Skyfall ඩොලර් බිලියනය ඉක්ම වූ සිනමා ලැයිස්තුවට…

Daniel Craig රඟන 007 කේතධාරී රහස්පරීක්ෂක චරිතයට හිමි බලය කොපමණදැයි කියන එක ගැන සුපැහැදිලි සාධකයක් මේ. මෙම සිනමාපටය ලොව පුරා ඩොලර් බිලියනයකට අධික ආදායමක් ඉපයූ චිත්‍රපට අතරට එක්වෙලා. එලෙස ඩොලර් බිලියනය පසු කර ගිය 14වන සාමාජිකයා තමයි ‘Skyfall (2012)’. ඒ අනුව මෙතෙක් බිහි වූ වඩාත්ම සාර්ථකම James Bond චිත්‍රපටය බවටත් මෙය පත්වෙලා.

Sam Mendes අධ්‍යක්ෂණය කළ මේ චිත්‍රපටයේ Daniel Craig 007 ලෙස රඟදක්වන්නේ තුන්වෙනි වතාවටයි. Sam Mendes; Bond චිත්‍රපටයක අධ්‍යක්ෂණයෙහි නිරත වන්නේ ප්‍රථම වතාවටයි. පසුගිය දෙසැම්බර් 30 වනදා තමයි මේ කඩඉම පසුකර ගොස් බිලියනයේ සංගමයේ සාමාජිකත්වය ලබාගැනීමේ අවස්ථාව මීට හිමි වුණේ. මේ තරම් ආදායම් ඉපයීමක් කරන්නට සමත් වන්නේ උද්ධමන තත්ත්වයක් පවතිද්දී වීම විශේෂත්වයක්. ඒ නොසලකා මෙතරම් මුදලක් හම්බකරන්නට හැකි වීමම ආශ්චර්යයක් වාගෙයි.

එපමණකුදු නොවෙයි Skyfall මෙම කඩඉම පසු කළ 2012 වසරේ තෙවන නිර්මාණය ද වෙනවා. මීට ප්‍රථම Disney/ Marvel නිපද වූ The Avengers ඩොලර් බිලියන 1.51කුත්, Warner Bros’ නිපද වූ The Dark Knight Rises ඩොලර් බිලියන 1.08කුත් උපයමින් 2012 වසරේදීම මෙම සාමාජිකත්වයට උරුමකම් කීවා. මේ ලැයිස්තුවේ ඇති විශේෂත්වය වන්නේ මේ අතර ඉහළින්ම ‍රැ‍ඳෙන සිනමාපට දෙකම James Cameron-ගේ නිර්මාණයන් වීම සහ එතෙක් මෙතෙක් ඩොලර් බිලියන 2 සීමාව ඉක්මවා යාමට සමත් වූ චිත්‍රපට ඇත්තේ ඒ දෙකම පමණක් වීමයි. මෙතෙක් කලකට බිලියන 1 කඩඉම ඉක්ම වූ චිත්‍රපටවල නම් පහත දැක්වෙනවා.

01. Avatar (2009) – $ 2, 782.3

02. Titanic (1997) – $ 2, 185.4

03. The Avengers (2012) – $ 1, 511.8

04. HP and the Deathly Hallows: Part 2 (2011) – $ 1, 328.1

05. Transformers: Dark of the Moon (2011) – $ 1, 123.7

06. TLOR: The Return of the King (2003) – $ 1, 119.9

07. The Dark Knight Rises (2008) – $ 1, 081.0

08. POTC: Dead Man’s Chest (2006) – $ 1, 066.2

09. Toy Story 3 (2010) – $ 1, 063.2

10. PTOC: On Stranger Tides (2011) – $ 1, 043.9

11. SW-I: The Phantom Menace (1999) – $ 1, 027.0

12. Alice in Wonderland (2010) – $ 1, 024.3

13. The Dark Knight (2008) – $ 1, 004.6

14. Skyfall (2012) – $ 1, 000.2

මේ අතරින් Skyfall තවම තිරගත වන චිත්‍රපටයක් බව අමතක කරන්ඩත් බෑ. තවමත් මෙය ලොව ලොකුම වෙළඳපොළ වන චීනය තුළ තිරගත වීම ආරම්භ වෙලාවත් නෑ. Skyfall එක්සත් ජනපදය තුළ ඉපයූ ආදායම ඩොලර් මිලියන 289.6යි. ජාත්‍යන්තරයේ ආදායම ඩොලර් මිලියන 710.6යි. ඒ අනුව Sony නිෂ්පාදන අතරින් ඉහළතම ආදායම වාර්තා කරන්නේත් ප්‍රථම වරට ඩොලර් බිලියනය ඉක්මවා යන්නේත් මේ චිත්‍රපටයයි.

එච්චරනම් මදෑ! එක්සත් රාජධානිය තුළ සිනමා ආදායම් වාර්තාවන්ගේ ඉහළින්ම ‍රැ‍ඳෙන්නේත් මේ සිනමාපටය. ඒ පවුම් මිලියන 100ක් උපයමින්. එක්සත් රාජධානියේ ආදායම් වාර්තාවන් අනුව පවුම් මිලියන 100 ඉක්මවා යන්නට සමත් වූ ප්‍රථම සහ එකම චිත්‍රපටය මෙයයි. ඩොලර් බිලියනය ඉක්මවා යද්දී එය සටහන් වෙන්නේ පවුම් මිලියන 620ක් ලෙසයි. මීට ප්‍රථම මේ සිනමා පෙළේ ඉහළතම ආදායම හෙබවූයේ Casino Royale (2006) සිනමාපටය විසින්. ඒ පවුම් මිලියන 600කින් යුතු වෙමින්.

Daeniel Craig පවසන විදිහට; ‘ඔහුට මේ චරිතයෙන් බැහැර වීමට අවැසි වුවත්, දැන්නම් ඊට ඉඩ ලැබෙන්නෙ නැති පාටයි. හේතුව අඩුම තරමින් තව චිත්‍රපට දෙකකවත් රඟ පෑමට ඔහු සමග ගිවිසුමකට එළඹෙන්නට මෙහි නිෂ්පාදකයන් දැනටමත් කටයුතු කරලා.’ නමුත් ප්‍රථම වතාවට James Bond චිත්‍රපටයක් අධ්‍යක්ෂණයෙන් දායක වුණු Sam Mendes ඒ සඳහා එක්වෙනු ඇද්දැයි තවම නිශ්චිත නැත්තේ ඔහු සමග එවැනි ගිවිසුමක් තවම සිදු කර නැති නිසායි.

එක්සත් රාජධානියේ සිනමා ආදායම් වාර්තාවන්හි මුදුන් හිණ ‍රැ‍ඳෙන්නට Bond චිත්‍රපටයකට මෙවර හැකි වුණේ, 1987 ආ The Living daylights නමැති Bond චිත්‍රපටය ඒ තැන අරගත්තාට පස්සෙ නැවත  ඒ හපන්කම කළ එකම Bond චිත්‍රපටිය විදිහටයි. මෙතෙක් එක්සත් රාජධානියේ පැවති ඉහළතම ආදායම් වාර්තාව පවුම් මිලියන 94ක්. 2009 තිරගත වීම ඇරඹූ Avatar චිත්‍රපටය ඒ මට්ටමට ළඟා වුණේ අවුරුද්දක් වැනි කාලයකදී වුණත්, එය අභිබැවීමට Skyfall-ට වුවමනා කළේ දින 40ක් පමණයි. ඒ අනුව Avatar එන විට පළව තිබූ අදහස වූ දැඩි වියදමක් දරා කරන 3D තාක්ෂණය මුසු වුණ චිත්‍රපට මගින් සිනමාවේ අනාගතය සනි‍ටුහන් වනු ඇතැයි කියන මතය මෙමගින් බිඳ හෙළා තිබෙනවා.

දැන් James Bond සිනමාවට පිවිසිලා වසර පණහක්. ඒ වගේම බිහි වූ සිනමා නිර්මාණ සංඛ්‍යාව 23ක්. අවුරුදු පණහක් වයස වෙලත් James Bond-ට තවමත් ලෝකෙම හොල්ලන්ඩ පුළුවන් කියන එකට මීටත් වඩා සාධක මොකටද, නේද?