The Amityville Murders (2018) | ඇමිටිවිල් භීෂණයේ පසුබිම් කතාව

The Amityville Murders (2018) | ඇමිටිවිල් භීෂණයේ පසුබිම් කතාව

එදා 1974 වසරේ නොවැම්බර් 13 වැනිදා, බදාදා දවසක්. පස්වරු හයයි තිහට පමණ, නිව්යෝක් හි ලෝන්ග් අයිලන්ඩ් හි පිහිටි තැබෑරුමකට කඩාවදින 23 හැවිරිදි රොනල්ඩ් ඩිෆේයෝ මහහඬින් කෑගසමින් එහි සිටි අයගෙන් උදව් ඉල්ලුවා. “අනේ මට උදව් කරන්න! මම හිතන්නේ මගේ අම්මයි තාත්තයි දෙන්නට වෙඩි තියලා!” කියමින්. ඉන්පසු පිරිසක් රොනල්ඩ් බුච් ඩිෆේයෝට අයත්  සමුද්‍ර මාවතේ 112 නිවෙස වෙත දිව ගියා. එහිදී ඔවුනට දකින්න ලැබුනේ ඩිෆේයෝගේ දෙමව්පියන් ඇඳන් මතම වෙඩි තබා මරා දමා ඇති ආකාරය යි. අනතුරුව, සෆෝක් ජනපද පොලිසියට ඔහුගේ මිත්‍ර ජෝ යෙස්විට් විසින් ලබාදුන් දුරකථන ඇමතුමකට අනුව පොලිස් නිළධාරීන් එහි පැමිණියා. ඔවුන්ට දකින්නට ලැබුනේ නිවෙස තුළට යෑම ප්‍රතික්ෂේප කරමින් බියෙන් හා ශෝකයෙන් තැතිගෙන සිටි බුච් ඩිෆේයෝ එළිමහනේ අසල්වැසියන් හා රැඳී සිටින අන්දම. මුළු නිවසම පරික්ෂා කළ පසු රොනල්ඩ් ඩිෆේයෝගේ පවුලේ සාමාජිකයන් සය දෙනා ම නිදි ඇඳේ දී ම මරා දමා ඇති බව පොලිසිය සොයාගත්තා. මරා දැමුණු සාමාජිකයන් වුයේ ඔහුගේ දෙමාපියන්: ජ්‍යෙෂ්ඨ රොනල්ඩ් ඩිෆේයෝ (44) සහ ලුයිස් ඩිෆේයෝ (42); ඔහුගේ සහෝදරියන් දෙදෙනා වන ඩෝන්  (18), ඇලිසන් (13) සහ සහෝදරයන් දෙදෙනා වන මාක් (12) සහ ජෝන් මැතිව් (9) යන අයයි. ඩිෆේයෝ පවුල 1965 දී එම නිවෙස මිළදී ගත් කාලයේ සිට එම නිවෙස භාවිතා කර තිබුණා. මළසිරුරු රැගෙන යාමෙන් අනතුරුව පොලිස් නිළධාරීන් ඩිෆේයෝ ව පොලිසියට රැගෙන ගියේ ඔහුගේ ආරක්ෂාවට යි.

(ඩිෆේයෝ පවුලේ සාමාජිකයන්)

පොලිසිය සොයාගත් පරිදි මේ සියළු දෙනාට වෙඩි තබා තිබුණේ  .35 මාර්ලින් 336C රයිෆලයකින්. මවටත් පියාටත් වෙඩි පහර දෙක බැගින් තබා තිබුණු අතර ළමයින් සිව්දෙනා එක් වෙඩි පහර බැගින් තබා මරණයට පත් කර තිබුණා. සෆෝල්ක් පොලිස් නිළධාරීන්ගේ නිරීක්ෂණය අනුව ඔවුන් සියළු දෙනා මියගොස් තිබුණේ මුහුණ පහතට යොමුවන අන්දමින් ඇඳ මත වැතිර සිටින ඉරියව්වෙන්.

(පොලිසිය විසින් රොනී ඩිෆේයෝගේ පියාගේ මළසිරුර ඉවතට රැගෙන යන අන්දම)

රොනල්ඩ් හෙවත් “බුච්”  පොලිසියට ලබාදුන් කට උත්තර අනුව පාතාල නායකක් වුණු  ලුයිස් ෆැලිනි විසින් තමා සමඟ ඇති ආරවුලක් නිසා පවුලේ අය මරා දමන්නට ඇතැයි තමා සැකකරන බව පවසා තිබුණා. මුලදී පොලිසිය මෙය විශ්වාස කළා. එහෙත් රොනල්ඩ් සමඟ ඇති කෝන්තරයක්  නිසා ඔහු හැර පවුලේ අනෙක් අය ඝාතනය කරන්නේ ඇයි? මේ ගැන පොලිසියට ඇති වුණේ ගැටළුවක්. කෙසේ වෙතත් ෆැලිනි ගේ අන්‍යස්ථානික බවට (Alibi – මිනීමැරුම් සිද්ධිය වූ වෙලාවේ එතැන නො සිටි බව) සාක්ෂි පසුව හමුවුණා. එපමණක් නොව බුච් ඩිෆේයෝ විසින් වරින් වර හෙළි කළ කරුණු වල පරස්පරතා ඇති බව පොලිසියට පෙනී ගියා. ඔහු තම නිවසේ තුවක්කු එකතුවක් පවත්වාගෙන ගිය බවත්, ප්‍රචණ්ඩ හැසිරීමක් පෙන්නුම් කළ  පුතු සහ පියාණන් අතර වුණු ආරවුල් ගැනත් පොලිසියට කරුණු සොයාගන්නට ලැබුණා. දිගින් දිගටම කෙරුණු ප්‍රශ්න කිරීම් වලින් අනතුරුව, මළසිරුරු සොයාගැනීමෙන් පැය 24ක් ඉක්ම යන්නටත් මත්තෙන්, තමා විසින් ම මිනීමැරුම් කළ බවට පාපොච්චාරණය කිරීමට බුච් ඩිෆේයෝට සිදුවුණා. ඔහු තමා කළ දේ ගැන කියුවේ මෙවැන්නක්.

” පටන් ගත්තට පස්සේ මට නවත්වාගන්න බැරි වුණා,

ඒක වුණේ හරිම ඉක්මණින්!”

ඝාතන සිදු කිරීමෙන් පසුව ලේ තැවරුණු ඇඳුම්, මාර්ලින් රයිෆලය සහ කාට්රිජ් දැමු තැන ගැන ද, නා පිරිසිදු වී ලේ සෝදාගෙන සාමාන්‍ය පරිදි වැඩට යාමට සුදානම් වුණු ආකාරය ද ඔහු බිහිසුණු විස්තරයක් කළා.

සම්පුර්ණ පාපොච්චාරණයෙන් පසු, පොලිසියට සිදුව ඇති දෙය ගැන පැහැදිලි අදහසක් ලැබුණා. නොවැම්බර් 13 වැනිදා පාන්දර 3:15ට පමණ, බුච් ඩිෆේයෝ නින්දෙන් අවදි වී, කිසිදිනෙක පැහැදිලිව දැනගත නො හැකි වූ හේතුන් මත, .35 මාර්ලින් රයිෆලය ගෙන ඔහුගේ පවුලේ සාමාජිකයන් 6 දෙනාම ඝාතනයට ලක් කර තිබුණා. එහෙත් මේ කතාන්දරයේ ද ගැටලුකාරී තැන් කිහිපයක්ම තිබුණා.

ගිණි අවි විශේෂඥයන් සොයාගත් පරිදි ඝාතනයට යොදාගත් රයිෆලයේ නිහඬකාරකයක් සවි කර තිබුණේ නැහැ. එසේ නම් බුච් ඩිෆේයෝ ඝෝෂාකාරි අධිබල රයිෆලයක් යොදාගෙන, එකම නිවසේ මහල් දෙකක වෙනස් කාමර හතරක නිදා සිටි හය දෙනෙක් කිසිවෙක් අවදි නො වන පරිදි වෙඩි තබා ඝාතනය කළේ කෙසේද? ඔවුන් පොරබැදීමක් කළ බවට ලකුණකුදු තිබුණේ නැහැ. මළ සිරුරු කිහිප වතාවක්ම පර්යේෂණ වලට ලක් කළත් මියගිය අයගේ සිරුරු වල තිබී කිසිදු නිද්‍රාකාරකයක් සොයා ගැනීමට වෛද්‍යවරුන්ට නොහැකි ව තිබුණා. විශේෂඥයන් පැවසු අන්දමින් ඒ රයිෆලයේ හඬ සැතපුමක් පමණ ඈතට වුවද ඇසීය හැකි තරම් විශාල යි. මේ නිවෙස හුදෙකලා නිවෙසක් වුණේ නැහැ. අසල්වැසි නිවෙස් කිහිපයක්ම අසළම පිහිටා තිබුණා. එහෙත්, මිනීමැරුම් සිදු ව තිබු වෙලාව එනම් පාන්දර තුන පමණ වන විට අවදියෙන් සිටි අසල්වැසියන් කිසිවෙක් හට එම නිවසේ සුනඛයා බුරන හඬ හැරෙන්නට කිසිම වෙඩි හඬක් ඇසි තිබුණේ නැහැ. ඒ කෙසේ ද? සියළු දෙනාටම වෙඩි තබනු ලැබුවේ ඇඳන් මත දී නම්, ගෙබිම මතත් රාක්කයක් මතත් ලේ පැල්ලම් ඇති වූයේ කෙසේ ද? බොහෝ දෙනෙකුට සැක ඇතිවුණේ බුච් විසින් මෙය කළේ තනිවම විය නො හැකි බවයි. එමෙන්ම, ඩිෆේයෝ ගේ සොහොයුරිය වුණු ඩෝන්ගේ සිරුරේ තිබුණු නො දැවුණු වෙඩි සලකුණ (Unburnt gunshot residue) මඟින් කියාපෑවේ මිනීමැරුම් වලට ඇයගේ වුව ද යම් දායකත්වයක් තිබිය හැකි බව යි.

ඩිෆේයෝ පවුලේ මරණ පරීක්ෂණ සිදු කර තිබුණේ සෆෝක් ජනපදයේ නියෝජ්‍ය ප්‍රධාන වෛද්‍ය නිලධාරී හොවාඩ් ඇඩ්ල්මන් මහතා යි. ඔහු නඩුවේදී සාක්ෂි දුන්නේ මේ මිනීමැරුම් තනි පුද්ගලයෙක් විසින් සිදුකිරීම විය නො හැකි දෙයක් බව යි.

“ඔවුන් නිදාගෙන සිටියත්, ආයුධ වාර්තාව අනුව මිනීමැරුමට යොදාගත් ආයුධය, කතාවට කියනවා නම් මළවුන් වුවද අවදි කළ හැකි තරමේ ඝෝෂාකාරී එකක්!”, ඔහු පැවසුවා. මේ කිසිවෙකුට නිද්‍රාකාරක හෝ මත්ද්‍රවය දී තිබුණේ නැහැ.

“රුධිරය පමණක් නොව, සිරුරු වලින් ඉවත් කර ගනු ලැබූ අවයව පවා විශේෂ පරීක්ෂණ කිහිපයකට ලක් කළත්   ඒවායේ කිසිදු මත්ද්‍රව්‍යයක් සොයාගැනීමට හැකිවුණේ නැහැ.”, ඇඩ්ල්මන් පැහැදිලි කළා.

මිනීමැරුම් රොනල්ඩ් විසින් සිදු කළ බවට පාපොච්චාරණය කළත් එසේ කිරීම සඳහා හේතුව පොලිසියට වටහා ගත නො හැකි වුණා. ඒ ගැන ඔහුගෙන් කළ ප්‍රශ්න කිරීම් වලදී ඔහු කිවේ විස්මයජනක කතාවක්. ඔහු පැවසුවේ නිවසේ දර්ශනය වුණු අඳුරු සෙවණැලි සහ අද්භූත කටහඬවල් මඟින් පවුලේ සියළු දෙනාම මරා දමන ලෙස තමන්ට නියෝග කළ බවත් එසේ නො කළහොත් තමන්ව ඝාතනය කරන බවට තර්ජනය කළ බවත්.

“ඒ හඬවල් … ඒ කෙඳිරිලි … දෙවියනේ .. මට එවගෙන් ගැලවෙන්න අවශ්‍ය වුනා ස්වාමිනි!”

මේවා ඔහු මුහුණදුන් මානසික රෝගයක් නිසා පවසන දේ වියහැකි බව පොලිසිය මුලින් විශ්වාස කළත්, මේවා මිනීමැරුම්  චෝදනාවෙන් නිදහස් වීමේ හෝ දඬුවම ලිහිල් කරගැනීමේ අරමුණින් වංචනික ලෙස කරන අසත්‍ය ප්‍රකාශ වීමටද ඉඩක් ඇති බව පොලිසියට සැක ඇතිවුණා. කෙසේ වෙතත් ඔහු මේ මිනීමැරුම් වලට වැරදිකරු බව අවසානයේ තීන්දු වුණා. ඔහු විසින් නිර්දෝෂීභාවය පෙන්වමින් ඉදිරිපත් කළ සියලුම අභියාචනා ප්‍රතික්ෂේප වී තිබෙනවා. ඔහු වරදකරු බව තීන්දු කළ  විනිසුරුවරයා පසුව ලියු කෘතියක සඳහන් කළේ මේ මිනීමැරුම් රොනී ඩිෆේයෝ විසින් තනිවම කළ මිනීමැරුම් යැයි විශ්වාස කළ නො හැකි බව යි.

වසර ගණනාවක් තිස්සේ විත්තිකරු රොනල්ඩ් බුච් ඩිෆේයෝ මිනීමැරුම් වූ ආකාරය විධ ආකාරයට විස්තර කර තිබෙනවා. මේ නිසා මේ මිනීමැරුම් ගැන කර තිබෙන ඔහුගේ ප්‍රකාශ විශ්වසනීයත්වයෙන් තොර ලෙස සැලකුණා. අද වන විට 67 හැවිරිදි වියේ පසුවන රොනල්ඩ් බුච් ඩිෆෙයො තමා සිදු කළ ද්විතියික ගණයේ මිනීමැරුම් (Secind-Degree Murder) හය සඳහා  නිව්යෝක් හි ෆොල්ස්බර්ග් වල පිහිටා තිබෙන අධිආරක්ෂිත සුලිවාන් සිරගෙයි ජීවිතාන්තය දක්වා සිරදඬුවම් හයක් භුක්ති විඳිමින් සිටිනවා. අද්භූත කතාව තවම අවසන් නැහැ!!

සිනමාපට ගණනාවකට මුල් වුණු අද්භූත කතාව පටන් ගන්නේ මේ මිනීමැරුම් වලින් පසුව යි. සිය පවුලේ පරිභෝජනය සඳහා මිළදී ගැනීමට නිවෙසක් සොයමින් සිටි ලට්ස් යුවළට විකිණීමට දමා තිබූ මේ සුන්දර ඇමිටිවිල් නිවෙස ගැන දැනගන්නට ලැබුණා. මෙහි සිදුවූ මිනීමැරුම් ගැන දැනුම්වත් ව සිටියත්  සුන්දර වටපිටාවක් සමඟ සුඛෝපභෝගී නිවෙසක් ඩොලර් 80,000ක් වැනි ඉතාම අඩු මුදලකට මිලට ගත හැකිවුණ නිසාත් ලට්ස් යුවළ දැඩි ආගමික විශ්වාස නො තිබූ අය නිසාත් කිසිදු චකිතයකින් තොරව ඔවුන් මේ නිවසේ දරුවන් සමඟ පදිංචි වීමට අදහස් කර තිබුණා. මේ අනුව මේ මිනීමැරුම් වලින් දහතුන් මසකට පසුව, එනම් 1975 දෙසැම්බර් මාසයේදී, ජෝර්ජ් සහ කැති ලට්ස් යුවළ මේ මිනීමැරුම් සිදුවූ ඇමිටිවිල් නිවසෙහි පදිංචියට පැමිණියා. ලට්ස් යුවළට දරුවන් තිදෙනෙක් සිටියා: ඩැනියෙල් (9), ක්‍රිස්ටෝපර් (7) සහ මෙලිස්සා හෙවත් මිසී (5) . ඔවුන් සමඟ හැරී නම් ලැබ්‍රඩෝර් වර්ගයේ බල්ලෙක් ද ගෙන ආවා.

(ලට්ස් පවුල)

ඩිෆේයෝ පවුලේ දෙමාපියන්ගේ කාමරය ලට්ස් යුවළ තෝරා ගෙන තිබුණු අතර දරුවන් තිදෙනා ඩිෆේයෝ සොහොයුරියන්ගේ කාමර බෙදාගෙන තිබුණා. දෙවැනි මහලේ මාක් සහ ජෝන් මැතිව් යන ඩිෆේයෝ දරුවන් ඝාතනය වුණු කාමරය මහන කාමරය ලෙස භාවිතා කිරීමට කැති තීරණය කළා. නිවසේ පදිංචියට පැමිණීමේදී ඩිෆේයෝ පවුල භාවිතා කළ ගෘහභාණ්ඩ ම ලට්ස් යුවළ භාවිතා කරන්නට තීරණය කර තිබුණේ ඒවා ද ඉතා අඩු මුදලට ඔවුන්ට ලැබුණු නිසායි. මේ නිසා ඔවුන්ට අලුතෙන් ගෘහභාණ්ඩ මිළදී ගැනීමට අවශ්‍යතාවයක් ඇති වුණේ නැහැ. කෙසේ වෙතත්  ලට්ස් යුවළ නිදාගැනීමට තෝරාගත් සයනය ඩිෆේයෝ දෙමහල්ලන් මරා දැමුණු සයනය වූ අතර ඔවුන්ගේ දරුවන් නිදාගැනීමට භාවිතා කර තිබුණේ ඩිෆේයෝ සහෝදරියන් දෙදෙනා මරා දැමුණු සයන වුණා. ඒවායේ කොට්ට, මෙට්ට සහ ඇතිරිලි පමණක් මාරු කර තිබුණා. කෙසේ වෙතත්, පදිංචියට පැමිණ දින 28 කට පසු දින රාත්‍රියක ලට්ස් පවුලට ඇමිටිවිල් නිවෙස හැර දා පළා යන්නට සිදු වුණා. ඒ ඔවුන්ට ඒ නිවෙස තුලදී අද්භූත සිදුවීම් දාමයකට මුහුණ දීමට සිදුවූ නිසා බවයි ඔවුන් පැවසුවේ. ඔවුන් මුහුණ දුන් අත්දැකීම් පසුව ඔවුන් ජනමාධ්‍යයට ද නිරාවරණය කළා. ඔවුන් පැවසූ අන්දමින් මේ ඒවායින් කිහිපයක්.

> ජෝර්ජ් සෑම දිනකම පාන්දර 3:15ට  නිරායාසයෙන් අවදි වීම සහ සුනඛයා බුරන හඬ ඇසීමෙන් ගෙවත්තේ පහළ බෝට්ටු නිවස වෙත යන්නට සිදු වීම.

> ශීත කාලය තුළ වුවත් අසාමාන්‍ය ලෙස නිවෙස තුළින් මැස්සන් වැනි කෘමි සතුන් හිටිහැටියේ මතුවීම

> ඩිෆේයෝ මිනීමැරුම් සිදුවූ ආකාරය කැතීට නිතර නිතර සිහිනයෙන් පෙනීම.

> ලට්ස් දරුවන් පෙර නො කළ අන්දමින් , ඩිෆේයෝ පවුලේ දරුවන් මියගිය ඉරියව්වෙන් (මුහුණ ඇඳ දෙසට එල්ල වන පරිදි) නිදාගැනීම.

> නිවසේ ඇතැම් ස්ථාන වල සීතල කලාප (Cold Spots) හමුවීම. මේ ස්ථාන අසලින් යනවිට අසාමාන්‍ය සීතලක් දැනෙන බව ලට්ස් යුවළ කියා ඇත.

> නිවසේ සිටි පවුලේ දරුවන් අතරින් කුඩාම දියණිය වූ මෙලිස්සා අන් අයට නොපෙනෙන අදෘශ්‍යමාන මිතුරෙකු සමඟ නිරන්තරව කතාබස් කරන අන්දම දෙමාපියන්ට දක්නට ලැබුණු අතර  මෙලිස්සා ඒ ජෝඩි ලෙස හඳුන්වා ඇත. ඇය ජෝඩිගේ සිතුවම් ද ඇඳ පෙන්වා ඇත. ජෝර්ජ් මාධ්‍යට පසු කලෙක දී පවසා සිටියේ තම කුඩා දියණිය උරෙකු වැනි , ශරීරයේ මස් ගොබ සහිත සත්වයෙකුගේ ස්වරුපය ගත අයකු සමඟ කතාබහේ යෙදෙන අන්දම තමන් දෑසින් දුටු බවය. කෙසේ වෙතත් මෙම ජෝඩි යන නම ඩිෆේයෝ පවුලේ බාල දරුවා ඇමතීමට යොදාගත් සුරතල් නාමය යි!

> නිවසේ බිත්ති සහ දොරගුළු වලින් කොළ පැහැති ජෙලටින් වැනි දියරයක් නො කඩවා  වෑස්සීම. මේවා මොනවාද යන්න හෝ කොහේ සිට පැමිනෙන්නක් ද යන්න ඔවුන්ට සොයාගැනීමට නො හැකි වුණා.

> ඔවුන් නිවෙස හැර ගිය රාත්‍රියේ සිදුවූ සිදුවීම් නො පැහැදිලි වුණා. එදින මුහුණදුන් අත්දැකීම් ගැන සිහිකිරීමට  ජෝර්ජ් ලට්ස් දැඩි අකමැත්තක් දැක්වුවා.

ඒ ගැන විමසු හැමටම පාහේ ඔහු පැවසුවේ මෙහෙමයි: “එදා වුණු දේවල් කවදාවත් කියා ඇති දේවල් නෙවෙයි, කවදාවත් කිව යුතු දේවල් ද නෙවෙයි.” කෙසේවෙතත්, ඔහුගෙන් යම් යම් දේ හෙළි කරගනිමට ජනමාධ්‍ය සමත් ව තිබුණා: “නිවස තුළ උෂ්ණත්වය ශීතල බවේ සිට උණුසුම් තත්වයකට පැමිණියා. නිවසේ ඇතුළේ කොටස් තුළින් අද්භූත හඬවල් ඇසෙන්නට පටන් ගත්තා.”

ඊට අමතරව, දෙවැනි මහලේදී හිස ලෝගුවකින් වසාගත් ජෝර්ජ් දෙසට ඇඟිල්ලක් දිගු කරන ඉරියව්වෙන් නිශ්චලව සිටි පුද්ගලයෙක්ව ජෝර්ජ්ට මුණගැසුන බව ජෝර්ජ් පවසා තිබෙනවා.

මේ යුවලගේ අත්දැකීම් අළලා Jay Anson විසින් රචනා කළ The Amityville Horror කෘතිය 1977 දී පළ කෙරුණා. මේ කෘතිය පාදක කරගෙන 1979 දී තිරගත කෙරුණු The Amityville Horror චිත්‍රපටය ද අතිශය ජනප්‍රිය වුණා. ඔවුන් නිවෙස හැර ගොස් දෙමසකට පසුව සුප්‍රකට අධිමානසික විශේෂඥයන් දෙපළක් වූ එඩ් සහ ලොරේන් වොරන් යුවළ මේ නිවසේ පාරභෞතික සිදුවීම් ගැන ගවේෂණයක නියැලුණා. නිවෙසට ඇතුළු වූ පසු ලොරේන් මැතිණිය ඝාතන සිදු වූ අන්දම ගැන දර්ශන දැක ඇති අතර එම නිවසේ තමන්ට පිළියම් කළ නො හැකි අද්භූත ආත්ම සිටිනා බව ප්‍රකාශ කර තිබෙනවා. The Conjuring 2 (2016) චිත්‍රපටයේ ආරම්භයේදී මොවුන් දෙදෙනා ඇමිටිවිල් නිවසේ කළ පර්යේෂණ ඇසුරින් ලද අද්භූත අත්දැකීම් ඇසුරින් නිර්මාණය කළ කොටසක් ඇතුළත් කර තිබෙනවා. මුළු නිවෙස පුරා කැමරා සවිකරමින් ඔවුන් විවිධ තැන්වල චායාරුප ලබා ගත්තා. ඒ එක් චායාරුපයක තරප්පු පෙළ අසළින් එබී බලන කුඩා දරුවෙකුගේ චායාවක් සටහන් වී තිබුණා. සුප්‍රකට අවතාර ළමයා (“The Ghost Boy”) ලෙස හැඳින්වෙන්නේ මෙම චායාරුපය යි. එහෙත් එම චායාරුප ලබාගන්නා රාත්‍රියේ එම නිවසේ කිසිම ළමයෙක් නො සිටි බවට ලොරේන් යුවළ සහ සහායකයන් තහවුරු කරනවා. මේ පිළිබඳව වැඩිදුර තොරතුරු වොරන් යුවළගේ නිළ වෙබ් අඩවියෙන් කියවන්නට පුළුවන්.

කෙසේ වෙතත් මේ අද්භූත නිවෙස ගොඩනංවා ඇත්තේ ලෝන්අයිලන්ඩ් වල ඇමෙරිකානුවන් විසින් සමුලඝාතනය කළ ස්වදේශික රතු ඉන්දියන් කරුවන්ගේ සමුහ මිනිවලක් අසළ ය යන්න තවත් සුප්‍රකට මතයක්. රතු ඉන්දියානුවන් ඔවුන්ට ආවේණික මන්තර ගුරුකම් ගැන ප්‍රසිද්ධියක් උසුලන්නන් වනවා.  තම නිජබිම උදුරාගැනිම කෙරෙහි වෛරයෙන් මියගිය ස්වදේශිකයන් කළ ශාපය නිසා මේ නිවෙසට අයහපත් බලපෑම් සිදුවන බවට ද යම් ගුප්ත අදහසක් පවතිනවා. කෙසේ වෙතත් බොහෝ ඇමෙරිකානු පුරාවිද්‍යාඥයන් එවැනි සමුහ මිනිවලක පැවැත්ම ප්‍රතික්ෂේප කරනවා. ඒ එවැනි මිනිවලක පැවැත්ම සඳහා කිසිදු පුරාවිද්‍යාත්මක හෝ ඓතිහාසික සාක්ෂියක් නොමැති බව පවසමින්. මේ පිළිබඳව එකකට එකක් ගැටෙන මත ගණනාවක් තිබෙනවා.

[අවතාර ළමයාගේ චායාරුපය (The Ghost Boy)]

වසර ගණනාවක් තිස්සේ, මේ ඇමිටිවිල් අවතාර සිදුවීම් වංචාවක් බවට ද කටකතා පැතිර ගොස් තිබුණා. එමෙන්ම The Amityville Horror කෘතියේ ඇති අද්භූත කතා සියල්ල එක රැයක් එළිවෙන තුරු වයින් පානය කරමින් Jay Anson සහ ලට්ස් යුවළ විසින් ගෙතූ කතාවකැයි ඇතැම් පුවත්පත් මඟින් චෝදනා කර තිබුණා. එමෙන්ම ආචාර්ය ස්ටීවන් කප්ලාන් ලෙස හඳුන්වන අයෙක් The Amitiville Conspiracy කෘතිය පළ කරමින් මේ අවතාර කතා බුච් ඩිෆේයෝව මරණිය දණ්ඩනයෙන් ගලවා ගැනීම වෙනුවෙන් කළ සැළසුම් සහගත කුමන්ත්‍රණයක් බවට වොරන් යුවළට සහ ලට්ස් පවුලට බරපතළ චෝදනා එල්ල කර තිබුණා. කෙසේ වෙතත් ඔවුන්ට එසේ කිරීමට ඇති අවශ්‍යතාවය කුමක්ද යන්න නම් ගැටළුවක්. ආචාර්ය කප්ලාන් මෙය හුදෙක් වංචාවක්/කුමන්ත්‍රණයක් ලෙස ප්‍රකාශ කළත්, ඔහු මේ නිවෙස ගවේෂණය කිරීමට එක් වරක් හෝ පැමිණ නැහැ. වොරන් යුවළ ප්‍රකාශ කළේ ආචාර්ය කප්ලාන්  කිසිදු විශ්වවිද්‍යාලයකින් ආචාර්ය උපාධියක් ලද බවට තොරතුරු නැති බවයි. එමෙන්ම මේ නිවසේ යම් අද්භූත බලවේගයක් ඇති බව එතැනට පැමිණ පරික්ෂා කිර්මන් ම තමන් දැනගත් බවයි වොරන් යුවළ පවසන්නේ. කෙසේ වෙතත්, ලට්ස් යුවළට පසුව මේ නිවෙස භාවිතා කළ කිසිවෙක් එම නිවසේ අද්භූත සිදුවීම් ගැන වාර්තා නො කිරීමත් සුවිශේෂී කරුණක්.

 මේ සිද්ධීන් වලට මුල් වූ ඇමිටිවිල් නිවස මිනීමැරුම් සිදුවුණු වකවානුවේ සිට මේ වන විට අවම වශයෙන් පස් වරක් විවිධ හිමිකරුවන් අතට මාරු වී තිබෙනවා. 2017 දී නැවත වරක් එය අනන්‍යතාවය හෙළි කරන්නට අකමැති හිමිකරුවෙක් විසින් ඇමෙරිකන් ඩොලර් 605,000කට ( ඔහු ඉල්ලු මුදලට වඩා ඩොලර් 200,000ක වට්ටමක් සහිතව) මිලට ගනු ලැබුවා.  පිළිසකර කිරීමෙන් අනතුරුව අද ඒ නිවෙස මිනීමැරුම් සිදුවුණු කාලයට වඩා තරමක වෙනස් අන්දමකින් දිස් වෙනවා. අනුයාත වෘත්ත පාද ඛණ්ඩක දෙකක හැඩය ඇති ඇමිටිවිල් නිවෙසට ආවේණික ජනෙල් දෙක නම් මේ වන විට වෙනස් කර තිබෙනවා. අවශ්‍ය නම් ගූගල් සිතියමේ 112, Ocean Avenue, Amityville ලෙස සෙවීමක් කර එම නිවෙස සොයාගන්න පුළුවන්. එහෙත් අද වනවිට එහි ලිපිනය 108, Ocean Avenue, Amityville ලෙස මාරු කර තිබෙනවා.

මේ සිදුවීම ඇසුරින් නිර්මාණය වුණු නවතම සිනමා නිර්මාණය වන The Amitiville Murders (2018) චිත්‍රපටයේ සිංහල උපසිරැසි ඔබට බයිස්කෝප් සිංහලෙන් අඩවියෙන් ලබාගන්න පුළුවන්. මේ ඝාතන සිදුවීමට හේතු වුණු කරුණු ගැන අධ්‍යක්ෂකවරයා දරන අදහස මේ සිනමා නිර්මාණයට ඇතුළත් කර තිබෙනවා. මේ සාහසික මිනීමැරුම් වලට හේතු වුණේ ඩිෆේයෝ පවුලේ ආරවුල් සහ බුච් ඩිෆේයෝගේ හදිසි ආවේගය පමණ ද? නැත්නම් රතු ඉන්දියන් වරුන්ගේ ශාපය හෝ වෙනත් අද්භූත බලයක් මෙයට බලපෑවා ද? නො එසේ නම් අද්භූත බලවේගය මිනීමැරුම් චෝදනාවෙන් නිදහස් වන්නට ඩිෆේයෝ ගෙතු කතාවක් පමණක් ද? නැත්නම් ඩිෆේයෝ යම් මානසික රෝගයකින් පීඩා විඳින්නට ඇති ද? එසේනම් ලට්ස් පවුල සහ වොරන් යුවළ ගේ අත්දැකීම් ගැන කුමක් කිවහැකි ද? ඒ සියල්ල ද ප්‍රෝඩාවන් විය හැකි ද? මේ සියල්ල ගැන තීරණය ඔබට භාරයි.

ප්‍රබුද්ධ කේසර විතානගේ (1 Posts)


4 thoughts on “The Amityville Murders (2018) | ඇමිටිවිල් භීෂණයේ පසුබිම් කතාව

  • January 30, 2019 at 7:47 PM
    Permalink

    Supiri post ekak. Thanks.

  • January 29, 2019 at 6:02 PM
    Permalink

    මේ වගේ තවත් ඇත්ත සිදුවීම් ටිකක් දාන්නකෝ

  • January 29, 2019 at 10:22 AM
    Permalink

    Niyama lipiyak, godak dewal denagatta

  • January 28, 2019 at 2:25 PM
    Permalink

    Niyamayi

Leave a Reply

Your email address will not be published. Required fields are marked *

error: Content is protected !!