Man of Steel vs Brightburn | සුපර්මෑන් චරිතය අනුකරණයෙන් බිහි වූ අති දුෂ්ට චරිතය.

අද කතා කරන්න ලැස්ති වෙන්නෙ Brightburn සිනමාපටය නිකුත් වෙනවත් එක්කම මේ ලෝකේ පුරාවටම ඉන්න ප්‍රේක්ෂකයන් කතා වෙච්ච දෙයක් වගේම, ලගදීම බයිස්කෝප් සිංහලෙන් වෙබ්අඩවිය හරහා උපසිරැසි ලබාදෙන මේ චිත්‍රපටය බලන්න ඉන්න ඔයාලා වෙනුවෙන්. මේ සිනමාපටය බජට් එකක් වුනාට මොකද විශේෂයෙක් තිබුනා. ඒ මොකද කියනවනම් Brightburn සිනමාපටය නිර්මාණය කරලා තිබුනේ සුපර්මෑන් නපුරු පැත්තට පෙළඹුනොත් මොන වගේ තත්වයක් උදා වෙයිද කියන සංකල්පය මතයි. මං දන්නවා මේ වෙද්දී ඇනිමේෂන් චිත්‍රපට බලලා තියෙන කෙනෙක් නම් දන්නවා ඇති වගේම දැකලා ඇති බ්ලැක් සුපර්මෑන් මොන විදිහෙ කෙනෙක්ද කියලා. කොමික් කියවපු කෙනෙක් නම් දන්නවා ඇති සුපර්මෑන්ව නපුරට පෙළඹෙෙව්වොත් එයා මොන වගේ චරිතයක් බවට වෙනස් වෙයිද කියලත්. ඒත් කුඩාකල ඉදන්ම නපුරු චරිතයක් වුනොත්? අන්න ඒ ගැන තමයි මේ කතා කරන්න හදන්නෙ.

එතකොට මේක මාවල් හො ඩීසි සිනමාපටයක්ද?

නැහැ. මේක මාවල්/ඩීසි සිනමාපටයක් හො යුනිවර්ස් වලින් වෙනමම නිර්මාණය වෙච්ච යුනිවර්ස් එකක සිනමාපටයක්වත් නෙවෙයි. දැනට Brightburn සිනමාපටය සලකන්නෙ එහෙමයි. මොකද මේක SONY සමාගම යටතෙ බිහි වුණු සිනමාපටයක්. දැනට DC Comics වල චරිත අයිතිය තාමත් තියෙන්නෙ වෝනර් බ්‍රදර්ස්ලට. ඉතින් එයාලට චරිත අයිතිය තියෙද්දී තව කාටවත් බැහැ කොමික් සිනමාපට නිර්මාණය කරන්න. ඒත් මේක ඇතුලෙ තියෙන විශේෂත්වය ගැන කියනවනම් Brightburn සිනමාපටය නිර්මාණය වෙලා තියෙන්නේ කොමික් වර්ග කිහිපයක එකතුවෙන් කියලා සලන්න පුලුවන්. ඒ මොනාද කියනවනම්,

• Image Comics

2015 පෙබරවාරි 04 වැනිදා Image Comics යටතේ “Nameless” කියලා චිත්‍රකතා නිකුත්වෙලා තියෙනවා. මෙහි නිර්මාණ කටයුතු සිදු කරලා තියෙන්නෙ ග්‍රෑන්ට් මොරිසන් විසින්. විශේෂයෙන්ම කියන්න ඕන 2015 වසරේ නිකුත් වූ භයංකරම කොමික් කලාපය වෙන තරමටම මේක ජනප්‍රියත්වයට පත්වෙලා තියෙනවා. මේ කොමික් කලාපය ඇතුලෙ තිබිලා නිර්නාමික සංකේතයක් දකින්න ලැබෙනවා හරියටම ජේම්ස් ගන් Brightburn සිනමාපටය සදහා යොදාගත්ත සංකේතයට සමාන එකක්ම. ඉතින් Brightburn සිනමාපටය ගොඩනගන්න මේ සංකේතය Image Comics වලින් උපුටාගන්න ඇතියි කියලා සලකන්න පුලුවන්.

 

• DC Comics

DC House of Horror

DC Comics යටතෙ 2007 දී නිකුත් වෙච්ච හැලොවින් සදහාම වෙන් වූ විශේෂ කොමික් සීරීස් එකේම අලුත් එක තමයි DC House of Horror කියන්නෙ. 2017 ඔක්තෝබර් 25’වැනිදා තමයි මේ චිත්‍රකතාව නිකුත් වෙන්නෙ එකම එක කොමික් කලාපයකින් සමන්විත වෙන විදිහට. Keith Giffen තමයි කතාව ලියලා තියෙන්නෙ. මේ කොමික් කලාපයේ “Bump in the Night”කොටස තුලින් දැකගන්න ලැබෙනවා කැන්සාස්වල පිහිටි ස්මෝල්විල් වලට ක්‍රිප්ටෝනියන් යානයකින් එන කැල්-එල්ව, නමුත් පෙනුමෙන් හුගක් ලාබාල බවක් පේන්න තියෙන කෙනෙක්ගෙ ආගමනයක් ගැන. එයාගෙත් එල් වංශයේ සංකේතය රතු පාටින් පපුවේ සටහන් වෙලා තියෙනවා. පෘතුවියට එන කැල්-එල් පුංචි කාලෙ ඉදලම සුපිරි දුෂ්ට චරිතයක් වුනොත් මොකද වෙන්නෙ කියන සංකල්පය මේ කලාපය තුලින් ඉස්මතු වෙනවා. හරියටම කියනවනම් ජේම්ස් ගන්ගෙ Brightburn සිනමාපටයෙ ඉන්න බ්‍රැන්ඩන්ට සමාන කෙනෙක්වමයි DC House of Horror කලාපයේ “Bump in the Night” කොටසින් දැකගන්න ලැබුනෙත්. ඉතින් ජේම්ස් ගන් මේකෙනුත් උපුටාගන්න ඇතියි කියලා මෙතැනදීත් උපකල්පනය කරන්න පුලුවන්.

Superman: The Dark Side

උඩ සදහන් කරලා තියෙන දෙකට අමතරව DC Comics යටතෙ Elseworlds 1998 දී අගෝස්තු ඉදන් ඔක්තෝබර් දක්වා කලාප තුනක් යටතෙ John Francis Moore විසින් කතාව ලියු නිකුත් වෙච්ච Superman: The Dark Side කොමික් එකතුව Brightburn සිනමාපටයට උදව්වක් වෙන්න ඇති කියලා හිතන්න පුලුවන්. මොකද මේ කලාපය තුලින් කියන්න හදලා තියෙන්නෙ කැල්-එල් ක්‍රිප්ටෝන් ඉදලා එද්දී එයාගෙ යානය පෘතුවියට නැතුව ඇපොකලිප්ස් වලට ගොඩ බෑවොත් මොන විදිහේ භයංකර චරිතයක් වෙයිද කියන එකයි. මෙතනදීත් සුපුරුදු පරිදි සුපර්මෑන්ගේ අදුරු භයංකාර පැතිකඩ ඉස්මතු වෙලා පෙන්නනවා.

• E.V.I.L. Heroes Digital Comics

මීට අමතරව තවත් කලාප කිහිපයකින් නිර්මාණය වෙච්ච E.V.I.L. Heroes Digital Comics චිත්‍රකතා වලින් පවා ජේම්ස් ගන් Brightburn සිනමාපටයට උපුටා ගන්න ඇතියි කියලා සලකන්න පුලුවන්. මොකද මේවයෙ සදහන් වෙන්නෙ පෘතුවියට එන සුපිරි වීරයන් සැළකෙන්නේ මනුස්ස වර්ගයා අතර ජීවත්වන දෙවියන් විදිහටයි. සුපිරි වීරයින් මිනිස්සුන්ව ආරක්ෂා කලා කියපු හැම කතාවක්ම බොරුවක් කියලා පෙන්නුම් කරපු, විශේෂයෙන්ම සුපිරි වීරයන් විදිහට සැලකෙන මේ චරිත මිනිස්සුන්ට වහල්ලුන්ට වගෙ සලකලා තියෙන්නෙ. Brightburn සිනමාපටය බැලුවා නම් තේරෙනවා ඇතිනේ ඒක ඇතුලෙ ඉන්න බ්‍රැන්ඩන්ට කරලා තියෙන්නෙත් මේ හා සමාන දෙයක් කියලා. මොකද එයාට ඕන වුනෙත් මොන දේ කරලා හරි මේ ලෝකේ පාලනය කරන්නයි.

තේරුණ විදිහට නම් ඔය ටික තමයි සමබර කරලා Brightburn සිනමාපටය හරහා කියන්න හදලා තියෙන්නෙ. ඒත් බැලූ බැල්මට මේක Zack Snyder අධ්‍යක්ෂණය යටතෙ බිහි වෙච්ච Man of Steel සිනමාපටයෙ නැවත නිර්මාණය කරපු එකක් වගෙමයි. මොකද අපිට MoS සිනමාපටය තුලින් දකින්න ලැබුණු සිදුවීම් සෑහෙන දුරකට Brightburn සිනමාපටය තුලින් දැකගන්න ලැබෙනවා. ඒ මොනාද දැන් කියලා දැන් කතා කරමු එහෙමනම්.

 

ආගමනය

• Man of Steel

සුපර්මෑන් ඉපදුනු ග්‍රහලෝකය තමයි ක්‍රිප්ටෝන් කියන්නෙ. එයාගෙ ඇත්තම දෙමව්පියන් දෙපල වුණේ ජෝර්-එල් වගේම ලාරා කියන ක්‍රිප්ටෝනියන් වැසියන් දෙන්නා. ක්‍රිප්ටෝන් ග්‍රහලෝකයෙ විනාශ වෙලා යන්න කලින් කැල් එල් එහෙමත් නැත්තම් සුපර්මෑන්ගේ දෙමව්පියන් දෙන්නා එයාව පුංචි යානයකට දාලා පෘතුවියට එව්වා. මේ සිදුවීම් පෙළ මතක ඇති කියලා හිතනවා. මතක නැත්තම් දැම්මම MoS බලන්න. එයා ආව ක්‍රිප්ටෝන් පෝඩ් එක ගොඩබාලා තිබුනේ පෘතුවියෙ ස්මෝල්විල් කියන ටවුමේ පාරම්පරිකව පවත්වාගෙන ගියපු ගොවිපලක ජෝඩුවක් පදිංචි වෙලා හිටිය තැනකටයි. ඉතින් පෘතුවියට යානයකින් ආව කැල් එල්ව බලාගත්තෙ එහෙ ජීවත් වුනු ජොනතන් කෙන්ට් වගේම මාර්තා කෙන්ට් කියන පෘතුවි වැසියන් දෙදෙනා.

• Brightburn

කලින් සුපර්මෑන්ගේ වගේ උපන් ග්‍රහලෝකයක් හෝ ඇත්තම දෙමව්පියන් කවුද කියලා නම් බ්‍රයිට්බර්න් මුල් සිනමාපටය හරහා දැකගන්න අවස්තාවක් ලැබුනේ නැහැ. හැබැයි එයා ආවෙත් සුපර්මෑන් පෘතුවියට ආව විදිහෙම යානයකින් කෑන්සාස්වල පිහිටලා තියෙන බ්‍රයිට්බර්න් කියන ටවුමේ “බ්‍රේයර්” කියන ගොවිපලට පොඩ්ඩක් එහාට වෙන්න තියෙන කැලැබද කොටසකටයි. ඉතින් මෙහෙ පදිංචි වෙලා ඉන්නෙ ටෝරි බ්‍රේයර් වගේම කයිල් බ්‍රේයර් කියන දරුවන් නැති ජෝඩුවක්. බ්‍රයිට්බර්න් වලට එන යානයේ ඉදලා එලියට ගන්න පිටසක්වල ජීවී බබාව හදාවඩාගන්න ඕන කියලා ළමයි නැති බ්‍රේයර් ජෝඩුව තීරණය කරනවා. ඉතින් යානයේ හිටිය බබාට තමයි මේ දෙන්නා බ්‍රැන්ඩන් බ්‍රේයර් කියලා නම තියන්නෙ. 

කොටින්ම මේ යානාවන් දෙකම එක සමාන පෙනුමක් තියෙන්නෙ. විශේෂයෙන්ම යානයේ යටි පෙදෙස තනිකරම එක සමානයි. පහල තියෙන රූප දැක්කම ඒ ගැන තේරුම් ගන්න පුලුවන්. 

ඊටපස්සෙ MoS චිත්‍රපටයෙ කැල්ගේ යානාව තැන්පත් කරලා තියෙන්නෙ එයාලගේ ගොවිපල ඇතුලෙ තියෙන ලී ආවරණයක් සහිත පහල මහලකයි. ඔය ටිකම ඒ විදිහට Brightburn තුලිනුත් දැකගන්න ලැබෙනවා. වෙනසකට තියෙන්නෙ අගුලු දාන්න පාවිච්චි කරලා තියෙන විදිහ විතරයි.

 

ළමා කාලය

• Man of Steel

ක්ලාක් කෙන්ට් (සුපර්මෑන්) පුංචි කාලෙදි ඉස්කෝලේ ගිය කාලෙදී පන්තියේ පාඩම් කියාදෙන ගමන් ඉද්දි වතාවක් එයාගෙ හැකියාවන් මතු වෙන්න ගන්නවා. ඒ එක්ස්-රේ විෂන්වල එක්තරා විදිහක ආරම්භයක් විදිහට. මේ දේවල් එක්කලා පුංචි ක්ලාක් සැහෙන අරගලයක් කලා මේ දේවල් අහකට කරලා තියාගන්න. එයාගෙ පංතියේ හිටිය ළමයි ගැන කියනවනම් යම්තාක් දුරකට එයාගෙ පංතියේ හිටිය පිරිමි ළමයි එයාට අඩම්තේට්ටම් කලා අනවශ්‍ය විහිලුත් එක්කම. ඒ වගේම ක්ලාක් කියන්නේ අහිංසක කෙනෙක් විදිහට දැකපු එයාගෙම පංතියේ ගෑනු ළමයෙක් හිටියා ලානා කියලා. අනික් පිරිමි ළමයි ක්ලාක්ව විහිළුවට ගන්න හදපු වෙලාවල් වලට ලානා ඒ වෙනුවෙන් කතා කරලා ක්ලාක්ව ආරක්ෂා කරන්න හදලා තියෙනවා.

• Brightburn

මේකෙදි බ්‍රැන්ඩන්ටත් මීට සමාන දෙයක්මයි වෙන්නෙ. බ්‍රැන්ඩන් කියන්නේ පිටසක්වල ජීවී වැසියෙක්නෙ ඉතින් සාමාන්‍ය පෘතුවි වැසියන්ට වඩා එයාට තියෙන දැනුම් මට්ටම වගේම මතක ශක්තිය වැඩියි. තමන්ගේ පන්තියේ උගන්වන ගමන් ඉන්න වෙලාවට බ්‍රැන්ඩන් හුගක් වෙලාවට කලේ කුරුටු ගාපු එක. හැබැයි අවධානය වෙන තැනක තිබුනත් උගන්වමින් හිටිය පාඩමේ අහපු ප්‍රශ්නයකට පවා හුගක් සාර්ථක විදිහට බ්‍රැන්ඩන්ට පිළිතුරු දෙන්න හැකියාව තිබුනා. මේ එක්කලා එයාගෙ පංතියේ හිටිය පිරිමි ළමයි එයාට විහිළු කලා. හැබැයි ක්ලාක් ගැන හොයලා බලන්න ගෑනු ළමයෙක් හිටියා වගේම බ්‍රැන්ඩන් වෙනුවෙනුත් කේට්ලින් කියලා කෙනෙක් හිටියා. එයත් හිතුවේ නම් බ්‍රැන්ඩන් කියන්නෙ හොද කෙනකේ කියලා. 

බලයන් හදුනා ගැනීම

• Man of Steel

පුංචි ක්ලාක් මුලින්ම තමන්ගේ බලයන් හදුනාගත්තෙ ඉස්කෝලේ පංතියේ පාඩමක් කියාදෙමින් හිටිය වෙලාවක කියලා මම කිව්වනේ. එක්ස් රේ විෂන් විදිහට මුලින්ම හදුනාගත්තාට පස්සෙ ක්ලාක්ට දෙවෙනි වතාවට එයාගෙ බලයන් හදුනාගන්න ලැබෙන්නෙ එයා ඇතුළු එයාගෙ පංතියේ ළමයි ගමන් කරමින් තිබ්බ ඉස්කෝලේ බස් එක පාලම කඩාගෙන වතුරට වැටිලා බස් එක ගිලෙමින් තිබ්බ වෙලාවක වතුරට බැහැලා කිසිම කෙනෙක්ට හානියක් නොවෙන්න බස් එක ගොඩට අරගෙනයි. මෙතනින් තමයි ක්ලාක්ගේ දරාගැනීමේ හැකියාව/ශක්තිය මුලින්ම දකින්න ලැබෙන්නෙ. මේ සිද්දියෙන් පස්සෙ එදා බස් එකේ හිටිය පීට්, ක්ලාක් කරපු දේවල් දැකලා එයාගෙ අම්මත් එක්ක ක්ලාක්ගේ ගෙදර ගිහින් මේ දේවල් ක්ලාක්ගේ දෙමව්පියන්ට පවා කිව්වා. පස්සෙ ජොනතන් ක්ලාක්ට අවවාද කලා එයා මොන වගේ කෙනෙක්ද, නැත්තම් එයාට කරන්න පුලුවන් මොනාද කියලා පිට අයට දැනගන්න තියන්න එපා තමන්ගේ බලයන් යටපත් කරන් ඉන්න කියලා. 

• Brightburn

බ්‍රැන්ඩන්ට එයාගෙ හැකියාවන් මතු වෙන්නේ හරිම අමුතු ගුප්ත විදිහකටයි. තණකොළ කපන මැෂින් එකේ දැති වලට අත දාලා කිසිම හානියක් නොවිච්ච වෙලාවේ ඉදලා, ගෑරුප්පුව හපලා වගේ දේවල් කරලා. පස්සෙ ඒ දේවල් ප්‍රයෝජනයට ගැනීමක් විදිහට කේට්ලින්ගේ දකුණු අත පවා කඩලා දානවා. මේ සිදුවීම්පෙල ඔයාලට පහලින් තියෙන වීඩියෝවෙන් බලාගන්න හැකියාව තියෙනවා.

                               

බ්‍රැන්ඩන්ට නින්දෙන් කටහඩවල් ඇහෙන්න වගේම නින්දෙන් ඇවිදගෙන ගිහින් තියෙනවා එයා පෘතුවියට ආව යානය ගබඩා කරලා තියෙන මේ අයගේ පවුලේ ගොවිපල ඇතුලෙ තියෙන කුටිය ලගට. එයාට ඇහෙන කටහඩවල් වලින් එයාව එයාගෙ යානය ගාවට එක්කන් යන එකේ මොකක්දෝ මන්දා ලොකු සම්බන්ධයක් තියෙනවා. කොහොමහරි තමන් ඇත්තටම කවුද කියලා දැනගන්න ලැබුනට පස්සෙ එයාට එන තරහට එයා එයාගෙ හිත එක්කලා පිටසක්වල ජීවී භාෂාවෙන් කතා කලාම එයාට පිළිතුරු ලැබෙන අනික් කටහඩින් “මේ ලෝකේ අල්ලාගන්න” කියලා කිව්වම තමයි එයාගෙන් මුලින්ම හිට් විෂන් හැකියාව මතු වෙන්නෙ.

යහපතට හා නපුරට

• Man of Steel

ජොනතන් ක්ලාක්ට බලයන් යටපත් කරන් ඉන්න කිව්වට පස්සෙ එයා කලේ ඒදේම තමයි. මේ නිසාම කුණාටුව වෙලාවේ ජොනතන්ගේ ජිවිතේ ලේසියෙන්ම බේරගන්න තිබුණු අවස්තාව පවා ක්ලාක්ට නැතිවෙලා ගියා. එදා ක්ලාක් ජොනතන්ව බේරාගත්තා නම් මාර්තා තරමටම වයසට ගිය ජොනතන් කෙනෙක් ඉන්න තිබුනා. හැබැයි එතන හිටිය හැම මනුස්සයෙක්ම එදා ක්ලාක් කියන්නේ මොන වගේ කෙනෙක්ද කියලත් දැනගන්න ඉඩ තිබුනා. එහෙම දැනගත්තා නම් මේ වෙද්දී ද්විත්ව අනන්‍යතාවයක් තියෙන සුපර්මෑන් කියන චරිතය බිහි නොවෙන්න ඉඩ තිබුනා. කොහොම වුනත් පුංචි කාලෙ ඉදලම ක්ලාක්ට ඕන වුනේ එයාගෙ බලයන් පාවිච්චි කරලා අනික් අයට උදව් කරන්න. වීරයෙක් වෙන්න. මේ නිසාම තමයි ක්ලාක් එයාලගේ ලොකු යානයේ තිබිලා සූට් එකක් ඇදගෙන මිනිස්සුන්ට උදව් කරන චරිතයක් වෙන්න උත්සහ කලේ වගේම “සුපර්මෑන්” කියන අන්වර්ථ නාමය ලබාගත්තෙ. මොකද එයා හැමවෙලාවකම මිනිස්සුන්ට බලාපොරොත්තුවක් ගෙනදුන්න නිසා.

• Brightburn

සුපර්මෑන් අනික් අයට උදව් කරද්දී බ්‍රැන්ඩන් නිතරම කලේ අනික් අයව කරදරයට පත් වෙන විදිහේ වැඩ. විශේෂයෙන්ම බ්‍රැන්ඩන්ට කවුරුහරි හරි වැරැද්දක් කලොත් එයා නිතරම කල්පනා කලේ ඒ කෙනාගෙන් පලිගන්නයි. බ්‍රැන්ඩන්ගේ උපන්දිනේ දවසෙ එයාට රයිෆල් එකක් තෑග්ගක් විදිහට දීපු වෙලාවේ කයිල් ඒ තෑග්ග එයාට නොදී ඉන්න තීරණය කරපු වෙලාවේ ඉදන් බ්‍රැන්ඩන්ට ආව තරහව ඊටපස්සෙ අරන් ගියෙ තවත් කෙනෙක්ගේ මරණයකට. ඊටපස්සෙ ඉදලා චිත්‍රපටය අවසානය දක්වාම බ්‍රැන්ඩන් කලේ තමන්ට වැරැද්දක් කරන හැම කෙනෙක්වම මරපු එකමයි. කොටින්ම කිසිම වැරැද්දක් නොකරපු ගුවන් යානයේ හිටිය මගින් 268 දෙනෙක්වත් එයා මරලා දැම්මා කිසිම හේතුවක් නැතුවම.

 

• දුර්වලතා

ඕනම කෙනෙක් දන්න දෙයක් තමයි සුපර්මෑන්ට විශේෂයෙන්ම ක්‍රිප්ටෝනයිට් වලින් හානියක් කරන්න පුලුවන් කියලා. සුපර්මෑන්ට විතරක් නෙවෙයි ක්‍රිප්ටෝන් වැසියන්ට මේ විදිහට හානියක් කරන්න පුලුවන්. Brightburn සිනමාපටයට අනුව බ්‍රැන්ඩන්ට තියෙන එකම දුර්වලතාවය තමයි එයා පෘතුවියට ආව යානයේ ඔබ්බලා තියෙන ලෝහ කොටස්. ඒ කියන්නෙ සුපර්මෑන්ට ක්‍රිප්ටෝනයිට් වලින් හානි කරන්න පුලුවන් වගේම බ්‍රැන්ඩන්ට එයා ආව යානයෙ තියෙන ලෝහ කොටස් වලින් ඇනලා හානි කරන්න පුලුවන්.

ඒවගේම ඔයාලා සමහරවිට අහලා ඇති සුපර්මෑන්ට රක්ත සූර්යයාගේ විකිරණ එහෙමත් නැත්තම් රෙඩ් සන් රේඩියේෂන් වලින් සුපර්මෑන්ගේ සෛල වලට බලපෑමක් එල්ල කරලා එයාගෙ හැකියාවන් යටපත් කරලා දුර්වල කරන්න පුලුවන් කියලා? සමහරවිට මේ වගේ සැගවුණු දුර්වලතාවයක් බ්‍රැන්ඩන්ටත් ඇති. හැබැයි අපිට මුල් සිනමාපටය තුලින් ඒ විදිහෙ දෙයක් දැකබලා ගන්න ලැබෙන්නෙ නැහැ. Brightburn සිනමාපටයටයෙ දෙවැන්නක් ආවොත් පෙලක් විට අපිට ඒ විදිහේ දේකුත් දැකගන්න ලැබේවි. 

 

මවගෙ අසීමිත ආදරය

ඉතින් ඔය ටික තමයි මට කියන්න ඕන වෙලා තිබුණේ. මගේ අදහසට අනුව නම් මමනම් කැමති නැහැ මේ විදිහට MoS චිත්‍රපටය විකෘති කරලා තිබුනට. අනික ලෝකෙ පුරාවටම ඉන්න ප්‍රේක්ෂකයො මේ වෙලා තියෙන දේ ගැන කතා වෙද්දී මේ සම්බන්ධයෙන් වෝනර් බ්‍රදර්ස් හෝ වෙන කිසිම අදාළ බලධාරීක් කිසිම කෙනෙක් කිසිම විදිහක ප්‍රකාශයක් (දැනුවත්ව) නිකුත් කරලා තිබුනේ නැහැ. සමහරවිට DCEU තුල Suicide Squad (2021) සිනමාපටයෙ ඉදලා DC සිනමා විශ්වයේ මිලග චිත්‍රපට බොහොමයක්ම ජේම්ස් ගන් විසින් නිර්මාණය කරන නිසා, හැමදාමත් වගේ යටිකුට්ටු වැඩ කරපු වෝනර් බ්‍රදර්ස්ලට මේ වෙච්ච දේටත් මොකක්ම හරි සම්බන්ධයක් ඇති. හැබැයි ඉතින් හොරර් ෆිල්ම් එකක් විදිහට නම් බ්‍රයිට්බර්න් සිනමාපටය කිසිම බාධාවකින් තොරව රස විදින්න පුලුවන් කියලා වගකීමෙන් කියන්න කැමතියි.

හොද පිටපතක් නිකුත් වුනාට පස්සෙ Brightburn සිනමාපටයත් සිංහල උපසිරැසි බයිස්කෝප් සිංහලෙන් වෙබ්අඩවිය හරහා ඔයාලට ලැබේවි. තවත් දවසක මේ වගේම ලිපියකින් මුණගැහෙමු. ජය!!