Morbius, the Living Vampire | මෝබියස් හැදින්වීම

Morbius මුල් චිත්‍රපටය නිකුත් වෙන්න කලින් මෝබියස් කියන චරිතේ හැදෙන්නෙ කොහොමද, මේක මොන විදිහේ චරිතයක්ද කියලා  විස්තරයක් කරන්න ඕන කියලා හිතුවා. මේ චරිතයත් මීට කලින් විස්තර කරපු සිම්බෝයෝට් පවුලේ අය වගේම වෙනස්ම චරිතයක් සහ විටෙක වීරයෙක් තවත් විටෙක දුෂ්ටයෙක් විදිහට තමන්ගෙ චරිතය නිරූපණය කරපු ඇන්ටී-හීරෝ කෙනෙක් කිව්වොත් නිවැරදියි.

චරිතේ හැදුනේ කොහොමද?

අතිශය ජනප්‍රිය ස්පයිඩර්-මෑන් කොමික් වලට හදුන්වා දුන්න චරිතයක් තමයි Morbius, the Living Vampire කියන්නෙ. Roy Thomas යටතේ රචනයත් හා Gil Kane යටතේ සිතුවමට ලක් කරලා, මේ දෙදෙනා යටතේ නිර්මාණය වෙන මේ චරිතය මුල්ම මුහුණුවර විදිහට ගෙන එන්නෙ 1971 වසරේ ඔක්තෝබර් මාසයේදී නිකුත් වූ The Amazing Spider-Man 101 වැනි කොමික් කලාපය හරහා.

චරිතය නිර්මාණය වීමට පාදක වුන අපූරු කතාවක් තියෙනවා. ඒ තමයි මේ චරිතයේ නිර්මාතෘවරයකු වූ රෝයි තෝමස් කියන්නෙ ඒ කාලේ නිකුත් වුන රාක්ෂයො සම්බන්ධව නිකුත් වුන සිනමාවට බොහෝ සෙයින් ඇලුම් කරපු කෙනෙක්. විශේෂයෙන්ම ඩ්‍රැකියුලාගේ චරිතය පාදක කරගෙන නිර්මාණය වුන හැම සිනමාවටයක්ම වගෙ රස විදලා තියෙනවා. මේ අතරේ 1957 වසරේදී නිකුත් වුන චිත්‍රපටයක් තියෙනවා The Vampire කියලා. මේක කළු/සුදු චිත්‍රපටයක්.

තමන්ගෙ ජීවීතේ පවත්වාගන්න මිනිස් රුධිරය උරා බීපු මේ වැම්පයර්ගේ චරිතය පාදක කරගෙන, මේකේ අදහස් එක්කාසු කරලා තමයි රෝයි තෝමස් මයිකල් මෝබියස්ගේ චරිතය නිර්මාණය කරන්නෙ. මේ චරිත දෙකෙහිම මුහුණුවරවල් එකිනෙකට සෑහෙන දුරකට සමානයි.

එතකොට මෝබියස් කියන්නෙත් ඩ්‍රැකියුලා කෙනෙක්ද?

වැම්පයර් කෙනෙක් කියන්නෙ මිත්‍යාව හා මැදි ජීවියෙක් කිව්වොත් හරි. මේක සමහර අයට වැම්පයර් කියන වචනය අර්ථකථනය කරන විදිහට වෙනස් වෙන්න පුලුවන්. සාමාන්‍යයෙන් නොනැසී ඉන්න නම් මිනිස් රුධිරය අවශ්‍ය, හිරු එළියෙන් හානියට ලක් වන, රාත්‍රී කාලයේ එලි පහලට යන චරිතයක් විදිහට තමයි මෑත කාලයේ නිර්මාණය වුන නිර්මාණ වලන් වැම්පයර් කෙනෙක් විදිහට හදුන්වන්න පුලුවන් වෙන්නෙ. ශත වර්ෂ ගණනාවක් පුරාවට ජීවත්ව ඉන්න කවුන්ට් ඩ්‍රැකියුලා තමයි වැම්පයර්ලගේ නායකයා විදිහට හදුන්වන්නෙ.

ඔය කියන ගති ලක්ෂණ වලින් කිහිපයක්ම බෝමියස්ට තියෙනවා සහ එයාට ඒවා ලැබෙන්නෙ ප්‍රතිකාරයක අතුරු ඵලයක් විදිහට. ඒවගේම කලිනුත් කිව්වා වගේම මෝබියස්ට ඩ්‍රැකියුලා කෙනෙකුගේ ස්වරූපය, නොනැසී ඉන්න මිනිස් රුධිරය අවශ්‍ය වීම වගෙ ගති ලක්ෂණ වලින් සමාන වෙනවා. මීට අමතරව කොයි කවුරුත් අහලා තියෙන තමන්ගෙ වර්ගයා බෝ කරන්න නැව්ගත වෙලා එංගලන්තය බලා යන ඩ්‍රැකියුලාගේ සිදුවීමත්, තමන්ගෙ රෝගයට ප්‍රතිකාරයක් සොයමින් නැව්ගත වෙන මයිකල් මෝබියස්ගේ සිදුවීම් පෙලත් එක්තරා දුරකට සමානයි, හැබැයි මේ චරිත දෙකම නිරූපණය කරන්නෙ එකිනෙකට වෙනස් විදිහට. 

කොමික් පසුබිම

මයිකල් මෝබියස් උපත ලබන්නෙ ග්‍රීසියේදී. එයාගේ තාත්තා මෝබියස්වයි එයාගේ අම්මවයි දාලා ගිය නිසා අම්මා තමයි මෝබියස්ව බලාගත්තේ. මෝබියස් කියන්නෙ උපතේ ඉදන්ම රුධිරයෙ තියෙන සෛල මැරී යන රෝගයෙන් පීඩා විදපු කෙනෙක්. මේ නිසාම මෝබියස්ගෙ ළමා කාලය හුදෙක්ම හුදකලා වෙලා ගත කලේ. පුංචි කාලයේ ඉදන්ම පොත පතට ඇලුම් කරපු මෝබියස් තමන්ගෙ කාලය ගත කලෙත් පොත් කියවලා ඒවායින් ලබාගන්න දැනුම එක්කයි. මොන තරම් හුදකලා වී හිටියත් මෝබියස්ට පුංචි කාලෙදි හොදම යාලුවො දෙන්නෙක් හිටියා. ඒ එමිල් නීකෝස් වගේම ලීසා නීකෝස්.

කොලේජ් එකේ ගත කරන කාලයේදී මෝබියස් වගේම එමිල් දෙන්නා නොබෙල් ත්‍යාගය දිනාගන්න තරම් අතිදක්ෂ තරුණ විද්‍යාඥයින් බවට පත්වෙනවා. ඒවගේම මෝබියස් පීඩා විදපු රෝගයට ප්‍රතිකාරයක් විදිහට මේ දෙන්නා එකතු වෙලා වැම්පයර් වවුලන් හා විද්‍යුත් කම්පන හරහා ප්‍රතිකාරයක් අත්හදා බලනවා. මේ අත්හදාබැලීම් දීර්ඝ කාලීනව කරලා හරියටම බලන්න තරම් කාලයක් ලැබෙන්නෙ නැති නිසා මේ ප්‍රතිකාරය මෝබියස්ට අත්හදා බලන්න තීරණය කරනවා. ප්‍රතිකාරය අත්හදා බලන්න නැව්ගත වෙන මේ අය අවසානෙදි ප්‍රතිකාරය මෝබියස්ගෙන් අත්හදා බලනවා. මේකෙන් ඇතිවුන අතුරු ප්‍රතිඵලයක් විදිහට ලේ උරා බොන වවුලෙකුට හා වැම්පයර් කෙනෙකුට පිහිටන ගති ලක්ෂණ විදිහට හිරු කිරණට ඇති අප්‍රසාදය, පියාසර කිරීමේ හැකියාව, වැඩිදියුණු වූ ශක්තිය, වේගය, ක්ෂණිකව සුවේ වීමේ තත්වය ඇති වෙනවා. මේ වගේම උල් දත් දෙකක්ද හට ගන්නවා. මේ සිදුවීම් වලින් පස්සේ පහුවදාට ඇතිවෙන ලේ පිපාසය නිසා තමන්ගෙ හොදම යාලුවා එමිල් නීකෝස්ව මරලා දැම්මා. මේ සිදුවීම් වෙන අතරේ මයිකල්ට ආදරයක් ඇතිවුන මාර්ටීනස් පවා මේ නැවේ හිටියා. එයාටත් ඒ දේම තමන් අතින් සිද්දවෙයි කියලා බයටම මයිකල් ඒ නැවෙන් වතුරට පනිනවා.

වතුරට පැනලා යට යද්දී මෝබියස් බලාපොරොත්තු වෙන්නෙ තමන් මැරිලා යයි කියලා. ඒත් ඒක වෙන්නෙත් නැති නිසා අතරමගදී මුණගැහෙන නැවකට ගොඩ වෙන්නෙ ඇමරිකාවට එන්න හිතාගෙනයි. මෝබියස්ගේ තිබුණු විකෘතිභාවය නිසා නැවේ හිටිය අය එයාව නැවෙන් වතුරට දාන්න හදද්දී මෝබියස්ම වතුරට පැනලා රෑ වුනායින් පස්සේ නැවේ හිටිය අය නිදි අතරේ මේ සේරම අයගේ ලේ බීලා එයාලව මරලා දානවා. මෙහෙම කලා කියලා මෝබියස්ව සෑහීමට ලක් කරලා මීලග ගොදුරු හොයන්න යන්න පොළඹවන්නෙ නැහැ නැහැ. ඒ වෙනුවට තමන්ට තමන් ගැනම සෑහෙන ලොකු කල කිරීමක් ඇති කරලා, වෛර කරන්න පටන් ගන්නවා. හරියට බෲස් බැනර් හල්ක් බවට වෙනස් වෙනවට අකමැතියි වගෙ.

 

ස්පයිඩර්-මෑන්ව මුණගැහීම

ඇමරිකාවට ආවට පස්සේ මෝබියස්ට ස්පයිඩර්-මෑන්ව මුණගැහෙනවා.මේකත් හරිම අපූරු විදිහට. මෝබියස් නොදැනුවත්වම යන්නෙ මේ කාලෙදි ස්පයිඩර්-මෑන් නැවතිලා හිටිය ගෙදරකට. මේ කාලෙදි ස්පයිඩර්-මෑන් හිටියෙ ග්වෙන් ස්ටේසිගෙන් වගේම ජේ. ජෝනා ජෙමසන් වගෙ හුගක් අයගෙන් ඈත්වෙලා ඉන්න සිද්දවුනා. මොකද මේ කාලේ වෙද්දී ස්පයිඩර්-මෑන් හිටියෙ අමතර අත් හතරක්ම ඇගෙන් මතුවුණ විකෘති ස්වභාවයක.

මේ තත්වයට උදව් කරමින් හිටියෙ කර්ට් කෝනර් නොහොත් ලිසර්ඩ්. ස්පයිඩර්-මෑන්ගේ ඇගට කඩා පැනලා මෝබියස් ලේ බොන්න හදද්දී නවත්තන හිතාගෙන මැද්දට පැන්නත් මෝබියස්ගේ තියෙන ශක්තිමත් බව නිසා එයා මේ දෙන්නටම පහර දීලා, ලිසර්ඩ්ගේ ලේ පවා බීලා යනවා. මේකෙන් ක්ෂණිකවම ලිසර්ඩ්ව නැවත වතාවක් කර්ට් කෝනර් බවට පත් වෙනවා. මේක තාවකාලිකයි. එතකොට තමයි මේ දෙන්නා තේරුම් ගන්නේ මෝබියස්ගේ ලේවල තියෙන දේ මොකක් වුනත් ලිසර්ඩ්ට ආයෙ වතාවක් කර්ට් කෝනර් වෙන්නත්, ස්පයිඩර්-මෑන්ට එයාගේ අමතර අත්දෙක නැති කරලා දාන්නත් මෝබියස්ගේ ලේ වටිනවා කියලා.

ඉතින් මේ දෙන්නා එකතුවෙලා කොහොමහරි මෝබියස්ගේ රුධිර සාම්පලයක් අරගෙන ප්‍රතිකාරයකුත් නිර්මාණය කරගෙන දෙන්නම ආයෙ හිටිය තත්වයට පත් වෙනවා.

මෝබියස් චරිතයේ නිර්මාතෘ රෝයි තෝමස්ට තව තවත් මෝබියස් චරිතය යොදාගෙන නිර්මාණ කටයුතු කරන්න ඕන කලත් මේකෙන් පස්සේ මෝබියස් ආයෙ වතාවක් සෘජුවම Spider-Man කොමික් ඔස්සේ කාලයක් යනකල් දකින්න ලැබෙන්නෙ නැහැ. මොකද 1970 කාලය කියන්නෙ වර්තමානය වගෙ නෙවෙයි. මේ කාලෙදි නම් අලුත්ම කොමික් චරිතයක් යොදාගෙන අලුත්ම කොමික් පෙලක්‌ නිර්මාණය කරලා නිකුත් කරලා පුලුවන් සෝෂල් මිඩියා හරහා මේ දේවල් ප්‍රේක්ෂකයන් අතරට යන විදිහ හොද, නරක මේ හැමදේම එක්කම සති කිහිපයක් ඇතුලත දැනගන්න. ඒත් 1970 කාලයේදී නිකුත් වෙච්ච කොමික් නිර්මාණ වලදී මේ කොමික් නිර්මාණවල විකිණුම් තත්වය වගේම මේ කොමික් කියවන පරිශීලකයන්ගේ අදහස් දැනගැනීම වෙනුවෙන් වෙන් කරලා තිබුණු ලේටර්ස් පේජ් වලින් ලියුම් එනකල්ම මග බලං ඉන්න සිද්දවෙලා තියෙනවා. මේ වගෙ දේකට මාස කිහිපයක් ගත වෙන්න පුලුවන්.

ස්පයිඩර්-මෑන් චිත්‍රකතාවක පල වී තිබූ ලේටර්ස් පේජ් එකක්

මේකනේ පස්සේ ආයෙමත් වතාවක් මෝබියස්ගෙ චරිතය මාවල් කොමික් ඔස්සේ දැකගන්න ලැබෙන්නෙ ටීම්-අප් එහෙම නැත්තම් චරිත ගණනාවක එකතුවීම් සිදුවෙන තැන් වලදී.

Fantastic Four සහ X-Men

මෝබියස්ගේ තත්වයට ප්‍රතිකාරයක් හොයන්න මාර්ටීන් ෆැන්ටෑස්ටික් ෆෝ සාමාජික හියුමන් ටෝච්ව සම්බන්ධ කරගන්නවා. හියුමන් ටෝච් විශ්වාස කලා මෝබියස්ගේ පරණ සහයක ඩොක්ටර් හෑන්ස් යෝගන්සන්ව හොයාගෙන එකතු කරගන්න. මොකද ඒ වෙද්දීත් මාර්ටීන් ලග මෝබියස්ගේ පරීක්ෂණයේ අත්හදාබැලීමේ ලියකියවිලි සේරම තිබුණු නිසා ඒවයින් මෝබියස්ට ප්‍රතිකාරයක් නිර්මාණය කරලා දෙන්න පුලුවන් වෙයි කියන විශ්වාසයෙන්.

ඒවගේම මේ අයට තේරුම් ගියා මේ කෙනා මෝබියස්ගේ පරණ සහයකයෙක් නිසා මෝබියස් යෝගන්සන්ගේ පස්සෙන් ගිහිං එයාට අනතුරක් වෙයි කියලා. මේ නිසාම ස්පයිඩර්-මෑන්ට සිද්දවුනා යෝගන්සන්ව හොයාගෙන එයාව ආරක්‍ෂිත තැනකට අරගෙන යන්න. ඒත් පත්තරවල මේ ගැන සිරස්තල විදිහට යන්නේ ‘ස්පයිඩර්-මෑන් විද්‍යාඥයින් පැහැර ගනියි’ කියලා. මේ ගැන පත්තරෙන් දකින හෑන්ස් යෝගන්සන්ගේ පරණ සහයක චාල්ස් සේව්යර් ස්පයිඩර්-මෑන්ව හොයාගෙන එක්ස්-මෙන්ලව යැව්වම එයාට දැනගන්න ලැබෙනවා මේ පැහැර ගැනීම් වලට ඇත්තටම වගකිව යුත්තා මෝබියස් කියලා. එතනදී එක්ස්-මෙන්ලා කිහිප දෙනෙක්වම මෝබියස් පරාද කලත් අවසානෙදි එක්ස්-මෙන්ලව හැකියාව ලැබෙනවා මෝබියස්ව පරාද කරන්න.

Marvel Team-Up

මෝබියස් කියන්නෙ ඇත්තටම වැම්පයර් කෙනෙක් නිසා Marvel Team-Up කොමික් කලාපයේ තුන්වන මුද්‍රණය වෙද්දී මයිකල් මෝබියස් නියම වැම්පයර් කෙනෙක් වගෙ ලේ උරා බොමින් තවත් වැම්පයර්ලා නිර්මාණය කරලා තියෙනවා.

Legion of Monsters

ස්ටාර්සීඩ් ගැන විමර්ශණය කරන්න මෝබියස් Legion of Monsters කණ්ඩායමට එකතු වෙලා තියෙනවා. ඒත් ස්ටාර්සීඩ් දැක්කයින් පස්සේ මෝබියස්ටත්, වෙයර්වුල්ෆ්ටත් එයාලගේ අති විශාල බඩගින්න පාලනය කරගන්න බැරිව ස්ටාර්සීඩ්ට පහර දෙද්දී ගෝස්ට් රයිඩර්, මෑන්-තින්ග් එකතුවෙලා මේ දෙන්නව නවත්තන්න හැදුවත් මෑන්-තින්ග්ගේ බය මැඩපවත්වන්න බැරිව වගේම ඇතිවුන පිළිස්සුම් තුවාල වලින් ස්ටාර්සීඩ් මිය ගිහිල්ලා තියෙනවා.

Civil War

මෝබියස් SHRA එහෙමත් නැත්තම් Superhuman Registration Act කියන ඇමරිකානු රජය යටතේ සුපිරි හැකියාවන් තියෙන අයව ලියාපදිංචි කිරීමකින් පස්සේ, වැම්පයර්ලව දඩයම් කරන බ්ලේඩ් පස්සෙන් යවලා තියෙනවා ඇවිත් SHRA යටතේ ලියාපදිංචි වෙන්න කියලා ඒත්තු ගන්වන්න. බ්ලේඩ් කියන්නෙ වැම්පයර්ලව දඩයම් කරන කෙනෙක් නිසා මෝබියස් එයත් එක්කත් සටනක් දෙන්න සිද්දවෙලා තියෙනවා. ඒත් මෝබියස්ගේ තත්වය තේරුම් ගත්තට පස්සේ බ්ලේඩ් එයාව අතහැරලා දානවා.

 

ශක්තින්

  1. සුපර්හියුමන් කෙනෙකුගෙ ශක්තිය – සුපර්හියුමන් කෙනෙකුට ලැබෙන්න පුලුවන් ශක්තිය ප්‍රධාන වශයෙන් මෝබියස්ටත් ලැබෙනවා. නමුත් තමන් උරා බොන ලේ ප්‍රමාණය මත මේ ශක්තිය රදා පවතිනවා. කොහොම නමුත් මෝබියස්ට රාත්තල් 1500ක තරම් බරක් වුනත් එසවීමේ හැකියාව තියෙනවා.
  2. සුපර්හියුමන් කෙනෙකුගෙ වේගය – සාමාන්‍ය වේගයට එහා ගිය, අතිදක්ෂ ඔලිම්පික් ක්‍රීඩකයෙකු වගෙ වේගයක් මෝබියස් සතු වෙනවා.
  3. සුපර්හියුමන් කෙනෙකුගෙ කඩිසර බව -සාමාන්‍ය මිනිසෙකුට එහා ගිය කඩිසර බව, සමබරතාව මනාව හැසිරවීමේ හැකියාව මෝබියස් සතුව පවතිනවා. මීට අමතරව අතිදක්ෂ ඔලිම්පික් ක්‍රීඩකයෙකු වගෙ ඉබේ සිදු කරන ක්‍රියාවන් ක්ෂණිකව කරන්න මෝබියස්ට හැකියාව පවතිනවා.
  4. සුපර්හියුමන් කෙනෙකුගෙ සවිබලය -සාමාන්‍ය මිනිසෙකුට වඩා කායික ක්‍රියාකාරකම් වලදී ෆැට්ජීන් ටෝක්සික් නිපදවන්න මෝබියස්ට හැකියාවක් තියෙනවා. ඒ තමන්ගෙ රුධිරයේ ෆැට්ජීන් ටෝක්සික් නිසා හානියට ලක් කරන්න පැය ගණනකට පෙර කායික මට්ටම ඉහලින් තියාගන්න හැකියාව තියෙනවා.
  5. සුව වීමේ හැකියාව – සැබෑම වැම්පයර් කෙනෙකුගේ වගේම මෝබියස්ටත් ලැබිලා තියෙනවා ක්ෂණිකවම සුව වීමේ හැකියාවත්. වෙඩි වැදීම්, පහර දීම්, පිළිස්සුම් තුවාල ඇති වුනොත් පැය හෝ විනාඩි කිහිපයක් ඇතුලත සුව වීමේ හැකියාව ලැබිලා තියෙනවා.
  6. ඉහල මට්ටමේ සංවේදක– සාමාන්‍ය මිනිසෙකුට වඩා වර්ධනය වූ සංවේදන හැකියාවක් පවතින්නෙ ඈත තිබෙන වස්තුන් ලෙහෙසියෙන්ම හදුනා ගන්නත්, හොද ගද/සුවද දැනීමේ හැකියාවක් එක්කයි. මීට අමතරව විද්‍යුත් චුම්බක වර්ණාවලියක අධෝරක්ත කිරණ හරහා පෙනීමේ හැකියාව, අදුරේදී පවා පහසුවෙන් ඇසීමත් හා පෙනීමත්, පුද්ගලයින් එකිනෙකාගේ ශරීර උෂ්නත්වය පිටවීම පෙනීම, හැතැක්ම ගානනක් එහායින් තියෙන රුධිරය ඉව කිරීමේ හැකියාව මෝබියස්ට පවතිනවා.
  7. උල් දත් හා නියපොතු – සාමාන්‍ය වැම්පයර් කෙනෙකුට පිහිටන කටේ උල් දත් දෙකක් වගේම දෑත්වල දිගැටි, තියුණු නියපොතු පිහිටලා තියෙනවා. උල් දත් වලින් ලේ උරා බොනවා වගේම මේවා පහර දෙන ක්‍රමයක් විදිහට පාවිච්චි කරන්න පුලුවන් වගේම මිනිහෙකු බොහොම ලේසියෙන් හානියට ලක් කරන්න එයාගේ නියුණු නියපොතු වලට පුලුවන්.
  8. පියාසර කිරීමේ හැකියාව – වවුලෙකට සමාන ශරීරයක් මෝබියස්ගෙ හැඩ ගැහුණම එයාගේ කන් විතරක් නෙවෙයි අස්ථි පද්ධතියම වෙනස් වුන නිසාම එයාට හැකියාව ලැබෙනවා වවුලෙක් වගෙ පියාසර කරන හැකියාව ලබාගන්න. පුංචි හිඩැසකින් වුනත් එයාට බොහොම ලේසියෙන්ම පියාසර කරලා යන්න පුලුවන්.
  9. වර්ගයාබිහි කිරීම – සාමාන්‍ය වැම්පයර් කෙනෙකු තව තවත් වැම්පයර්ලා බිහි කරනවා වගේම මෝබියස්ගේ ලේ උරා බීමෙන් එයා වගේම තවත් අයව බිහි කරන්නත් ඒ බිහි කරන අයව මානසිකව පාලනය කරන්නත් එයාට පුලුවන්කම මෝබියස්ට තියෙනවා.
  10. අමරණීයත්වය – තමන්ගෙ රෝගී තත්වයට ප්‍රතිකාර හොයපු මෝබියස්ට පුලුවන් වෙනවා වයසට යන්නෙ නැතුව අමරණියව තමන්ගෙ ජිවිතේ පවත්වා ගන්න.

දුර්වලතා 

  1. සාමාන්‍ය වැම්පයර්ලා වගේම එයාට කායිකව මෙන්ම මානසිකවත් ශක්තිමත්ව ඉන්න නම් නැවුම් රුධිරය බොන්න සිද්දවෙනවා. එහෙම නොබී ඉන්න තාක් මෝබියස් දුර්වල වෙන වේගයද වැඩි වෙලා කිසිම පාලනයක් නැතුව යන තත්වයක් ඇති වෙනවා.
  2. හිරු එළියෙන් අළු වෙලා නොගියත් හිරු එලියට මෝබියස් නිරාවරණය වෙද්දී එයාගේ ඇස් සහ සම සංවේදී වෙන්න පටන් ගන්නවා.
  3. බඩගින්නෙ, ලේ බොමින් ගියෙ නැති වුනොත් තමන් මැරිලා යන්න පුලුවන් විදි ගැන ව්‍යාජ සිදුවීම් හිතේ ඇති කරලා මානසිකව අස්ථායි වීමක් මෝබියස්ට ඇති කරනවා.

හමුවෙමු තවත් මේ වගේම ලිපියකින්!!

One thought on “Morbius, the Living Vampire | මෝබියස් හැදින්වීම

  • May 16, 2022 at 7:43 PM
    Permalink

    maru

Leave a Reply

Your email address will not be published.

error: Content is protected !!