ඉදිරි දිගහැරුම… (XXXVIII) | MoS2 – වීරයන්ගේ රජමුසුව! [Update]

DC විශ්වයේ ප්‍රචලිතම සහ ප්‍රබලතම වීරයුග්මය; බැට් හෙවත් වවුල් සහ සුපර් හෙවත් සුපිරි තමා ලෝකයේ ඉහළතම ජනප්‍රසාදයකට හිමිකම් කියන වීරයන් දෙපළ. එනිසාවෙන්ම මේ දෙදෙනා එකටෙ’ක ගැටෙන කතාවක් ගැන කොමික් රසිකයන්ගේ ආකර්ෂණය ඉතාම ඉහළයි. කොමික් බැට්මෑන්‘ට වඩා බොහෝ සෙයින් වෙනස් බැට්මෑන් කෙනෙකුව තිරය මත සිතුවම් කළ දෙ-Chris-වරුන්‘ගේ නිර්මාණයේ උණුසුම පහව යන්නට මත්තෙන්, සුපර්‘ව ආපහු තිරයට කැන්දන් එන්ඩ ගත්තු තීරණය නිවැරදි බව සනාථ වුණේ, මේ වසරේ මෙතෙක් වාර්තා-සටහනේ තුන්වැනි වැඩිම ආදායම Man of Steel වෙත හිමිකරදෙමින්.

ඒ විතරක්නම් මදැයි. එදාමෙදාතුර සුපිරිවීර සම්භව චිත්‍රපටයක්(Super Hero Origin Movie) ඉපයූ ඉහළතම ආරම්භක ආදායමත් සටහන් කරගන්නට මේ යකඩයෙන් තැනුණු මිනිසා සමත් වුණා. සුපිරිවීර සම්භව චිත්‍රපටවල සමස්ථ ආදායම අනුව මෙය පසුවන්නේ තෙවැනි තැන. ඒ කියන්නේ අර කිවූ දෙ-Chris-වරුන්‘ගේ බැට්මෑන් සම්භව(Batman Begins) චිත්‍රපටයටත් වඩා ඉහළ ආදායමක් මේ සුපර්මෑන් චිත්‍රපටය සතු වූ බව. ඒ අනුව දැනට DC විශ්වයේ ඉහළතම ආදායම වාර්තා කරන සුපිරිවීර සම්භව චිත්‍රපටය වන්නේ MoS 2013. ඒ බැට්මෑන්’ගේ ආරම්භයට වඩා මිලියන 80කින් පමණ වැඩි ආදායමක්.

ඒ නිසාම වන්නට ඇති; මෙවර සුපිරි’වයි වවුල්’වයි රිදී තිරය මත මුණගැස්වීමට කාලය හරි බව ඔවුන් තීරණය කරන්නටත් ඇත්තේ. පෙනෙන අයුරින්, ඔවුනගේ තීරණය ඉතාම නිවැරදි වූවක් වාගෙයි. කලක් තිස්සේ, පෙරුම් පුරාගෙන සිටින Justice League වීර-සම්මේලනය සිනමාවට නැගීමට පදනම සකසන්නයි ඔවුනගේ මේ වෑයම. ඒ වෙනුවෙන් තමයි මේ Batman Vs. Superman යන කේත නාමයෙන් යුතුව නිපැදවෙමින් පවතින චිත්‍රපටයෙන් ඇරඹුමක් ලබාදෙන්නට සැරසෙන්නේ… එහෙමනම් බලමු ඒ ගැන විස්තර.

තවමනම්, මෙහි කතාව ගැන කිසිවක් දැනගන්නට නෑ. නමුත් තවමත් අත්දැකීම්වලින් නොපොහොසත් කැල් එල් හෙවත් ක්ලාක් කෙන්ට් සහ අපරාධ මැඩලීමට සටන් වැදීමෙන් වෙහෙසට පත් බෲස් වෙයින් අතර මතභේද හා ඝට්ටනයන් අතරේ ගොඩනැගෙන්නක් බව පැහැදිලියි. MoS පළමුවැන්නෙන් ඉදිරි-ඉඟි(Easter Eggs) රාශියක්ම ලබා දුන්නා. Lex Corp බැනරය Wayne සමාගමේ චන්ද්‍රිකාව/ Rebel නමැති පුද්ගලයා ඒ අතරින් කිහිපයක්. මේ හේතූන් නිසාම මේ දෙවැන්නෙහි සුපර්මෑන්‘ට එරෙහි ප්‍රබලතම සතුරා වන ලෙක්ස් ලූතර්‘ගේ සම්බන්ධයක් පවතිනු ඇතැයි යන්න ගැනත් තද-රසිකයන්(HardFans) අදහස් පළකරනවා.

කෙසේ වෙතත් සුපර්මෑන්ගේ පළමු වික්‍රමයෙන් මෙට්‍රොපොලිස් නගරයට සිදු වූ දැඩි හානියෙන් පීඩාවට පත් වැසියන්ගේ හිත හදාගන්නට ලබා දෙන අවස්ථාවක් විය හැකියැයි අනුමාන කෙරෙන ආකාරයේ, රූගත කිරීමක් පසුගිය දිනෙක අධ්‍යක්ෂක Zack Snyder විසින් සිදු කෙරුණා. ඒ Gotham නගරය සහ Metropolis නගරය අතර රග්බි පාපන්දු තරගයක් රූගත කිරීම. මෙය කෙබඳු කටයුත්තකට උපයෝගී කර ගනීවිදැයි මෙවන් අදහස් පළවී තිබෙනවා.

• “සුපර්මෑන්ට එරෙහි ලෙක්ස් ලූතර් හා බැට්මෑන්ට එරෙහි ගොර්ඩන් අතර හමුවක් තරගය අතරවාරයේ සිදු වෙනු ඇති.”
• “ලෙක්ස් ලූතර් හා බෲස් වෙයින් යන ප්‍රකෝටිපති ව්‍යාපාරිකයන් දෙදෙනා අතර හමුවක් සිදු වෙනු ඇති.”
• “පිටත්තර ලෝකයක ජීවීන් කළ විනාශයට එරෙහිව, ලෙක්ස් විසින් ජනතාව උසිගැන්විමට කටයුතු කරනු ඇති.”
• “සුපිරි බලයන්ට එරෙහි මතයක් දරන බැට්මෑන්‘ගේ උපක්‍රමික පිවිසීමකට ඉඩ සලසනු ඇති.”  වගේ අදහස් තමයි, මේ රූගතකිරීම ගැන පළවී තිබෙන්නේ.

“ලෙක්ස් ලූතර් සහ බෲස් වෙයින් යන දෙදෙනාම මේ සුපර්මෑන් ලෝකයට තර්ජනයක් ලෙස සලකාගෙන එක්ව සංවිධානය වනු ඇති.”  යනුවෙනුත් රසිකයන් සහ විචාරකයන් මත පළ කරනවා.

(“ලෙක්ස් බෲස් හමුවකදී ලෙක්ස් විසින් බෲස්’ව සුපර්මෑන්’ට එරෙහිව උසිගන්වා, දෙදෙනා අතර ගැ‍ටුමක් නිර්මාණය කොට ඒ ඔස්සේ වෙයින්’ගේ බූදලයත්, කැල් ගේ ජානත් එකවර අත්පත් කරගනිමින්ම, මේ බැට්මෑන් සහ සුපර්මෑන් යන දෙදෙනාවම වනසා දැමීමේ ප්‍රයත්නයක නිරත වෙනු ඇතැයි යන අදහසක් මටත් පහළ වුණා. ඒ විදිහෙන් ලෙක්ස්’ගේ උපක්‍රමය සාර්ථක වන්නට පටන්ගතහොත්, එතනදී ඔහුව වළකාලන්නට බැට්මෑන් සහ සුපර්මෑන් එක්වනු ඇති. මදි පාඩුවට වන්ඩර් වුමන්’ගේ සහයත් අවශ්‍ය වනු ඇතැයි අපේක්ෂා කළහොත් ඒ සම්බන්ධව පවතින කටකතාත් ඒ තුළට කදිමට ගැළපිළා එනවා” 😀 – මේක නිකම්ම අදහසක් විතරයි. මොකෝ මම දන්නෙ නෑ මේවා ගැන වැඩිපුර යමක්. තිබෙන තොරතුරුත්, දන්නා තරමත් අනුව කළ උපකල්පනයක් විතරයි මේ අදහස.) 😛

මගේ අදහස අමතක කළත්, අර කියාපු කටකතාවනම් ඇත්තයි. මොකද මෙහි නිර්මාණකරුවන් මේ වනවිට, කායික වර්ධනයෙන් සහ පෙනුමෙන් එක සේ ඔබින කාන්තා චරිතයකට නිළියක් හොයන බව රහසක් නෙවෙන නිසා. ඒ අනුව බොහෝ දෙනෙකුගේ බලාපොරොත්තුව, මේ තෝරන්නේ විශ්ම වනිතා(Wonder Woman) චරිතය සඳහා කියන එකයි. මොකද ඔනෑම කොමික් විශ්වයක් සතු ජනප්‍රියතම, ශක්තිමත්ම සහ ආකර්ෂණීයම කාන්තා වීරවරිය වන්නේ මේ විශ්ම වනිතාව.

එනිසා ඇයවත් මේ හරහා කරළියට ගෙන ඒම Justice League‘යට අඩිතාලමක් විදිහටත්, කාන්තා වීරවරියකගේ ඒකල-සිනමා(Solo-Movie) නිර්මාණයක් කරා පිවිසීමේ උපක්‍රමයක් විදිහටත් බොහොම ප්‍රයෝජනවත් ලෙස යොදවා ගත හැකි බව ඔවුන් තදින්ම විශ්වාස කරනවා. තවමත් Marvel විශ්වයෙන් සුපිරිවීර කාන්තා චරිතයක් එළිපහළියට ආවෙත් නැති නිසා ඒකෙත් වාසිය ගන්නට DC අයට ඉඩක් තියෙනවා මේ ක්‍රමයෙන්.

කෙසේ වෙතත් මේ ගැනනම් හරියටම එළිදරව්වක් තවම නෑ. WB’හි නිර්මාණාත්මක අධ්‍යක්ෂක Greg Silverman; පසුගිය දා පැවති මාධ්‍ය හමුවකදී ඒ බව ප්‍රතික්ෂේප කිරීමෙන් හෝ සනාථ කිරීමෙන් වැළකී සිටිබව සඳහන්. නමුත්, මේ සොයන කාන්තා චරිතය බෲස් වෙයින්’ගේ පෙම්පිඬ සොයාගැනීමේ අරමුණින් කෙරෙන්නක් බවත් කියැවෙන නිසා, මේ සම්බන්ධව තවමත් පැහැදිලි මදි. ඒ වුණත් Greg Silverman විශ්ම වනිතා චරිතයේ වැදගත්කමත්, ඔවුන්ට එහි ඇති වටිනාකමත් ගැන කතාකිරීම පෙර කී අදහස යම්තාක් සනාථ කෙරෙන්නක් බව සිතිය හැකියි.

එසේ නැතොත් MoS1‘හිදී දෙවැන්න ගැන ඉදිරි-ඉඟි ලබාදුන් අයුරින්ම, MoS2‘හිදී “විශ්ම වනිතා ආගමනය” ගැන ඉදිරි-ඉඟි ලබා දීමේ සූදානමක් පවතින බවට පළවන අදහසත් බැහැරලිය නොහැක්කක්. සුපර්මෑන් බැට්මෑන් ගැ‍ටුම අතරතුරේ වන්ඩර් වුමන්‘ගේ ඉදිරිගමනට මග සැකසීමට ඔවුන් බලාපොරොත්තු වෙනවා වන්නටත් ඉඩ තිබෙනවා. මින් පෙර Avengers අධ්‍යක්ෂක Joss Whedon මේ චරිතය පාදක කරගෙන සිනමා නිර්මාණයක් කිරීමට සැරසුණමුත් DC ආයතනයෙන් ඊට ලැබුනේ මද අනුග්‍රහයක්. කිහිප වතාවක් මේ චරිතය තිරයට ගෙන එන්නට තැත් කළත් මේ දක්වා ඒ තැත ව්‍යර්ථ වුණා. නමුත් මේ පහතින් දැක්වෙන, කෙටි-චිත්‍රපටය විශ්ම වනිතා චරිතය සතු වර්ණයන් තිරයට නැගීමට සුදුසුම ආකාරය බවට රසික ප්‍රශංසාවන්ට ලක්ව තිබෙනවා. එනිසා ඒ කෙරෙහි යොමුවීමේ පෙරසූදානමක් ලෙස එය සැලකිය හැකියි.

(ඇමසෝනියා නම් සැගවුණු දේශයක; පිරිමින්ට වඩා ශක්තිසම්පන්න භාවයෙන් යුතු යුධකාමී, ජවගුණයෙන් හෙබි, ස්ත්‍රීන්ගෙන් පමණක් සැදුම් ලද සමාජයකින් යුතු රටක් පැවතිය හැකි යැයි සමාජ-විද්‍යාත්මක මතයක් පළවුණා, මීට බොහොම කලකට ඉහත. ඉන් කියැවුණේ යෝධ කයකින් සහ සවියකින් යුතු ඇමසෝන් ස්ත්‍රීන් නම් වන, පෞර්ෂයෙන් අනූන, කාන්තා සමාජයක් ගැන. ඒ මතවාදය මත පදනම්ව, එවන් මිථ්‍යා රාජ්‍යයකට අයත්, රණශූර ස්ත්‍රී ගෝත්‍රයක කිරුළ හිමි කුමරිය වන ඩයනා ඔවුනගේ අඩවියට ඉහළින් පියාසරකොට යන ගුවන්යානාවක් දැක, මිනිස් ලොව ගැන හැදෑරීමටත් තමනට ඇති තර්ජනයන් දැනගැනීමටත් මේ ලොවට පැමිණීම පදනම් කරගෙනයි මේ වන්ඩර් වුමන් නැතහොත් විශ්ම වනිතා කතා පුවත ගොඩනැගී ඇත්තේ. එමෙන්ම මෙලොවදී ඇය අමරණීය චරිතයක් ලෙසත්, මහා බලයකින් යුතු චරිතයක් ලෙසත්, නිශ්චිත සම්භව කතාවක් රහිත චරිතයක් ලෙසත්, විවිධාකාර ප්‍රතිරූපයන් රැසක් සහිත චරිතයක් ලෙසත් සැලකෙන නිසා එය කුමන හෝ රූප-මාධ්‍යයකට ගෙනඒම ඉමහත් අභියෝගාත්මක කටයුත්තක් බවට පත්ව තිබෙනවා. ඒ වගේම මේ චරිතය වෙනුවෙන් වස්ත්‍රාභරණ නිර්මාණය කිරීමත් අතිශය සියුම් කටයුත්තක් බවට පත්ව ඇති නිසා, එය තවත් අසීරු වී තිබෙනවා. නමුත් මේ කෙටි-චිත්‍රපටයෙන් ඒ අභියෝග දෙකම ජයගෙන ඇති බවයි බොහෝ පිරිසකගේ අදහස!)

[youtube]http://www.youtube.com/watch?v=XATiV3gmy-Q[/youtube]

හරිනෙ එහෙනම්; දැනට දන්න හැම දේම කිව්වා ඔන්න. හැබැයි තවමත් මෙ දෙවැන්නෙහි කතාව කෙබඳු ආකාරයකට ගොඩ නැගේදැයි කිසිදු හෙළිදරව්වක් කොට නැහැ. රසිකයන් සහ සිනමාලෝලීන් දිගින් දිගටම අනුමාන කිරීම් තුළ රඳවා තබා ගනිමින්, සිනමාපටය කෙරෙහි අවධානය සහ කුතුහලය වැඩවීම ඔවුනගේ උපක්‍රමයක් ලෙස යොදාගන්නා බවක් තමා පෙනෙන්නේ. ඒ එක්කම දෙ-Chris-වරුන්‘ගේ බැට්මෑන් නිරූපණය මෙන් නොවී තාක්ෂණික පක්ෂයට බර, උපකරණයන්ගෙන් සන්නද්ධ, උපායශීලී බැට්මෑන් කෙනෙකු මෙවර චිත්‍රණය වෙන්නට යන බවයි ආරංචිය. ඒ නිසාම වන්නටත් පුළුවනි දෙ-Chirs-වරුන්‘ගේ බැට්මෑන්ට සංගීතය සැපයීමෙන් නොනැවතී, MoS වෙනුවෙනුත් සංගීතය නිර්මාණය කළ, Hans Zimmer මේ දෙවැන්න ගැන අතීරණයේ ඉන්නා බවකුයි හෙළිවුණේ. මොකද ඉඳුරාම වෙනස් ලෙස ගොඩනැගෙන; හුරු-පුරුදු පැරණි චරිතයක් කෙරෙහි සංගීතය සංයෝජනය කිරීම දුෂ්කර කාර්යයක් වීමේ හේතුව නිසා…

කතාව මොකක්වුණත්; කවුරු කවුරු හිටියත්; වැඩි ඈතක නෑ මේ ගැ‍ටුම තිරයට ගෙන එන්නට. වීරයන් වීරයන් ගැටෙන මහා සංග්‍රාමය දැනටමත් සැකසෙමින් පවතිනවා. එහෙනම් ඉවසමු එතකම් 😀

තිරයට එන දිනය: 2015 ජුලි 17

නවමුව: ඔන්න තවත් අප්ඩේ‍ටුවක් අරන් ආවා. මේ සුපිරි-වවුල් හටන ලේසි පාසු එකක් නෙවෙන පාටයි දැන් දැන් බලාගෙන යනකොට! හිතනවට වඩා හුඟක් දේවල් මේකෙන් දැකගන්න ලැබෙයි වගේ…

එයිද? නැද්ද? වැට උඩ හිටපු, විශ්ම වනිතාව අනිවාර්යෙන්ම මේ සටනට මැදිහත් වෙන එක වෙනවාමයි. ඊටත් වඩා පුදුමෙ මේ වගේ චරිතෙකට ඉන්න කෙල්ල(කෑල්ල) කැහැ‍ටුම කැහැ‍ටු -හැබැයි ලස්සන- කෙනෙක් වීම. දන්නවද දන්නෙ නෑ Gal Gaddot(ගොල් ගැඩොට්). අර F&F6 එකේ ඉන්න සුරුවම් කෙල්ල. 😀

මේකිත් එසේ මෙසේ බඩ්ඩක් නෙවෙයි බැලින්නම්. ඊශ්‍රායල හමුදාවේ අනිවාර්ය දෙවසරක සේවා කාලයක් සම්පූර්ණ කළ, ආයුධ පුහුණුව සහ සුපිරි සටන් හැකියාවක් සහිත නිළියක්. ඊශ්‍රායෙල් ජාතිකයෙක්නෙ ඉතින්. එහේ තරුණ හැමකෙනෙකුටම දෙවසරක හමුදාසේවය අනිවාර්යයි. ඒ වගේ රටවල පාලකයො සාමාන්‍ය තරුණ ජනතාවට ආයුධ අතට දෙන්ඩ බය නෑලු මොකද; තරුණයන්ට විප්ලව කරන්ඩ තරම් තමන් අකටයුත්තක් කරල නෑ කියල දන්නවනෙ 😛

මෙයා වැඩිය චිත්‍රපටවලින් අපට හුරු කෙනෙක් නෙවෙයි. ඒත් විශ්ම වනිතාව වෙන්නෙ එයාමයි කියල Zack Snyder සහ WB තහවුරු කරලා අවසන්. හැබැයි ඉතින් චිත්‍රපටියට කලින් ඇඟේ මස් ටිකක් ලියලා ගන්ඩනම් වෙයි මෙයාට. 😛

මේ චරිතෙ වෙනුවෙන් තිබ්බ තරගෙදි තවත් F&F නිළියක් වන Gina Carano‘ත් පෙරමුණේ හිටියා. ඒ ඇරුණහම Olga Kurylenko/ Jamie Alexander කියන දෙන්නත් ලොකු අවධානයකට නතු වුණා. නමුත් අවසන් තීරණය “ගොල් ගැඩොට්”. නිසැකවම ඇය මේ චරිතයට අවශ්‍ය සුදුසුකම් එලෙසින්ම සපුරා තිබෙනවා. F&F’හි ඇගේ චරිතයෙන් දකින සියලූම ප්‍රයෝග දර්ශන, ආදේශක නළු භාවිතයෙන් තොරව ඇය විසින්ම සිදුකොට තිබෙනවා. ඒ වගේම තම පුහුණුව සහ දක්ෂතාවයට ඉඩ සලසමින් ක්‍රියාදාම තරුවක් ලෙස වැඩ පෙන්නන්නට තමන් වඩාත් කැමති බවත් පවසා තිබෙනවා. ඇඟ ටිකක් චරිතයට අනුරූප වෙන විදිහට සකස් කරගන්න එක විතරයි, අමුතුවෙන් වෙහෙසී කළ යුතු දෙයක් ඇත්තේ ඇයට.

ඊට අමතරව ඇති අලුත්ම හිතාගත නොහැකි ආරංචිය තමයි මේ චිත්‍රපටයට අනර්ඝ නළු -ඩෙන්සිල් වොෂින්ටන්- එක්කාසු වෙන්නට යනවාය කියන කාරණය. ඔහුත් එක්ක තරගයක යෙදිලා ඉන්නෙ Idris Elba(Pacific Rim/ Mandela -A Long Walk to Freedom). මේ කියන චරිතයත් මේ චිත්‍රපටයේ අඩංගුවීමේ සම්භාවිතාව ඉතාම ඉහළ මට්ටමක ඇති බව අපි කලිනුත් කිව්වා. ඒ චරිතය තමයි, Lex Luthor.

ඊට අමතරව තිබෙන ආරංචිය තමයි, BvS චිත්‍රපටය හරියට සුපිරිවීරයන්ගෙන් සමන්විත එක්සත් ජාතීන්ගේ සංවිධානයක් වගේ වෙන්න යන බව. ඒ කියුමෙන් තවත් කුතුහලයන් බොහොමයක් උත්සන්න කරනවා. හරියට, “මේ චිත්‍රපටයේ බැට්මෑන්’ගේ සහායක සගයා වන Nightwing(නිශාපත්)/ Flash(ජවනයා)/ Green Arrow(හරිත ශරය)/ Green Lantern(පලා පහන)/ Cyborg(මනුයාන්ත්‍රයා)/ Aquaman(ජලමිනිසා)/ Black Panther(අඳුන් දිවියා) වගේ චරිතවලින් කීපයක්වත් ඇතුළත් වේවිද?” වගේ…! සුපිරිවීර ලෝකව්‍යාප්ත සංවිධානයක් ගැන මින් ඉඟියක් දෙන නිසා, අඩුම තරමෙ මේ චරිත කිහිපයක් සුළුවෙන් හෙළිදරව් කරමින් ඒ අයගේ ඉදිරි ගමනට පාර කපන්නවත් ඉඩ තියෙනවා. ඒ එක්කම නුදුරේදීම එන Justice League(යුක්ති මඬල) චිත්‍රපටයක් ගැනත් මේ ආරංචිය ගතු කියනවා. ඒ හාම DC විශ්වයේ ව්‍යාප්තිය පෙර නොවූ විරූ ඉසව්වකට ‍රැගෙන යාමේ පෙරනිමිති දක්වනවා. උදාහරණයකට; මීළඟට DC වෙතින් Cyborg චිත්‍රපටයක් දැකගත හැකි වෙයිද!? වගේ…

-Cyborg චරිතය අමුතුම චරිතයක් නිසා විස්තර කරන එක අතිශය බැරෑරුම් සහ සංකීර්ණ වැඩක්. එනිසා ඒ ගැන මෙහෙම කියන්නම්. Batman චරිතයේ ප්‍රතිවිරුද්ධ කලාපයේ සිටින චරිතයක් තමයි Cyborg. බැට්මෑන් සුපිරි බලයන්ට එරෙහිව ගිය; යාන්ත්‍රික සහය ලබමින් සුපිරි බලයන් හා සටන් වදින තාලෙ චරිතයක්. ඒ වෙනුවට මනුස්සකමයි’ යන්ත්‍රකමයි’; එකම ඇඟේ තිබුණොත් කොහොමට හිටීවිද? අඩක් ජීවී ඉන්ද්‍රියයන් සහ ඉතුරු අඩ පර්යේෂණ මට්ටමේ යාන්ත්‍රික ඉන්ද්‍රියයන්ගෙන් සමන්විත මනුයාන්තයෙක්. ඉතින් මේ චරිතය තිරයට ආවොත් සුපිරි හැකියාවන්ට එරෙහිව බාහිර බලවේගයක උදව්වෙන් සටන් වදිනවා වෙනුවට, සුපිරි හැකියාවක් සහ මනුෂ්‍යත්වය මුහුම් වෙන්නෙ කොහොමද කියන එක ගැන අමුතුම කතාවක් කියාවි.-

අන්න ඒ වගේ අරුම පුදුම චරිත රෑසක් අළු-ගසා බසා දාලා දූවිලි බැඳුණු DC රාක්කවලින් සිනමාව ආක්‍රමණය කරන්නට අරඅඳිමින් ඉන්නවා. ඒ හැරුණහම එක් අවුරුද්දකට අඩුපිරිවැයකින් නිපදවන සුපිරිවීර චිත්‍රපට දෙක බැගින් තිරයට ගෙනෙමින් Marvel හට කෙලින්ම අභියෝග කරන්නත් DC කට්ටිය දැන් පියවර අරන්, මේ MoS2ත් එක්කම. එනිසා Marvel‘ලාට වඩා වෙනස්ම සහ අමුතුම රසයක් සහිත අනගිතම DC චරිත රෑසක් රිදී තිරය දෙවනත් කරන දවස වැඩි ඈතක නෑ… මේ කියපු සේරම දේවල් ගැන හරියටම දැනගන්ඩ අර කලින් කිවූ දවස එනකම් ඉන්ඩම වෙනවා. ආයිත් මතක් කරන්නම්! 2015 ජුලි 17