ඉදිරි දිගහැරුම… (XXXI) | TWIB2: Angel of Death – මරණයේ දූතිය!

2012 වර්ෂයේ තිරගත වුණ ‘The Woman in Black‘ චිත්‍රපටිය ලෝකයේම අවධානයට නතු වෙච්ච ප්‍රබලතම කරුණ වුණේ, Harry Potter‘ගේ වෙනත් මුහුණුවරක් දැකගන්නට ලැබීම. Harry Potter‘ගේ වෙනත් මුහුණුවරක් කියලා කිව්වට මේ කිව්වෙ ඒ චරිතය ගැන නොවෙයි කියලා කවුරුත් දන්නවා. මේ කිව්වෙ Harry Potter‘ට පණ දුන් නළුවා; Daniel Radcliffe ගැනයි. Harry Potter චරිතයෙන් බැහැරව ඔහුගේ ප්‍රථම සිනෙ රංගනය ඇතුළත් වූ සිනෙපටය නිසා ලොවක නොමඳ අවධානය මේ කෙරෙහි හිමි වුණා. එනිසාවෙන්මද දන්නෙත් නෑ මෙය අති ඉහළ සාර්ථකත්වයක් හිමි කරගනිමින් තිරගත වුණා. හරියටම කිව්වොත් චිත්‍රපටියේ වියදම වගේ අට ගුණයකට කිට්‍ටු ආදායමක් උපයාදෙමින් $ 130m ක් ලොව වටා ‍රැස් කළා.

මෙය බ්‍රිතාන්‍ය සිනමාවෙන් නිර්මාණය වූ චිත්‍රපටියක්. අර කිවූ පුදුමාකාර ලාභ ඉපයීම නිසා ඔන්න මෙහි තව චිත්‍රපටියකුත් තනන්නට නිෂ්පාදනා’යතනය තීරණය කරලා. ආරංචියේ හැටියට දැනටමත් මේ සඳහා ප්‍රධාන නළු-නිළි යුවල ‍තෝරාගෙන අවසන්. Jeremy Irvine (war Horse) ප්‍රධාන පිරිමි චරිතයට සහ Phoebe Fox (Black Mirror) ප්‍රධාන ගැහැණු චරිතය සඳහා ‍තෝරා ගෙන අවසන් බවට මෙහි නිෂ්පාදන සමාගම වන, Hammer Films ආයතනය නිවේදනය කරලා දැන් ටිකක් කලකුත් වුණා.

මෙහි කතාවත් The Woman in Black නවකතාව රචනා කළ Susan Hill‘ගේම තවත් පොතක් ඇසුරු කරගෙන ගොඩනැගීමට පවරලා තියෙන්නේ Jon Croker නමැති තිරරචකයා හට. ඒ අතරේ Tom Harper මෙහි අධ්‍යක්ෂණයෙන් එක්වනු ඇතැයි සඳහන්. මේ ප්‍රධාන නළු-නිළි දෙපළම එතරම් ප්‍රසිද්ධ හෝ ජනප්‍රිය අය නොවෙයි. ඒ වුණත් ඔවුන් තමන්ගේ රංගන හැකියාව සනාථ කළ; මෙහි චරිත සඳහා මනා සාධාරණයක් ඉ‍ටු කළ හැකි දක්ෂතාවන්ගෙන් යුතු අයවළුන් බවයි නිෂ්පාදන සමාගමේ තීරණය. මේ සදහා ඇතැම් විට යළි වරක් Dan එක්වන්නට ඉඩ ඇතැයි යන්නත් හෙළි කර තිබෙනවා. බොහෝ දුරට මෙවර ඔහුගේ චරිතය මේ යුග දෙකක සිදුවීම් යා වෙන අයුරු හෙළි කිරීමට පමණක් සීමාවේවි.

The Woman in Black: Angel of Death ලෙස නම් කර ඇති මෙම චිත්‍රපටයෙහි අඩංගු වන්නේ පළමු චිත්‍රපටියෙහි සිදුවීම් පෙළින් වසර 40කට පසු ඇති වන සිදුවීම් දාමයක් වටා ගොඩනැගෙන කතාවක්. II ලෝක යුධ සමයෙහි යුද්ධයෙන් අනාථ බවට පැමිණි කුඩා දරුවන් පිරිසකට ‍රැකවරණය සපයන තරුණ යුවළක් සිටිනවා. ඔවුනට මේ දරුවන් ‍රැකබලාගන්නට ලැබෙන සෙවණ ගැන ඇසුවොත් ඔබේ ඇඟ හිරිවැටී යාවි. සත්තකින්ම, වසර 40ක දිගු නිහඬතාවයක ගැළී සිටින Eal Marsh Estate‘හි නොනිදන ආත්මයේ අඳුරටයි ඔවුන් පිවිසෙන්නට යන්නේ…

මෙය අප කලින් දු‍ටු චිත්‍රපටයට වඩා වෙනස් විදිහේ ආකර්ෂණයකින් සහ ගළායෑමකින් යුතුව නිර්මාණය කරන්නට තිරරචක සහ අධ්‍යක්ෂක දෙපළගේ අවධානය යොමු වෙලා තියෙන බවයි කියවෙන්නේ. ගියවර දු‍ටුවාට වඩා සහමුලින්ම වෙනස් විදිහක කතාරසයක් එක්ක පැරණි, නිදි නොගත් ආත්මය යළි අවදි කරවමින් තැනෙන අනුබැදියක් වෙනුවෙනුයි ඔවුනගේ වෑයම!

තිරයට එන දිනය: නිශ්චය කර නොමැත.

උදා