පුවත්ලාංකීයලාංකීය සිනමාවසියල්ල

කොස්තාපල් පුඤ්ඤසෝම (2013) – අවංක පොලිස් නිලධාරියෙකුගේ කථාවක්…

ආයුබෝවන් යාළුවනේ!!!කොහොමද සැප සනීප? ඔයාලා හොඳින් ඇති කියලා හිතනවා. මම මේ පාර අරන් ආපු ලිපිය ශ්‍රී ලාංකේය සිනමා නිර්මාණයක් ගැන ලිපියක්. මේකේ නම තමයි, “කොස්තාපල් පුඤ්ඤසෝම”.
(මේකේ නම මුලින් ම අහපු වෙලේ, මට හිනාව නවත්තගන්නත් බැරි වුණා :D…)
 
උදයකාන්ත වර්ණසූරිය මහත්මයා කියන්නේ ශ්‍රී ලාංකේය සිනමා කලාවේ, සිනමා අධ්‍යක්ෂණය අතින් තමන්ගේ ම ශෛලියකට සිනමා සිත්තම් එළි දක්වමින් කා අතරත් ජනප්‍රිය වූ අධ්‍යක්ෂවරයෙක්. “ගිනිඅවි සහ ගිනිකෙළි” (1998), “බහුභූතයෝ” (2002), “ආසයි මං පියාඹන්න” (2007) , වගේ ජනප්‍රිය සිනමා කෘති රැසක් නිර්මාණය වුණේ මෙතුමා අතින්. කාලීන සිනමා අධ්‍යක්ෂණය අතින් ඉදිරියට ම ගිය මෙතුමා විටෙක දී තම ආර වෙනස් කරමින් කුඩා දරුවන් වෙනුවෙන් ” රන් කෙවිට ” වැනි සිනමා නිර්මාණ  ද, අධ්‍යක්ෂණය කළා. කෙසේ වුවත් මේ වතාවේ වසර 11 කට පසුව නැවතත් හාස්‍ය රසය පිරි සිනමා නිර්මාණයක් අප හමුවේ තැබීමයි උදයකාන්ත මහතා ගේ වෑයම වෙලා තියෙන්නේ. ඒ තමයි මේ අවුරුද්දේ තිරගත වීමට නියමිත ” කොස්තාපල් පුඤ්ඤසෝම ” චිත්‍රපටය. 
“කොස්තාපල් පුඤ්ඤසෝම කියන්නේ අවංක පොලිස් නිලධාරියෙක්. හැබැයි මෙයා කොස්තාපල් නිසා අඩු පඩියට, අඩු නිලයක් යටතේ තමයි රාජකාරි කරන්නේ. මෙයාට ඉන්නවා මෙයාගේ පඩියයි, නිලයයි දෙක ම වැඩි වෙනකල් නොඉවසිල්ලෙන් බලාගෙන ඉන්න බිරිඳක් වගේ ම මෙයාට ම හරියන මරු පොලිස් යාළුවෝ කට්ටියක්. මෙයාලා තමන්ගේ සේවා කාලයේදී හුඟාක් සංකීර්ණ හැබැයි මාර ජොලි පරීක්ෂණ විසඳලා තමයි අත්දැකීම් ලබාගෙන තියෙන්නේ. කොහොමහරි පුඤ්ඤසෝම ඇතුළු පිරිසට සිද්ධ වෙනවා, මැර කල්ලියක් තරුණ ගැහැණු ළමයෙක් ව පැහැරගෙන ඒ ළමයගේ දෙමාපියන්ගෙන් කප්පම් ඉල්ලන සිද්ධියක් සම්බන්ධව පරීක්ෂණ පවත්වන්න. සේවා කාලයේදි ජොලි වැඩ කරපු මේ ගොල්ලන්ට මේක කරන්න පුළුවන් වෙයිද? බැරි වෙයිද?” මේක තමයි මේ චිත්‍රපටය පුරාවට දිගහැරෙන කථාව. 
 
චිත්‍රපටයේ  ‘කොස්තාපල් පුඤ්ඤසෝම ‘ විදිහට අපි කවුරුත් දන්න ජනප්‍රිය නළු මහෙන්ද්‍ර පෙරේරා මහතා තමයි රංගනයෙන් දායක වෙන්නේ. තව පුඤ්ඤසෝමගේ අතිජාත මිත්‍ර “සාජන් වික්‍රමපාල ” ගේ චරිතය ගාමිණී හෙට්ටිආරච්චි මහතාත්, පුඤ්ඤසෝමගේ ඉහළ නිලධාරියා වන “පණ්ඩිතරත්න” ගේ චරිතය ශ්‍රියන්ත මෙන්ඩිස් මහතාත්, පුඤ්ඤසෝමගේ බිරිඳ විදිහට දුලීකා මාරපන මහත්මියත් සෙසු චරිත සඳහා ජනක රණසිංහ, වසන්ත විට්ටච්චි, රොනී ලීච් වැනි ජනප්‍රිය නළු නිළියන් රැසක් මේ චිත්‍රපටයට රංගනයෙන් දායක වෙනවා. චිත්‍රපටයේ අධ්‍යක්ෂණය කරන්නේ උදයකාන්ත වර්ණසූරිය මහතා විසින්. තව උදයකාන්ත මහතා සමඟ එක්ව චිත්‍රපටය නිෂ්පාදනය කරන්නේ සුනිල් ටී. ප්‍රනාන්දු, යොහාන් ප්‍රේමරත්න මහත්වරුන්. වේශ – නිරූපණය වසන්ත විට්ටච්චි මහතා සිදු කරන අතර ම,  චිත්‍රපටයේ ගීත සඳහා සංගීතය සපයන්නේ ජනප්‍රිය සංගීත ශිල්පී දෙපළක් වන භාතිය සහ සන්තුෂ් වගේ ම, මේ කාලේ ප්‍රසිද්ධ සංගීත කණ්ඩායමක් වන Doctor කණ්ඩායමයි. ගීත ගායනය සඳහා Doctor කණ්ඩායමේ ලන්ත්‍රා පෙරේරා, මේරියන්ස් කණ්ඩායමේ නලීන් පෙරේරා සහ භාතිය ජයකොඩි යන ගායකයින් සම්බන්ධ වෙනවා. චිත්‍රපටය මේ වසරේ තිරගත වීමට නියමිතයි.

Author

  • Saver

    මෙතන පහළින් තියන සබැඳුම් වලිනුත් ඔබට මාව හමුවෙන්න පුළුවන්.

9 thoughts on “කොස්තාපල් පුඤ්ඤසෝම (2013) – අවංක පොලිස් නිලධාරියෙකුගේ කථාවක්…

Leave a Reply

Your email address will not be published. Required fields are marked *