Cloak and Dagger | ජීවිත දෙකක්, එකම දෛවයක්….

බෑ කියන්න බැරිවෙන්නම පලවෙනි එපිසෝඩ් එකේ ලිපියෙන්ම මාව මේ කරදරේට දාපු සමීර කොලුවා නිසා තමා මේ ලිපිය ලියන්න උනේ. කොහොම හරි ඉතින් කට්ටියට මේ අලුත් කතාව ගැන විස්තර ටිකක් කියන්න තමයි මේ ලැහැස්ති වෙන්නේ. මුලින්ම කියන්න ඕනි මන් මෙතැනදී කියන්නේ කොමික් තොරතුරු ටික තමයි. මොකද MCU එකට එද්දී කතාව ගොඩක්ම වෙනස් කරලා තියෙනවා. දැනට ආව එපිසෝඩ් දෙක බලපු කට්ටියට ලිපිය කියවද්දී වෙනස්කම හොඳටම තේරේවි. ඉතින් නොදන්නා තොරතුරු ටික කියන්න තමයි මං ලැස්ති වෙන්නේ.

---

“කබාය සහ කිරිච්චිය”. ඉස්සරහට කියවන් යද්දී ඔයාලට තේරේවි මේ නම් දෙක යොදාගන්නේ ඇයි කියල. Cloak and Dagger තමයි සිනමා ඉතිහාසයේ දැවැන්තම සහ සාර්ථකම සිනමා විශ්වය වන මාර්වල් සිනමැටික් විශ්වයේ නවතම රූපවාහිනී කතා මාලාව. ABC Signature Studios, Marvel Television, Wandering Rocks Productions මගින් නිර්මාණය කරන මේ කතා මාලාව කේබල් සහ සැටලයිට් රූපවාහිනී විකාශන නාලිකාවක් වන Disney–ABC Domestic Television වලට අයත් Freeform නාලිකාවේ විකාශනය වනවා.

Olivia Holt සහ Aubrey Joseph විසින් ටැන්ඩි බෝවෙන් හෙවත් Dagger සහ ටයිරන් ජොන්සන් හෙවත් Cloak ලෙස එකතු වෙන්නේ. යොවුන් වියේ පසුවන දෙදෙනෙක් සුපිරි බලයන් ලබාගන්නා අයුරු සහ එය දෙදෙනා අතර ඇතිවන රොමෑන්ටික් සබඳතාව තුල මේ කතාව ගෙතෙනවා. ABC පවුල තුල 2011 ජූලි සිට සංවර්ධනය වූ මේ කතාව 2016 අප්‍රේල් දක්වා සංවර්ධනය වෙනවා. පසුව Cloak & Dagger නම යටතේම Freeform නාලිකාව වෙත හිමිවෙනවා. එම වසරේම අගෝස්තු වලදී කතාමාලාවේ මෙහෙයවන්නා සහ විධායක නිෂ්පාදකයෙක් ලෙස Joe Pokaski එකතු වනවා. 2017 ජනවාරි ඔලීවියා සහ ජෝසප් ප්‍රධාන චරිත දෙක සඳහා එකතු කරගන්නවා. New Orleans වලදී මේ කතාව රූගත කරනු ලැබුවා. 2018 ජුනි 07 විකාශනය ආරම්භ කල අතර 2018 අගෝස්තු 02 වනදා එපිසෝඩ් 10කින් යුක්තව පළමු කතාසමය අවසන් කිරීමට නියමිතයි.

---

එහෙනම් අපි බලමු කොමික් පැත්ත දිහා. මාර්වල් කොමික් ඉදිරිපත් කිරීමක් වන මේ චරිත දෙක ඔවුන්ගේ මුල්ම ආගමනය සිදු කරන්නේ Bill Mantlo ගේ අදහසකට අනුව  Peter Parker, the Spectacular Spider-Man හි #64 වන කලාපය තුලින්. ඒ 1982 මාර්තු මාසයේදී. පසුව තමන්ගේම කියා කොමික් කලාප 04 ක අවස්ථාවක් ලද මේ චරිත දෙක Bill Mantlo, Rick Leonardi සහ Terry Austin ගේ එකතු වීම සමඟ 1983 ඔක්තෝම්බර් වලදී Cloak and Dagger නමින් නිකුත් වනවා. 1985 වන විට මාස්පතා නිකුත් වන කොමික් කලාපයකට මේ දෙදෙනා හිමිකම් කියන්නේ ඔවුන් දෙදෙනා ලද සාර්ථකත්වය මතයි. පසුව විවිද කොමික් කලාපයන් ගණනාවකින්ම අපිට මේ දෙදෙනාව දකින්න පුළුවන්.

---

• Peter Parker, the Spectacular Spider-Man (1976) #64
• Dealing In Death (Cloak and Dagger (1983) #1)
• Sinners All! (Cloak and Dagger (1985) #1)
• Life Imitates Art (New Mutants (1983) #23)
• Knight Light (Marvel Knights (2000) #1)
• The Truth Is Out There (Runaways (2005) #9)
• Ex-Men (Cloak and Dagger (2010) #1)
• Dark X-Men (Uncanny X-Men (1963) #514)
• Mister Negative: Round One (Spider-Island: Cloak & Dagger (2011) #1)
• The Dark Kingdom (The Amazing Spider-Man (2017) #6)

වැනි කොමික් කලාප ගණනාවකින් මේ චරිත දැකගන්නට ලැබෙනවා.

---

සරලවම කිව්වොත් Cloak and Dagger එහෙමත් නැතිනම් ටැන්ඩි සහ ටයිරෝන් runaways ලා.. runaways කිව්වගමන් මාර්වල් රසිකයන්ටනම් අමතක නොවෙන නමක්. නමේ අරුතින්ම පලායන්නන් ලෙසින් හැඳින්වෙන මේ නමින්ම යොවුන් කණ්ඩායමක් මාර්වල් ලෝකයේ ඉන්නවා. කට්ටියට මතකයිනේ දැන් මාස කීපයකට කලින් ආව මාර්වල් රනවෙයිස් රූපවාහිනී කතා මාලාව. ඉතින් අන්න ඒ වගේ ටැන්ඩි සහ ටයිරෝන් දෙවිදියක පසුබිමක් සහිත පලායන්නන් දෙන්නෙක්. ඔහු පොලිසිය විසින් මරාදමන ලද තම මිතුරාගේ මරණය ඇසින් දුටු ගොතගහන යෞවනයෙක්. ඇය තමන් ගැන පමණක්ම සිතන මවගේ අවදානය සැළකිල්ල නොලද යොව්වනියක්.

• ටයිරෝන් ජොන්සන් (Cloak )

බොස්ටන්හි Massachusetts හි ජීවත් වූ ටයිරෝන් උපතින්ම ගොතගසන අයෙක්. ටයිරෝන් ගේ යාළුවා වුනේ බිලී. ටයිරෝන්ට වයස 17 දී වෙළඳසලක් මංකොල්ලකන මොහොතකට මුහුණදෙන්න වෙනවා. ඔහු සමඟ බිලීද ඉන්නවා. වෙළඳසැලේ ලිපිකරුට වෙඩි තබා මංකොල්ලකරුවන් පළායන විට ඒ අසල සිටි තමන්වද පොලිසියට හසුවේවි යැයි සිතු බිලී ද පළායන අතර ඔහුව පොලිසියට හසුවෙනවා. පොලිසිය ඔහුට නවතින්නට අණ කරන්නේ ඔහු වැරදිකරු ලෙස වරදවා වටහාගෙනයි. ටයිරෝන් ඔහුව බේරාගැනීමට උත්සහ කරත් ඔහුගේ ගොතගැසීම නිසා පොලිසියට ඔහු කියන දේ පැහැදිළිව ඇසුනේ නැති අතර පොලිස් නිලධාරියාගේ වෙඩි පහරකින් බිලී මියයනවා. මේ නිසා පොලිසියට ඇති බය සහ බිලිගේ මරණය නිසා ඇතිවෙච්චි වරදකාරී හැඟීම නිසා ටයිරෝන් නිව්යෝර්ක් නගරය වෙතට පලායනවා.

• ටැන්ඩි බෝවෙන් (Dagger)

ඇය ජීවත් උනේ ඔහියෝ වල ශේකර් හයිට්ස් වල පොහොසතුන් පිරුණු පෙදෙසකයි. ඇයගේ මව මෙලිස්සා නම් තමන් ගැන පමණක්ම සිතන ධනවත් නිරූපිකාවක්. ඇය ධනවත් වෙන්නේ ඇයගේ රැකියාවෙන් පමණක්ම නෙවෙයි. ආත්මීය පුනරුප්පත්තිය සොයා ඉන්දියාවට ගිය පෙර සැමියාගේ සැමියාගේ (ටැන්ඩි ගේ පියා) දේපළ පවරාගැනීම තුලින්ය. පසුව මෙලිස්සා Phillip Carlisle හා විවාහ උනත් සිය පියාගේ නික්ම යාම නිසා සිත්බිඳි සිටි ටැන්ඩි ඔහු තමාට දැක්වූ කරුණාව ප්‍රතික්ෂේප කල අතර මේ නිසා මෙලිස්සාද ඇය ව නොසලකා හැරියා. කිසිවෙකුගේ ආදරය නොලැබේ යැයි සිතමින් සිටි ටැන්ඩි Rob Daltry නම් වැඩිමහල් තරුණයෙකු හා පෙමින් බැඳෙනවා. ටික කලකින් ඔහුද කොලේජයට යාමට ගිය නිසා ටැන්ඩි සියල්ල අතහැර බසයකට නැගී නිව්යෝර්ක් වෙත ආවා.

---

නිව්යෝර්ක් වල බස් නැවතුමේදී ටැන්ඩි ගේ පසුම්බිය මංකොල්ලකන්න හදපු අවස්ථාවක එය වලක්වලා ඇයගේ පසුම්බිය නැවත ලබාදෙන්නට ටයිරෝන් සමත්වෙනවා. මේ හමුවීමන් පස්සේ මේ දෙන්න ඉක්මනින්ම හොඳ මිතුරන් බවට පත් වෙනවා. නිව්රෝර්ක් වලදී හමුවෙන පුද්ගලයෙක් ඔවුන්ට ආහාර සහ සෙවනක් ලබාදෙන බවට පවසා ඔහු සමඟ පැමිණෙන්නට ආරාධනා කරනවා. මේ දෙදෙනා මෙන්ම තවත් පළායන යොවුන් පිරිසක් රැගෙන යන මේ තැනැත්තා Dr. Simon Marshall. ඔහු මේ රැගෙන යන පිරිස සිහි නැති කරවා Maggia නම් කණ්ඩායමක් විසින් නිර්මාණය කෙරුණු D’Spayre නම් මත්ද්‍රව්‍යක් එන්නත් කරනවා. මේ මත්ද්‍රව්‍ය හෙරොයින් වෙනුවට ආදේශකයක් ලෙස නිර්මාණය කෙරුණක්. මේ මත්ද්‍රව්‍ය නිසා ටැන්ඩි සහ ටයිරෝන් සහ තවත් අයෙක් හැර අනිත් සියල්ලන්ම මිය යනවා. ටැන්ඩි සහ ටයිරෝන් සමඟ බේරෙන අනිත් කෙනා තමයි පසුකලකදී මිස්ටර් නෙගටිව් නම් තැනැත්තා වන්නේ.

මේ තිදෙනා එතැනින් පළායන අතරතුර බේරීම සඳහා අසල තිබූ ගඟකට පනිනවා. මෙතනදී ටැන්ඩි සහ ටයිරෝන්ගේ බලයන් ක්‍රියාත්මක වෙනවා.  මෙතැනදී ටයිරෝන් ට දැනෙනවා තමන්ව අඳුරෙන් ගිලගන්නා ලද බවක් සහ අමුතුම කුසගින්නක්. අතිශය දීප්තිමත් වෙමින් සිටි ටැන්ඩි ගේ එම ආලෝකය නිසා ඔහුට පහසුවක් දැනෙනවා.  ඒ මොහොතේ එතැනට පැමිණි මාර්ෂල් ගේ මිනිසුන්ව ටැන්ඩි ආලෝක කිරිච්චි වලින් සිර කරන මොහොතේ ටයිරෝන්ගේ අඳුරෙන් ඔවුන්ව ගිලගන්නවා.

ටයිරෝන් විසින් තමන්ගේ අලුත් අඳුරු සෙවනැලි පෙනුම වසාගන්නට දිග ආවරයක් පොරවා ගනන්වා. මේ පොරවාගත් ආවරණය නිසා තමා ඔහු තම නම ලෙස ක්ලොක් යන්න යොදාගන්නේ.  එමෙන්ම ටැන්ඩි හට පුළුවන් වෙනවා ආලෝකයෙන් කිරිච්චි (පිහි වැනි) නිර්මානය කරගන්නට. මේ නිසා ඇය තම නම ලෙස ඩැගර් (කිරිච්චි) යන්න යොදාගන්නවා.

---

• ක්ලොක්

ටයිරෝන් ගේ සිරුර ඩාර්ක්ෆෝර්ස් නම් කළුපැහැ අමුතුම ශක්තියකින් යුක්ත මානයට සම්බන්ද වන දොරටුවක්. මේ මානය යටත් කරගෙන සිටින විලෝපිකයා නිසා ටයිරෝන්ට පණ ඇති ජීවීන් උරා ගැනීමට පාලනය කරගත නොහැකි ආශාවක් ඇති වනවා. නමුත් ටැන්ඩි ගේ ආලෝකය නිසා ඔහුගේ එම ආශාව තාවකාලිකව පාලනය කරගන්නට පුළුවන් වනවා.

ඔහුට පුළුවන් එම අඳුරු ශක්තිය යොදාගෙන ඔහුගේ අවට අඳුරු බවට පත් කරන්නට.එම අඳුරට හසුවන අයට හිරිවැටෙන සුළු සීතලක් සහ ඔවුන්ගේ ජීවිතයේ දැවැන්තම බිය සහ නරකම සිහිනයන් සිහිපත් වෙනවා.

එමෙන්ම මේ අඳුරු මානය නිසා ඔහුට එය උපයෝගී කරගෙන තැනින් තැනට ගමන් කරන්නට පුළුවන් (ටෙලිපෝර්ට් වන්නට පුළුවන්.) තනියම මෙන්ම ඔහුට අවශ්‍යනම් වෙනත් දෙයක් හෝ, වෙනත් අය සමඟද ගමන් කරන්නට පුළුවන්.

තවද ඝන දේවල් තුලින් ඔහුට ගමන් කරන්නට පුළුවන් ඒ අඳුරු ශක්තිය නිසා. උදාහරණයක් ලෙස වෙඩි තැබීමකදී උණ්ඩ ඔහුගේ සිරුර හරහා හානියකින් තොරව යන්නට හැකියි.

---

• ඩැගර්

ටැන්ඩි ගේ Lightforce නම් ජීව ශක්තිය සාමන්‍ය අයට වඩා බොහෝ වැඩියි. ඇයට තම ජීව ශක්තිය හරහා ජීව ආලෝකය නිර්මාණය කරන්නට පුළුවන්.  ඇය නිතැතින්ම තම බලය ලබාගත්තද මිස්ටර් නෙගටිව් ගේ හමුවකින් පසුව ඩාර්ක්ෆෝර්ස් මානයෙන් බලය ලබාගන්නට හැකි වනවා. ඇය සතියක් වගේ හෝ ඊට වඩා එක දිගට තම බලය පාවිච්චි නොකර හිටියොත් ඇය කලබල සහිත උමතු වැනි තත්වයකට ඇවිත් ඇයගේ බලය අවසානයේදී නිතැතින්ම පිටකිරීමකට ලක් වෙනවා.

ඇයට තම ඇඟිලි තුඩු මතින් අඟල් 6 ක පමණ කිරිච්චියක් ජීව ආලෝකයෙන් නිර්මාණය කරන්නට පුළුවන්. හදිසි අනතුරක් වැනි සමහර හදිසි අවස්ථා වලදී මේ කිරිච්චි නිතැතින්ම නිර්මාණය වෙනවා. මේ කිරිච්චි නිර්මාණය කල හැකි උපරිම දිග නොදන්නවා වුවද ඒවා දික්වන තරමට දුර්වල වන බව පැහැදිලියි. ඇයට මේ තුලින් වෙනත් අයගේ ජීව ශක්තියෙන් කොටසක් උරාගන්නට පුළුවන්. ඇයට වුවමනානම් එම තැනැත්තා මිය යන මට්ටමටම ජීව ශක්තිය උරාගන්නට පුළුවන්. මේ කිරිච්චි තුලින් එය වදින තැනැත්තාට තම ජීවිතයේ වැරදි ක්‍රියා සිහියට නගන්නට පුළුවන්.

ඇයගේ ශක්තියෙන් ඇයට පුළුවන් වෙනත් අයකුගේ සිරුරේ තිබෙන විෂ, මත්ද්‍රව්‍ය වැනි දේ ඉවත් කර දමන්නට.

එමෙන්ම ඇයට පුළුවන් ජීව ශක්තිය සහ ජීව ආලෝකය පාලනය කිරීමට. නිදසුනක් ලෙස කියනවානම් ඇයට පුළුවන් සමහර වෙලාවට ඇයගේ ආලෝක කිරිච්චි විසිකර දමන්නට (ඉලක්කයට පිහීයක් විසි කරන්නාක් මෙන්). ඇයගේ කිරිච්චි ජීවී නොවන දේ වලට හානියක් කරන්නේ නැහැ. තවද ඇයට පුළුවන් තම ජීව ආලෝක පරාසය වැඩි කරන්නට. මේ නිසා අඳුරු තැන් පවා ආලෝකමත්ව දකින්නට ඇයට පුළුවන්. මේ නිසා ක්ලොක් ගේ කුසගින්න පාලනය කරන්නට මෙන්ම ඔහු සමඟ හානියකින් තොරව අඳුරු මානය හරහා ගමන් කරන්නට පුළුවන්.

---

ඉතින් මේ දෙන්නා ගැන කිව්වා ඇති කියල හිතනවා. හැබැයි රූපවාහිනී කතාව විතරක් බලපු අයට මේ කොමික් කතාව විකාරයි වගේ දැනෙනවා ඇති. ඒත් ඉතින් mcu එක කියන්නේ මාර්වල් මල්ටිවර්ස් එකේ වෙනමම විශ්වයක් නිසා කතාව කිසි ගැටලුවකින් තොරවම වෙනස් කරන්නට පුළුවන්. ඉතින් අද මේ කතාව අරන් ආවේ ඔයාලට ක්ලොක් සහ ඩැගර් ගේ කොමික් කතාව කොහොමද කියල හඳුනවලා දෙන්නටයි. ඉතින් හිතනවා කියපු පොඩි කරුණු ටිකෙන් ඔයාලට මේ චරිත දෙක හඳුනා ගන්නට පුළුවන් වුනා කියලා.

ඉතින් මේ කතාවත් කියවලා ඔයාල tv සීරිස් එක රසවිඳින්න. දැනට ආව කොටස් දෙක අනුව mcu එකට ගැලපෙන විදියට නිර්මාණය වෙන මේ කතාවත් ඔයාලව අපූර්ව ලෝකයකට රැගෙන යාවි. අහ ඒ වගේම මාර්වල් රනවේස් සීරිස් එක එක්ක මේ සීරිස් එකත් ක්‍රොස්ඕවර් වෙනවා කියල තියෙනවා. ඉදිරි කොටස් 8 ඇතුලේ ඒක සිද්ද වේවි. ඒ වගේම ස්ටෑන් ලී කැමියෝ එකත් මගහරවා ගන්න එපා.