ඉදිරි දිගහැරුම… (XIX) | 2nsidious සැගවුණු ඉරණම…

James Wan සුපිරි ත්‍රාස චිත්‍රපටි අධ්‍යක්ෂකවරයෙක්. ඉතින් ඔහුගේ ඉදිරියේදී එන්නට නියමිත එහෙව් චිත්‍රපටි 2ක්ම තියෙනවා. එකක් ගැනනම් 2013 වසරේ එන; චූ යන්ඩම බයවෙන අංක එකේ චිත්‍රපටිය බවට දැනටම ලොකු ආන්දෝලනයක් තියෙනවා. අනිකත් ඒ ජාතියෙම තමයි! චූ නොගියත්, දැන් යයි! දැන් යයි! කියල හිතෙන ජාතියේ…

හරි ඉතින් අමුතුවෙන් කිව යුතු නැහැනෙවැ මේක ගැන. මම හිතනවා මේකෙ මුල් චිත්‍රපටිය හැමෝම නරඹලා ඇතියි කියලා. ටිකක් වෙනස් ආරක අමුතු වුණත් හුරුපුරුදු තේමාවක චිත්‍රපටියක්. ‘Insidious (2011)’. මේකත් එක්තරා හොරර් සන්ධිස්ථානයක් කිව්වොත් හරි. මොකද දළ-පට හමුවීම කියන තේමාවෙන් බැහැරව සාමාන්‍ය පරිදි අතිශය සාර්ථක අන්දමේ අඩු-වැය චිත්‍රපට කිරීමට හැකි බව සනාථ කර පෙන්වූ මෑත භාගෙ ආපු මුල්ම සහ හොදම චිත්‍රපටිය! මොකද $ 1.5m වියදම් කරලා $ 97m ට අධික ආදායමක් ලබන්නට මෙය හදාපු කට්ටියට හැකි වුණා.

ඒකෙන් කමක් නෑ දැන් හැරෙමුකෝ අලුත් එක දිහාවට, නේද? ගියවර වගේම අධ්‍යක්ෂණය James wan. ලැම්බර්ට් පවුලේ මූලිකයා හෙවත් Josh ලෙස පෙර පරිදිම Patrick Wilson එක්වෙනවා. ඔහුගේ බිරිඳ වන Reina ලෙස Rose Byrne එක්වෙන අතරේ පසුගිය වතාවේ අප දු‍ටු නළු-නිළියන් සියල්ලම මෙවරත් යළි වරක් සුපුරුදු චරිත හරහා දායක වෙනවා. පෙර පරිදිම තිරරචනය Leigh Whannell අතිනුයි.

හරි එහෙනම්, මේං මෙහෙමයි මේකේ කතාව! මේක පටන් ගන්නෙ කලින් එකේ අවසානය සමගම වගේ. එහි සිදුවීම්වලින් පසුව එතරම් කල් යන්නට මත්තෙන් ලැම්බර්ට් පවුල තම පදිංචිය වෙනස් කරන්නෙ මෑතදී අත්විඳින්නට සිදු වූ හිරිහැර පීඩාවන්ගෙන් මිදී යම් මානසික සුවයක් ලබාගන්නා අදහසින්. නමුත් ඔවුන් විවේකය ගත කරන්නට යන ඔහුගේ අත්තම්මාට අයත් නිවස හිතන තරම් නිස්කාංසු තැනක් නොවෙයි වගෙයි. ගිය පාර ජොෂ්’ට වැහුණු ගෙවල-භූතයා තවමත් ඔහුගේ සිරුර අත්හැර ගිහින් නැතුවාද? නැතිනම් මේ නිවස හා ඔහු අතර ගුප්ත බැඳීමක් ඇතුවාද? එහෙමත් නැතහොත් ඔවුනගේ පවුල හා මළගිය ලෝකය අතර වෙන්නොකළැකි බැදීමක් ඇතුවාවත්ද?”

මේ ගැටළු වලට පිළිතුරු දැනගන්ඩනම් ඉවසලා ඉන්ඩ වෙනවා මේ චිත්‍රපටිය සිනමාහල්වල හොල්මන් කරන්ඩ පටන්ගන්න දිනය එනකම්. ඒකටත් තව වැඩි කලකුත් නැති නිසා ඉතින්, බයිස්කෝප් සිංහලෙන් එකේ සිංහලත් එක්කම මේක බොහොම ඉක්මනටම හොල්මන් පෙන්නාවි!

තිරයට එන දිනය: 2013 සැප්තැම්බර් 13

උදා (217 Posts)

උදා