Andhadhun (2018) | අන්ධ පුද්ගලයෙකුගේ කලාව..
ඕනම කලාකරුවෙකුට රහසක් තියෙනවා කියල කතාවක් තියෙනවනේ. අනේ මන්දා ඕවා ඇත්තද නැත්තද කියලා. හැබැයි එහෙම එකක් තියෙනවා කියල වහරේ කතාවක් තියෙනවා. ඉතින් අද මං ඔයාලට අරගෙන එන විස්තරේ අන්න ඒ වගේ කලාකරුවෙක් ගැන ගෙතුණු කතාවකින් සපිරුණු චිත්‍රපටියක්. අපි බලමු කයිවාරුව පැත්තකින් තියලා එහනම්.
Andhadhun එහෙමත් නැත්නම් අන්ධාධූන්. මේ දවස් වල අතිශය සාර්ථක ගමනක යෙදෙන සිනමා සිත්තමක්. අන්ධ පියානෝ වාදකයෙකුට මුහුණ දෙන්න වෙන අභිරහස් සිදුවීම් මාලාවක් වටා ගෙතුණු මේ කතන්දරය රිදී තිරයට නැගෙන්නේ පහුගිය ඔක්තෝම්බර් 05 වැනිදා ඉඳන්. ඉන්දියානු රුපියල් කෝටි 32 ක වියදමින් තැනුණු මේ චිත්‍රපටය කිසිවෙකු නොසිතු අයුරින් ප්‍රේක්ෂක ආකර්ෂණය දිනාගන්නට සමත් වන්නේ ඉන්දියානු රු. කෝටි 110 ක තවමත් නොනැවතුණු ආදායමකට හිමිකම් කියමින්.
තිරගතවීම ආරම්භයේ පටන් විචාරකයින්ගේ ධනාත්මක පැසසුමට ලක් වුනු මේ චිත්‍රපටය IMDB වර්ගකිරීම්හි මනාප 13 000 කටත් අධික සංඛ්‍යාවක උදව්වෙන් 9.0/10 ක රේටින් එකකට යන්නට සමත් වන්නේ චිත්‍රපටයේ සාර්ථකත්වයට තවත් මංමාවත් විවර කරමින්.
Sriram Raghavan අධ්‍යක්ෂණය කරන මේ චිත්‍රපටය සඳහා රංගයෙන් දායක වෙන්නේ බොලිවුඩ් නව පරම්පරාවේ දක්ෂ රංගන ශිල්පියෙකු වන අයුශ්මාන් කුරානා එහෙමත් නැත්නම් ඔබ අපි කවුරුත් දන්න විකී ඩෝනර් විසින්. අයුශ්මාන් එක්කලා තවත් සුරූපිනියන් දෙන්නෙක් මේකට රංගනයෙන් තවත් එක වෙනවා. ඒ තාබු සහ රාධිකා ආප්තේ.
ඉතින් විචාරකයින් පවසන ආකාරයට මේකේ සාර්ථකත්වයට අයුශ්මාන්ගේ අති දක්ෂ රංගනය, තාබුගේ අතිදක්ෂ රංගනයෙන් මුසුවුන සංවේදී නමුත් භයානක/අභිරහස් චරිතය, ශ්‍රීරාම් රාඝවන්ගේ සුවිශේෂී අධ්‍යක්ෂණය, දක්ෂ පසුබිම් සංගීතය සහ චිත්‍රපටියේ අදහාගත නොහැකි අවසානය බලපෑවා කියලා තමයි කියන්නේ.
සංගීතය ගැන මතක් කරද්දී Amit Trivedi, Raftaar, Girish Nakod තුන් දෙනාගේ අතිදක්ෂ ස්වර මුසුවෙන් තැනුණු පසුබිම් සංගීතය සහ ගීත අතලොස්ස මේ චිත්‍රපටයේ රසය තවත් වැඩි කරනවා කියන්න පුළුවන්.
ඉතින් මේ චිත්‍රපටිය වැඩි ප්‍රචාරණයකට භාජනය කරපු එකක් නෙවෙයි. නෝමල් එකෙ සද්ද නැතුව ඇවිත් තිරගතවෙලා මිනිස්සු අතරට ගියපු එකක්. සාකච්ඡාවකදී අයුශ්මාන්ගෙන් ඇහුවම ඇයි මේ චිත්‍රපටිය වෙනුවෙන් වැඩි ප්‍රචාරණයක් දුන්නේ නැත්තේ කියලා ඔහු පිළිතුරු දීලා තිබෙන්නේ. ඔහු සිතන ආකාරයට මේ චිත්‍රපටියේ ශෛලිය ගැන වැඩි යමක් කතා කිරීමට නොහැකි බවත්, මේ චිත්‍රපටිය අභිරහස් කතාවක් සම්බන්ධ එකක් නිසා හැමෝම ඔහුගෙන් තමන් ඇත්තටම අන්ධ කෙනෙක්ද නැද්ද යන ප්‍රශ්නය අසන බවත් නිසා මේ චිත්‍රපටය සුපුරුදු ආකාරයේ ප්‍රචාරණයක් නැතුව සාමන්‍ය විදිහට එළිදක්වන්න අපි කණ්ඩායම තීරණය කරා වගේම මේ චිත්‍රපටිය මිනිස්සු අතරට කටින් කට ගලාගෙන ගොස් ප්‍රේක්ෂකයින් චිත්‍රපටිය නරඹලාම මේ ගැන තේරුම් ගනීවි කියලා ඔහු එවිට ප්‍රකාශ කර තියෙනවා.
ඒ වගේම මේ චිත්‍රපටිය ගැන තවත් වැදගත් කරුණු කීපයක් මං මේ විදිහට ඔබට ගෙනහැර දක්වන්නම්
- අයුශ්මාන් කුරානා මේ චිත්‍රපටියේ එන අන්ධ පියානෝ වාදකයාගේ චරිතය වෙනුවෙන් මාස දෙකක කාලයක් ඇමරිකාවේ ලොස් ඇන්ජලිස්හි අක්ශේ වර්මා නම් පියානෝ වාදකයෙකු යටතේ පුහුණුව ලබා තිබෙනවා.
- මේ චිත්‍රපටිය IMDB ලැයිස්තුවේ විශිෂ්ඨතම ඉන්දියානු චිත්‍රපටි දහය අතරට එක්ව තිබෙනවා
- රූගත කිරීම් ආරම්භයට පෙර මේ චිත්‍රපටියේ නම The Piano Player ලෙසින් නම් කරගෙන තිබුනත්, ඉංග්‍රීසි නමකට කිසිවෙකුගේ උනන්දුවක් නැති නිසා පසුව එය අන්ධාධුන් ලෙසන් වෙනස් කර තිබෙනවා.
- මේ චිත්‍රපටිය සඳහා The Piano Tuner (2010) නම් කෙටි චිත්‍රපටියද පාදක කරගෙන තිබෙනවා.
- මුලින් මේ චිත්‍රපටිය සඳහා අනිල් කපූර්ගේ පුත් හරිෂ්වර්ධන් කපූර් රඟපෑමට ගිවිසුම් ඇතිකරගෙන තිබුනත් යම් හේතුන් නිසා ඔහු මෙය ප්‍රතික්ෂේප කර තිබෙනවා.
- ඒ වගේම ප්‍රවීන නළු අනිල් ධවාන් මේ චිත්‍රපටය සඳහා වසර පහකට පසු නැවත පැමිණෙනවා.
- චිත්‍රපටය ආරම්භයේඩි අයුශ්මාන් විසින් පියානෝවක් වාදනය කරනු ලබනවා. ඒ සඳහා කවායි නම් ජපන් සමාගමකට අයිති පියානෝවක් තමයි යොදාගෙන තියෙන්නේ.
ඉතින් ඔන්න ඔය විදිහට තමයි වැඩේ සිද්ද වෙලා තියෙන්නේ. කෝම උනත් කිරුළු නොපැලඳුවත් අයුශ්මාන් කියන්නේ බොලිවුඩයේ සුපිරිම සහ දක්ෂම රංගන ශිල්පියෙක් කියලා නැවතත් ඔප්පු කරන්නට ඔහු මේ චිත්‍රපටියෙන් සමත් වෙනවා. ඉස්සරහට තවත් චිත්‍රපටියක් එන්නට නියමිතව තියෙනවා අයුශ්මාන්ගේ බධායි හෝ කියලා. මේ වසරේ අවසන් කාර්තුව බොලිවුඩ් සිනමා රසිකයින්ට හොඳ චිත්‍රපටි වරුසාවක්ම ලැබෙන ලකුණුයි මේ වෙද්දී පෙනෙන්නට තිබෙන්නේ.
ඉතින් මේ සුපිරි සිනමා අද්දැකීමත් නුදුරේදීම ඔබටත් දන්න සිංගලෙන්ම ගෙන එන්නට අපගේ උපසිරැසි කණ්ඩායම සූදානමින් ඉන්නවා. පහලින් තියෙනවා සිංහල උපසිරැසි සමගින් ගෙනාපු පූර්ව ප්‍රචාරක පටය. ඉතින් නොවරදවාම අප සමග දිගටම රැඳී ඉන්න කියල ඔබ සැමගෙන් ඉල්ලා සිටිමින් තවත් මේ වගේ ලිපියකින් හමුවන බලාපොරොත්තුවෙන් මං සමුගන්නවා… ජයෙන් ජය…!!!
