X-Men: Days of Future Past (2014)

සුපිරි චිත්‍රපටිවල ඉදිරි දිගහැරුම… (XIII)

අපි කොයි කවුරුත් දන්නා ජානමය වශයෙන් වෙනසකට ලක්වූ විශේෂිත හැකියාවෙන්ගෙන් යුතු මිනිස් පරපුරක් ගැන කියැවෙන X-Men චිත්‍ර කතා පෙළ Marvel Comics‘ලාගේ වුණත්, දැනට නිර්මාණ අයිතිය තිබෙන්නේ Fox සමාගමට. ඉතින් ‘The Avengers (2012)’ සමූහවීර චිත්‍රපටය ලද සාර්ථකත්වය දු‍ටුවාම Fox සමාගමට නිකම් බලාගෙන ඉන්ඩ බැරි තත්ත්වයක් උදාවෙලා. ‘Dredd (2012)’ චිත්‍රපටය අසාර්ථකවීමත් සමග Fox සතුව තිබූ Marvel පංගුවෙන් කොටසක් ආපහු මුල් අයිතිකාරයන්ට හිමිවුණා. ඒක නිසා ඉතුරු ටිකේ වලංගුභාවයත් නැතිවෙලා කල් පැන යන්ඩ මත්තෙන්, තමන්ට යමක් කරගන්ඩ ඕනෙ කියලා Fox සමාගම තීරණය කරලා.

මීට පෙර හැමතිස්සෙම Fox‘ලා X-Men චිත්‍රපටි දෙකක් අතර වසර තුනක අවම පරතරයක් තබා ගත්තා. නමුත් ඔන්න මේ පාර, 2013 දී Wolverine ඒකල චිත්‍රපටිය එනකොට, 2014 දී සමූහ චිත්‍රපටිය එළියට දාන්ඩ ඔවුන් සැලසුම් කරලා. 2000 වර්ෂයේදී ඇරඹි මේ X-Men සිනෙරූ පෙළහරට වසර 14ක් ගත වෙනකොට කලින් පවත්වාගත් වසර 03 පරතරය වසරකට අඩු කරන්නේ පිළිවෙළින් අඩු කරගෙන ඇවිදිනුයි. කියැවෙන විදිහට මේ අලුත්ම සමූහ චිත්‍රපටිය එක අතකින් බලපුවාම 2006 දී ආ X-Men: The Last Stand එකට හා 2011 දී ආ X-Men: First Class එකට සම්බන්ධයි. ඒ කියන්නේ එහි අනුබැඳියක් හා සමයි. තවත් අතකින් මේ අලුත් චිත්‍රපටිය ගැන කියවෙන්නේ මෙන්න මේ විදිහටයි. මේක හරියට මුළු X-Men සිනෙරූ පෙළහරටම හැදෙන අනුබැඳියක් වගේලු. එහෙම කියන්නේ මෙතෙක් ආපු සියලු චිත්‍රපටි එකට ගොනු කරවන නැතිනම් ගොනු වෙන හැටි; ගැන කතාවක් මේකේ අඩංගු වන නිසා කියල තමා දැනගන්ඩ තියෙන්නේ.

‘X-Men (2000)’/ ‘X2 (2003)’ නිර්මාණය කරමින් මේ සිනෙ පෙළට සාර්ථක ආරම්භයක් ලබා දුන්, Bryan Singer තමයි මෙවර මේකේ නිර්මාණකාර්යය භාරව ඉන්නේ. ඔහුගේ අදහසට අනුව කතාව ලියැවෙන්නේ Simon Kinberg, Matthew Vaughn, Jane Goldman කියන තෙපළ අතිනුයි. මීට පාදක කරගන්නා නැතිනම් සටහනක් ලෙස යොදාගන්නා චිත්‍රකතාව Chris Claremont/ John Byrne කියන දෙපළගේ රචනාවක්. X-Men: First Class වෙනුවෙන් එක්වූ නළු-නිළියන් වැඩි පිරිසක් මේ සඳහා එක්වන්නට යන බව දැනටම තහවුරු කරලා. එහෙම නැතිව බැහැනේ මේකේ රූගතකටයුතු පහුගිය අප්‍රේල් මාසෙදි කැනඩාවෙ, මොන්ට්‍රියල් හිදී ආරම්භ වුණා.

මෙම කතාවට දී ඇති නම X-Men: Days of Future Past. නමින්ම කියැවෙන පරිදි මෙය අතීතය වර්තමානය ගැටගැසුණු කතාවක්. 1970 අවදියේදී X-Menවරුන්ට මිනිසුන්ගෙන් එල්ල වූ තර්ජන හේතුවෙන් අද වන විට ඔවුන් බරපතළ අර්බුදයකට පත්වෙලා ඉන්නේ. දැන් ඔවුන් දිවිගෙවන්නේ හුරුකිරීම් කඳවුරුවල හිරගතවෙලා. ඒ හැරෙන්නට මේ වෙද්දී Professor X ගේ මූලිකත්වය යටතේ සියල්ලන් පෙළ ගැසී සිටින තත්ත්වයකුත් උදාවී තිබෙන්නට පුළුවන් කියා අනුමාන කෙරෙනවා, ඔහු දැන් හිස්ආවරණයක් නොපළඳින නිසා…

1970 පසුබිම් කරගනිමින් දිවෙන කතාව තුළ, අර එදා සිදු වූ වරද නිවැරදි කරගන්නට අද; අතීතය වෙනස් කරන්නට දරන තැතක් ගැනලු කතාව ගොඩනැගෙන්නේ. ඒ කියන්නේ තරුණ අය වගේම මහළු අයත් අපට දැකගත හැකිවේවි මේ ඔස්සේ. එනිසා පැහැදිලිවම මෙය දැවැන්ත නිර්මාණකාර්යයක් බවනම් නිසැකයි. ඒ හැරෙන්නට ‘Avatar (2009)’ ආශ්‍රයෙන් ලොව හඳුනාගත් රූගැළපුම් තාක්ෂණය සහ ත්‍රිමාන තාක්ෂණය රූගත කිරීම්වලට යොදාගන්නට යන බව අධ්‍යක්ෂක Bryan Singer හෙළිදරව් කරලා තියෙනවා. මෙහි වැඩ කටයුතු මාස 16ක කලක් තුළ සම්පූර්ණයෙන්ම නිම කිරීමට සැලසුම්ගතව තිබෙනවා.

තිරයට එන දිනය: 2014 ජුලි 18

උදා