Tom Cruise ට මැරි මැරි උපදින්ඩ වෙලා.

Doug Limanගේ නවතම අධ්‍යක්ෂණයක Tom Cruise හමුදා නිලධාරියෙක්. ඒ ලුතිනන් කර්නල් Bill Cage යන නමින්. චිත්‍රපටියේ නම ‘All You Need Is Kill’. මේක විදුපබැඳුමක්. Bill Paxton, Charlotte Riley සහ Emily Blunt යන අයත් මෙහි දැකගන්ඩ පුළුවන්.

මේ චිත්‍රපටයේ කතාව මෙහෙමයි:
“ලෝකය පිටසක්වල ආක්‍රමණයකට ලක් වෙනවා. මේ ජීවී කොට්ඨාශය මීවදයක වැනි ගතිගුණ සහිතයි. මුන් මහා වේගයකින් ලෝකයේ මිනිස් ගහණය විනාශ කරනවා. හරියට වේරම්භ වාතයක් වගේ. කිසිදු මිනිස් හමුදාවකට මොවුන් එක්ක සටන් කරනවා තියා හැරෙන්නවත් බෑ. ඒත් ලෝකේ හමුදා සියල්ල එකට එකතු වෙලා කළ හැකි හැමදේම කරනවා මේකෙන් ගැළවෙන්නට.

ඔය අතරේ තමයි ලුතිනන් කර්නල් Cage සටන් බිමට පිවිසෙන්නේ. ඔහුට නිසි පුහුණුවක් නැහැ. නිසි ආයුධ නැහැ. යුද්ධයක් දැකලවත් නැහැ. ඉතිං දාපු හැටියෙ මෙයා මැරුම් කනවා. හැබැයි අර සතෙකුත් මරාගෙනයි මැරෙන්නේ. ඊට පස්සෙ ඔහු අවදිවෙනවා, ඒ දවසෙම. අර පිටසක්වලයා එක්ක ඇතිවුණු සෘජු ශාරීරික ගැටීම ඔහුව කාල වළල්ලකට විසි කරලා. ඉන් පස්සෙ ඔහු යළිත් සටන් වදිනවා. ආයිත් මැරෙනවා. ආයිත් අවදිවෙනවා. ආයිත් සටනට, ආයිත්…’ ඔය විදිහට ටිකෙන් ටික ඔහු ශක්තිසම්පන්න වෙනවා, උපායශීලී වෙනවා. නැවත නැවත එකම සටන කිරීම නිසා ඔහුට මේ මිමික්වරු නමැති හතුරන්ගෙන් ගැළවෙන ක්‍රමය ගැන ටිකින් ටික තේරුම් යනවා.”

විස්තරය කියෙව්වම ඔබට නිසැකවම සිහියට එන චිත්‍රපටයක් තිබෙනවා නේද? ‘Source Code’. ටිකක් විතර සමානයි වගේ. හැබැයි මේකත් කුතුහලයෙන් සහ ත්‍රාසයෙන් වගේම ක්‍රියාදාමයන්ගෙන් සපිරුණු වෙනස්ම අත්දැකීමක් බවට පත් වෙනවට සැකයක් නෑ. ඒත් ඉතිං මේක කියෙව්වට විතරක් මදිනේ, බලන්ඩත් එපායැ කුතුහලය නිවාගන්ඩ. ඒකට ඉතිං 2014 මාර්තු 14 පහුවෙනකම් ඉවසන් ඉන්ඩ වෙයි.

උදා