මීළඟ Bond කලු ජාතිකයෙක්ද?

2008 වසරේ ලෝකයේ බලගතුම තනතුරකට උරුමකම් කී පෙරළිකාර කළු ජාතිකයාගෙන් පසු තවත් කල්ලෙක් තවත් පෙරළියකට අර අඳින බවක් දැනගන්ඩ තියෙනවා. මතක ඇති ඇමෙරිකානු ඉතිහාසය පුරා ජනාධිපති ධූරයේ දිව්රුම් දුන් ප්‍රථම කළු ජාතිකයා වුණේ බැ‍රැක් ඔබාමා. ඔහු 2012 දෙවන වරටත් එම තනතුර ජයගන්නා අතරතුරේ සිනමා ලෝකයෙත් ඒ වගේම පෙරළියක් වෙන්ඩ පුලුවන් බවට ඉඟි පළ වෙනවා.

ඒ ලෝක ප්‍රකට 007 කේතධාරී James Bond චරිතය කලු ජාතික රංගන ශිල්පියෙකුට හිමිවීමට යන ආරංචිය. ඔහු නමින් Idris Elba. ‘Luther’ සහ ‘The Wire’ යන ටෙලි කතාවන් ඔස්සේ විශිෂ්ට ජනාකර්ෂණයක් උපයා ගනිමින් තියුණු හැකියාවන් ප්‍රකට කළේ ඔහුයි. තමන් මේ චරිතය පිළිගැනීමට වුවමනාවටත් වඩා උනන්දුවෙන් පෙරමග බලා සිටින බව ඔහු පවසා තිබෙනවා. දැනගන්නට ඇති හැටියට Elba මේ වනවිටත් මේ සම්බන්ධයෙන් ජේම්ස් බොන්ඩ් නිෂ්පාදිකා Barbara Brocolli හමුවී සාකච්ඡා කර තිබෙනවා. නමුත් තවමත් මෙය ස්ථිර වශයෙන් ප්‍රකාශ කර නැහැ.

කෙසේ වෙතත් Daniel Craig ගේ තුන්වන Bond චරිත නිරූපණය ‍රැගත් Skyfall මෙම වසරේ නිකුත්වීමත් සමග විචාරකයන් පෙන්වා දුන්නේ ඔහු දැන් මේ චරිතයේ පරාසයෙන් බැහැර වෙමින් පවතින බව. එනම් ඔහුගේ වයස මේ සඳහා බාධාවක් වන මට්ටමටම පත්ව ඇති බව ඔවුන් දැඩි ලෙස හුවා දක්වා තිබුණා. ඒ හේතුව නිසා මේ දිනවල බොන්ඩ් නිෂ්පාදකයන් බොන්ඩ් චරිතයට සුදුසු අයවළුන් පසුපස යන බවක් සඳහන්.

මෙවර චිත්‍රපටයේ බොන්ඩ් යුවතිය වූ Naomie Harris නම් පවසා තිබුණේ බොන්ඩ් චරිතය සඳහා වන තරගකාරීත්වයේදී Idris Elba වැඩි ලකුණු ප්‍රමාණයක් හිමිකරගනු ඇති බවයි. ඇයනම් ප්‍රථම කළු බොන්ඩ් ලෙස ඔහු පුළුල් තිරයට පිවිසෙනු දකින්නට තමන් හරිම ආශාවෙන් ඉන්නා බවක් හෙළි කර තිබුණේ ඇයත් කලු කෙල්ලක් නිසා විය හැකියි.

උදා