ඉදිරි දිගහැරුම (L) | Step Up All In – පා රිද්ම සලා සැම නටන රගා…

මේ දිගහැරුමත් එතරම්ම අපේ රටේ ජනප්‍රිය නොවූ චිත්‍රපට පෙළක නවතම නිකුතුව ගැනයි. චිත්‍රපට පෙළ ගැනනම් අපේ කට්ටිය වැඩිය දන්නෙත් නැතිව ඇති. බාගවිට අහලවත් නැතිව ඇති. ඒ වුණත් කැමති කවුරුන් හෝ ඉඳීනම් ඒ අය වෙනුවෙන් තමයි මේ දැනුවත් කිරීම… 😀

චිත්‍රපට පෙළ තමයි Step Up. 2006 ඉඳං මේ වෙනකම් චිත්‍රපට 4ක් නිකුත් වුණා. Touchstone Pictures වෙතින් බෙදා හැරපු මේ චිත්‍රපට පෙළේ අයිතිය 2012 ඉඳන් හිමි Lionsgate ආයතනයටයි. මේ චිත්‍රපට පෙළෙහි අලුත්ම චිත්‍රපටය ඇතුළුව 2/5 ක් එළිදක්වන්නේ ඔවුන්ගේ යටතේයි.

පිළිවෙළින් Step Up (2006)/ Step Up 2: The Streets (2008)/ Step Up 3D (2010) – Touchstone Pictures වෙතින් නිර්මාණය වුණා. ඒ එක එකක් පිළිවෙළින් මිලියන 12කින් ලොව පුරා මිලියන 114ක්(US මිලියන 65)/ මිලියන 23කින් ලොවපුරා මිලියන 150ක්(US මිලියන 58)/ මිලියන 30කින් ලොවපුරා මිලියන 159ක්(US මිලියන 42) බැගින් උපයාගෙන තිබෙනවා. Lionsgate වෙතින් මීට පෙර එළිදැක්වූ Step Up Revolution (2012) තමා මේ සිනමාපට අතරින් තරමක පසුබෑමක් පෙන්නුම් කෙරූ චිත්‍රපටය වුණේ. ඒ වුණත් එය ලොවපුරා මිලිය 140ක් උපයා තියෙනවා. ඒ මිලියන 33ක වියදමක ප්‍රතිඵලයක් ලෙසයි. සාපේක්ෂව ඇමරිකාව තුළ එය උපයාගෙන තිබෙන්නේ මිලියන 35ක් පමණක් වීම තමයි එය අසාර්ථක ලෙස අර්ථ දක්වන්න හේතුව. ඒකොහොම වෙතත් මේ චිත්‍රපට පෙළ සමස්ථ වශයෙන් ඩොලර් මිලියන 98ක වියදමකින් ලොවපුරා මිලියන 564ක්(US මිලියන 200) උපයාගෙන තියෙන බවත් සඳහන් වනවා. එනිසා මෑත කාලයේ සාර්ථකම “නැටුම්-ගැටුම්” චිත්‍රපට මාලාව විදියට මේක ඉක්මනින් නතර වෙන එකක් නැති පාටයි.

හරි එහෙමනම් බලමු අලුත් චිත්‍රපටය ගැන තොරතුරු ටිකක්. නම Step Up All In. නමට අනුව කිසියම් දෙයක් අනුමාන කරන්න පුළුවන්ද ඔබට? නමින් කියැවෙන පරිදිම පසුගිය චිත්‍රපටවලට එක්වූ සුපිරි නර්තන ශිල්පීන් වැඩි දෙනෙක් මේ වෙනුවෙන් එක් වන බව නිෂ්පාදකයන් පවසා තිබෙනවා. ඒ වගේම ජයග්‍රහණයට වඩා ජීවිතයට තවත් දේ වුවමනා බව සහ තිබෙන බවත් අපේ ශූරයන් මේ පාර තේරුම් ගන්නවා.

පසුගිය කතාවෙන් පස්සෙ ලොස් ඇන්ජලීස් වලට සාර්ථකත්වය සොයා ගියත් ජයග්‍රාහී නර්තන කණ්ඩායම බලාපොරොත්තු  කඩකරගන්නවා. ඉන් පස්සෙ ඔවුන් ලාස් වේගස් වලට යන්නේ වසර 3ක නර්තන ගිවිසුමක් ජයගන්නට හැකි තරගයක නිරත වන්නටයි.

Step Up: Revolution චිත්‍රපටයෙන් Ryan Guzman සහ Misha Gabriel කියන නර්තන තරු යුවළත්, Step Up 3D චිත්‍රපටයෙන් Stephen “tWitch” Boss නර්තන තරුවත්, Step Up 2: The Streets චිත්‍රපටයෙන් Briana Evigan නර්තන තරුවත්,Step Up චිත්‍රපටයෙන් Alyson Stoner කියන නර්තන තරුවත් සහ සිනමා පෙළ පුරාම පාහේ හුන් Adam Sevani නර්තන තරුව සමගින් නවක Izabella Miko කියන නර්තන තරුවකුත් මේ චිත්‍රපටය වෙනුවෙන් එකතු වනවා.

මුළුමනින්ම අලුත් නර්තන කණ්ඩායමක් ඉදිරිපත් නොකරන මුල්ම Step Up චිත්‍රපටය වන්නේ ද මෙයයි. එනිසා Step Up ලෝලීන් වෙනුවෙන්ම නිර්මාණය කෙරෙන චිත්‍රපටයක් ලෙසත් සැලකෙනවා. ඉතිං අපේ රටෙත් නර්තන ලෝලීන් ඉන්නා නිසා, ඒ අය වෙනුවෙන් ඔන්න සිහිපත් කෙරුවා නුදුරේදීම තිරයට එන “නැටුම්-ගැටුම්”
චිත්‍රපටය පිළිබඳව.

තිරයට එන දිනය: 2014 ජුලි 25

උදා