක් විය හැකි බව නිශ්චය කළ හැකිය.

තිසර නියෝ

මෙතන පහළින් තියන සබැඳුම් වලිනුත් ඔබට මාව හමුවෙන්න පුළුවන්.