ඉදිරි දිගහැරුම… (XLV) | M:I 5 බැරි වැඩ මෙහෙයුම…

අලුත් ආරංචිය නරක එකක්ලු… 🙁 Tom Cruise වෙනුවට අලුත් මූණක් එන්ඩ යනවලු… කියන්නෙනම් Jeremy Rene‘ගෙ මූණලු… ඒ වුණාට මේක මේ, M:I 5 ගැන නෙමේ – M:I 4 ගැන ආරංචියක්ලු… 4 ගැන? 4 ඇවිල්ල ඉවරයිනේ! ආයෙ කොහොමද 4ක් එන්නේ? දැන් එන්ඩ තියෙන්නෙ 5 වෙනි එක! හ්ම්ම්… හ්ම්ම්… ඒක තමා වැරදි ආරංචියක්! නෑ… නෑ… ආරංචියේ වැරද්දක් නෙමෙයි. ආරංචිය ඇත්තක්! හැබැයි මේක පරණ කතාවක්. අන්න ඒකයි හොරේ…

හෙහ් හේ… 😀 ඔන්න ඔහෝ ආරංචියක් මීට වසර දෙක තුනකට උඩදි පැතිරුණා තමයි. ඒ වගේම ඒක ඒ විදිහටම වෙන්ඩත් ඉඩ තිබුණා තමයි. නමුත් කොහොමහරි ඒක වුණේ නෑ. M:I සිනෙ පෙළ ගැන හිතුවහම ඉහළ ආකර්ෂණයක් සහිත චිත්‍රපට ටිකක්. M:I (1996) සිට M:I Ghost Protocol (2011) දක්වා ගෙවුණු වසර 16ක කාලය තුළ නිර්මාණය වුණේ චිත්‍රපට 4යි. ඉහත කී දෙක සහ M:I II (2000)/ M:I III (2006) කියන දෙක තමයි ඒ හතර. මේ හතරටම ප්‍රධාන චරිතයෙන් එක්වුණේ Tom Cruise. ඔහු කොහොමත් ක්‍රියාදාමවලට නමක් දිනූ නළුවෙක්නෙ. ඒ වුණාට තවත් හොලිවුඩයේ නමක් දිනූ කෙනෙක් වන අධ්‍යක්ෂක J.J. Abrams යටතේ තිරයට ආ, 3වැන්නෙන් පසුව තමයි මම මේ ඉහත කී කතාව පැතිර ගියේ. හේතුව කියන්නම් ඔහොම යමුකෝ… 😉

ප්‍රථම M:I චිත්‍රපටය 1996 දී තිරගත වෙලා, වසර 4කට පස්සෙ තමයි 2වැන්න එන්නේ 2000 අවුරුද්දේ දී. ආපහු 3වැන්න එන්නේ වසර 6කින් පස්සෙ 2006 දී. 4වැන්න යළිත් 5කින් පසු 2011. පළමුවැන්න සහ දෙවැන්න ආදායම් අතින් සාර්ථක වුණා. නමුත් තෙවැන්න කඩාගෙන වැ‍ටුණා. මෙන්න මේ විදිහයි ඒ විස්තරේ…

M:I (1996) [IMDb 7.0] අධ්‍යක්ෂක – Brian De Palma
වියදම = $ 80m ආදායම = $ 457.6m (USA = $ 180.9m)

M:I II (2000) [IMDb 5.9] අධ්‍යක්ෂක – John Woo
වියදම = $ 125m ආදායම = $ 546.3m (USA = $ 215.4m)

M:I III (2006) [IMDb 6.8] අධ්‍යක්ෂක – J.J. Abrams
වියදම = $ 150m ආදායම = $ 397.8m (USA = $ 134m)

M:I IV (2011) [IMDb 7.3] අධ්‍යක්ෂක – Brad Bird
වියදම = $ 145m ආදායම = $ 694.7m (USA = $ 209.3m)

පැහැදිලිවම නමක් දිනාගත් 4 දෙනෙකුගේ අධ්‍යක්ෂණය ලැබුණත් ඇතැම් වෙලාවක ඇතැම් අයට හිතන තරම් සාර්ථක වන්නට නොහැකි වෙන අවස්ථා එළඹෙනවා. 3 වැන්නෙදි වුණෙත් ඒකමයි. සාධාරණීකරණය කළ හැකි තරම් ආදායම් මට්ටමකට ළඟාවීමට තෙවැන්නට බැරි වුණා. එතකොට හැමෝම කිව්වෙ Ethan Hunt (Tom Cruise)‘ගෙ කාලෙ ඉවරයි; IMF හෙවත් Impossible Mission Force‘හි ප්‍රධාන මෙහෙයුම් ක්‍රියාකරු විදිහට අලුත් මූණක් එකතුකරන්න කාලෙ හරි කියලයි. ඒත් හැබැයි ඔහුගේ කාලය තවමත් ඉවර නැති බව පෙන්වා දෙන්නට වසර පහකින් පසුව Brad Bird‘ට හැකිවුණා. හරි යන්නෑ කිව්වටත් පස්සේ, වසර 5ක කාලයක් Ethan Hunt ටිකක් නිහඬව බලා හිටියා. නමුත් Tom Cruise කියන නම තවමත් බැංකු මලු පුරවන නමක් බවට සනාථ කරන්නට ඔහුට හැකිවුණේ, M:I මාලාවේ ඉහළතම සමස්ථ ආදායම සනි‍ටුහන් කරමින් සහ දෙවැනි වැඩිම දේශීය ආදායම සනි‍ටුහන් කරමින්.

ඉතින් මෙදා පාරත් Ethan Hunt‘ට අලුත් මෙහෙයුමක් ලැබිලා කියලයි ආරංචිය. කලින් වගේම මේකත් බැරි-වැඩ මෙහෙයුමක්මයි. මුලින්ම මේ බැරි-වැඩ මෙහෙයුම් ඇරඹුණේ 1966 අවුරුද්දේ. 66 ඉඳන් 73 වෙනකම්ම මේ මෙහෙයුම ක්‍රියාත්මක වුණා. ඒ CBS රූපවාහිනී චැනලයෙන්. මිනිත්තු 50 බැගින් වන, කොටස් 177කුත් කතාවාර 7කුත් ගෙවෙන තුරා බැරි-වැඩ මෙහෙයුම දිගහැරුණා ඒ ඔස්සේ. Ethan Hunt එකතු වෙන්නේ නව යුගයේ බැරි-වැඩ කරන්නට මිසක්, ඔහු නොවෙයි මේ මෙහෙයුම්වල ආරම්භකයා. මේ බැරි-වැඩ මෙහෙයුම එදා රූපවාහිනියට නිර්මාණය කළ Bruce Geller නව යුගයේ මෙහෙයුම්වලටත් ඒ ඔස්සේ පදනම සකස් කළා කීවොත් නිවැරදියි.

ඒ විතරක් නෙවෙයි ඔහුගේ මේ නිර්මාණය දිසිරූ ක්‍රීඩාවන් කිහිපයකටත් පොත් ‍රැසකටත් මූලාශ්‍ර කොටගෙන තිබෙනවා. Tom Cruise නිෂ්පාදනයට අතගහන්න කලින් කිහිපවතාවක්ම චිත්‍රපට තැනීමට උත්සාහ කළත් අසාර්ථක වෙලා ගිහින්. ඒ වගේම මේ ඉහත කී සෘජු දායකත්වය ලද ඒවා හැරුණුකොට මෙමගින් අනුබල ලැබූ නිර්මාණ ගණන මීට වඩා බොහොසෙයින් වැඩියි. 😀 (2011 වසරේ ලද 4 වැන්නේ ඉහළ සාර්ථකත්වය අනුව අලුත් දිසිරූ ක්‍රීඩාවකුත් නිකුත් වුණ බව සඳහන්. මමනම් දන්නෙ දැන්, ඕගොල්ලෝ සෙල්ලම් කරල තියෙනවද?)

Jack Reacher (2012) ලියමින්/ අධ්‍යක්ෂණයකරමින් Cruise‘ව මෙහෙය වූ, Christopher McQuarrie සමග යළි එකතු වෙන්නටයි නිෂ්පාදක Cruise‘ගේ සූදානම. ඒ වගේම මෙවර තිරරචකයාත් ලෙහෙසි පහසු පොරක් නොවෙයි. Drew Pearce, ඔහු තමයි Iron Man 3‘හි සම-රචකයා, වගේම ඉදිරියේදී එන්නට යන Sherlock Holmes 3නේත් රචකයා වෙන්නේ. 2014 පෙබරවාරියේ ලන්ඩනයේදී නිෂ්පාදන කටයුතු ආරම්භ කිරීමට නියමිත මේ 5වැන්නට තවම නමක් තබා නැහැ. Cruise එක්ක 4ට එක්වූ Simon Pegg එක්වෙන බව සහතික කොට අවසන්. සෙසු නළු-නිළි පිරිස ගැන තවමත් ස්ථිර කොට නැහැ.

කතාව කොහොමදැයි කියන්නට බැරි වුණත්, ලෝකය පුරා තියෙන අයශ්කාන්ත, අරුමෝසම් තැන් කිහිපයකට යන්නටනම් Ethan Hunt හට සිදුවෙනවා නොඅනුමානයි. තැනින් තැනට යමින්, ලොව පුරා සරමින් කරන්නට බැරි වැඩක් කරන්නට මෙවරත් ඔහු වෙහෙස ගනු ඇති. ඊට IMF පිරිසගේ සහයෝගයත් ලැබෙනවාට සැකක් නෑ. John Woo‘ගේ II වැන්නෙන් පසුව ආ හැම M:I චිත්‍රපටයක්ම ආවේණික ගුණයක් දැරූ නිසා; මෙවරත් අධ්‍යක්ෂකවරයාගේ නිර්මාණ රටාව හා සමගත වෙමින්, වෙනම අනන්‍යතවක් සහිතව ගොඩනැගෙනු ඇතැයි කියවෙනවා.

අන්තිමටම තියෙන වැඩේ තමයි අමාරුම කාරිය. හේතුව: මේ පාර හැප්පෙන්ඩ වෙලා තියෙන්නේ ලේසි පාසු පුතයො ටිකක් එක්ක නෙමෙයි. දැනට කාලසටහනේ හැඩය අනුව, Star Wars: VII සහ Warcraft තිරගතවීම ඇරඹෙන්නේ M:I 5‘ට සතියකට කලින්. ඒ විතරක්නම් මදැයි Kung Fu Panda 3 තිරගතවීමත් ඇරඹෙනවා දවස් දෙකකට පස්සෙ. ඒ වුණත් නත්තල් ශීතලත් එක්කම පොරයට බහින M:I 5‘ට ඒක එච්චර හෙයියම්මාරුවක් වෙන එකක් නෑ. මොකද එදා ඉඳං අද වෙනකම්ම, බැරි-වැඩ කරලා දිනන එක ඉතින් කොහොමටත් පුරුදු දෙයක්නෙ! ඒ කොහොම වුණත් හරියටම; තිතටම; තව අවුරුදු 02ක් තියෙනවා හොඳේ… 😛

තිරයට එන දිනය: 2015 දෙසැම්බර් 25(නත්තල් දා)

උදා (217 Posts)

උදා