The 100 පස්වෙනි කතා සමයේ මොනවා වේවිද.?

වර්ශ 2014 මාර්තු 19 වෙනිදා CW නාලිකාවේ විකාශනය ආරම්භ වෙන The 100 කතා මාලාවට පාදක වෙන්නේ Kass Morgan විසින් රචනා කරන ලද The 100 කියන විද්‍යා ප්‍රබන්ධ කතා මාලාව. IMDB දර්ශකයේ 7.8 ක අගයක් අරගෙන මේ කතා මාලාව ලොව පුරාම අතිශයින් ජනප්‍රිය වෙලා තියනවා. මේ ලිපියෙන් මම කතා කරන්න බලාපොරොත්තු වෙන්නේ තව දින කීපයකින් නිකුත් වෙන්න තියන The 100 පස්වෙනි කතා මාලාවේදී අපිට දකින්න පුළුවන් වේවි කියලා අනුමාන කරන්න පුළුවන් දේවල් කීපයක් ගැන කතා කරන්න. ඊට කලියෙන් අපි බලමු පස්වෙනි අදියරට වෙනකල් කතාව කොහොමද ගලාගෙන ආවේ කියලා..

පලමුවෙනි කතා සමය (කතාංග 13) –

න්‍යශ්ටික බෝම්බ පිපුරුම් මාලාවක් නිසාවෙන් පෘථිවියේ ජීවය සම්පූර්ණයෙන්ම විනාශ වෙලා ගිහින්. ඉතිරි වෙලා ඉන්න ජන ප්‍රජාව ආක් මධ්‍යස්ථානය නමින් හැඳින්වෙන අභ්‍යවකාශ යානයක අවුරුදු 97 ක් දිවි ගෙවමින් සිටිනවා. ආක් මධ්‍යස්ථානයේ වැරදි වලට හසු උන තරුණ සිරකරුවන් 100 දෙනක් හදිසියේම පෘථිවියට පිටත් කර එවනවා පෘථිවියේ තත්ත්වය ජීවත් වීමට සුදුසුද කියලා පරීක්ශා කරලා බලන්න. නමුත් කවුරුවත් නොහිතන විදිහට විනාශයෙන් බේරුණ පිරිසක් තවමත් පෘථිවියේ දිවි ගෙවනවා කියලා මේ පිරිසට දැනගන්න ලැබෙනවා. ආක් මධ්‍යස්ථානයේත් තත්ත්වය නරක අතට හැරෙමින් තියෙන්නේ, භාවිතයට සුදුසු ආහාර සහ වාතය හිඟකම නිසාවෙන්. පොලොවට පැමිනෙන පිරිසට භූමිවාසීන්ගෙන් සිද්ධවෙන හිරිහැර, ක්ලාක්ගේ සහ බෙලමීගේ නායකත්වයෙන් අවසානයේදී මොවුන් විශාල යුද්ධයක් සිදු කරලා නවත්තගන්න හැකි උනත්, වෙනත් සොල්දාදුවන් පිරිසක් විසින් අවසාන කොටසේදී සිහි නැති කරලා මොවුන්ම මවුන්ට් වෙදර් කියන ස්ථානයට රැගෙන යනවා. ඒ වගේම ඇබී සහ කේන් ආක් මධ්‍යස්ථානය සාර්ථකව පොළොවට අරගෙන එන්නත් සමත් වෙනවා.

දෙවන කතා සමය (කතාංග 16) –

මවුන්ට් වෙදර් වලට රැගෙන ආව පිරිසට දැනගන්න ලැබෙනවා තමන් රැගෙන ඇවිල්ලා තියෙන්නේ මවුන්ට් වෙදර් වල ජීවත් වුන අයට විකිරණ සහිත පොළොව මතුපිටට නැවත යන්න පුළුවන් වෙන්න, ඔවුන්ගේ රුධිරය භාවිතා කරලා ප්‍රථිකාරයක් නිර්මාණය කරන්න කියලා. මේ අතරේ භූමි වාසීන් සමගත් වෙන ආරවුල් තවත් දරුණු තත්වයට ඇවිල්ලා දෙපිරිසම යුද්ධයකට සූදානම් වෙලා, ඔන්න මෙන්න තියෙද්දී සටන නැවතෙනවා. නමුත් මවුන් වෙදර් වලින් නිදහස් වෙන්න ක්ලාක්ට සිද්ධ වෙනවා මවුන්ට් වෙදර් වල ඉන්න සෑහෙන දෙනෙක්ව මරලා දමන්නට. නමුත් කතාව අවසන් වෙන්නේ කලින් වතාවේ වගේම නොහිතන මානයකට කතාව යොමු කරමින්. දෙවනි කතා සමයේ මැද්දී වගේ අපිට අහන්න ලැබෙන City of light එහෙමත් නැත්නම් අලෝකයේ නගරය හොයාගෙන පිටත්වෙන ජාහාට සැබෑවටම මේ නගරය සහ ඇලී කියන කෘත්‍රීම බුද්ධිය හමුවීමෙන් හමුවීමෙන්.

තුන්වෙනි කතා සමය (කතාංග 16) –

City of light, ආලෝකයේ නගරය තමයි කතාවේ ප්‍රධාන මාතෘකාව වෙන්නේ.බෙකා විසින් නිර්මාණය කරපු ඇලී විසින් ජීවත් වෙන සියළුම දෙනා ක්‍රම ක්‍රමයෙන් තමන්ගේ ග්‍රහණයට අරගනිමින් සිටියදී ක්ලාක්, රේවන් සහ බෙලමිගේ සැලසුම් වලින් ඇලීව අක්‍රීය කරලා දාන්න හැකි වෙනවා. නමුත් ලින්කන්, ලෙක්සා ඇතුළු කීප දෙනක්ටම අවසානයේ සිදුවෙන්නේ ජීවිතයෙන් වන්දි ගෙවන්න. ඇලීගේ කෘත්‍රීම බුද්ධිය රේවන්ගේ මොලයත් සමග බද්ධ වීම නිසාවෙන් රේවන්හටත් අසාමාන්‍ය බුද්ධිමත් බවක් ලැබෙනවා. කතා මාලාව අවසන් වෙන්නේ මෙතක් කල් මොවුනට පැමිණි තර්ජන සියල්ලටම වඩා වැඩි තර්ජනයක් පැමිනෙන බව කියන ඇලීගේ අනතුරු හැඟවීමත් එක්ක. එනම් මෙතෙක් කල් න්‍යශ්ට්ක පිපුරුම් වල තර්ජනය අවසානයි කියලා හිතාගෙන හිටියත්, ඉතිරිව තිබුණ න්‍යශ්ටික ප්‍රතිකාරක නිසා දරුණු න්‍යශ්ටික කුණාටුවකින් පෘථිවියම විනාශ වෙලා යනවා කියන එක.

හතරවෙනි කතා සමය (කතාංග 13) –

ඇලී සඳහන් කරපු න්‍යශ්ටික කුණාටුවෙන් බේරෙන්නට සුදුසු වෙන විදිහට ආක් මධ්‍යස්ථානය සකස් කලත්, අවසනාවන්ත විදිහට ආක් මධ්‍යස්ථානය විනාශ වෙලා යනවා. මේ නිසාවෙන් මොවුන් විවිධ ක්‍රම අත්හදා බලනවා මේ විකිරණ වල ආක්‍රමණයෙන් බේරෙන්න. ඒත් ඒ සියල්ලක්ම අසාර්ථක වෙන අතරේ ජාහාට බංකරයක් ගැන ලැබෙන හෝඩුවාවක් ඔස්සේ ගිහින් ඔහු සෑහෙන පිරිසකට කාලයක් සැඟවී ඉන්න පුළුවන් බංකරයක් සොයාගන්නවා. නමුත් සියලුම ගෝත්‍ර වලට මේකේ ජීවත් වෙන්න ඉඩක් නැති නිසාවෙන් සටනකින් ජයග්‍රහනය කරන කෙනා අයිති ගෝත්‍රයට බංකරයේ අයිතිය ලබා ගන්න පුළුවන් කියන තීරණය යටතේ සටනක් පවත්වනවා. (ඒ එපිසෝඩ් එක ගැන නම් කියන්න වචන නෑ, බලපු අයට මතක ඇති කොහොමද කියලා) කෙසේහෝ අවසානයේ සටනේ ජයග්‍රහණය හිමි වෙන්නේ ඔක්ටේවියාට. ඒත් ඔක්ටේවියාගේ තීරණය වෙන්නේ බංකරය හැමෝම එක්කම බෙදාගෙන ජීවත් වෙනවා කියන එක. මේ අතරේ ඇලීගේ දූපතේ නයිට් බ්ලඩ් ගැන පරීක්ශණ කරමින් හිටිය රේවන්, බෙලමි, මර්ෆි ඇතුළු පිරිසට කලට වේලාවට බංකරයට යාගන්න නොහැකි වෙන නිසා, ඔවුන් තෝරා ගන්නා විකල්පය වෙන්නේ දූපතේ තියන අභ්‍යවකාශ යානයෙන් ආක් මධ්‍යස්ථානයේ ඉතිරි වෙලා තියන කොටසට ගිහිල්ලා ජීවිතය බේරා ගන්න එක. නමුත් ක්ලාක්ට මේ එක විදිහකටවත් බේරිලා ඉන්න තැනක් හොයාගන්න ලැබෙන්නේ නෑ. නමුත් ඇය තීරණය කරන්නේ පෘථිවියට වෙලාම ඉන්න. මොකද ක්ලාක්ගේ ඇඟෙත් තියෙන්නේ නයිට් බ්ලඩ් නිසා.


ඔන්න ඔය වගේ අවසානයක් එක්ක තමයි අපිට පස්වෙනි කතා සමයට අවතීර්ණ වෙන්න වෙන්නේ. මෙතනදී වැදගත්ම දෙයක් වෙන්නේ හතරවෙනි කතා මාලාවේ අවසානයට පෙන්වන කොටස. න්‍යශ්ටික විනාශයෙන් අවුරුදු හයකට පස්සේ ක්ලාක් බෙලමිට රේඩියෝ පණිවිඩයක් යවන කොටස. මෙතනදී අපිට දකින්න බලාපොරොත්තු නොවුන දෙයක් දකින්න පුළුවන්. ඒ තමයි පරිසරයේ දකින්න පුළුවන් කොල පාට. මේ ගැන ක්ලාක්ගේ වචන වලිනුත් කියවෙනවා.

” කොහොම උනත් මට තාම බලාපොරොත්තුවක් තියනවා, රේවන්ට කියන්න කොලපාටට පේන එකම තැනට ඉලක්ක කරන්න කියලා “

මේ ගැන සීසන් 05 ට්‍රේලර් එකේත් ක්ලාක් කියන දෙබසක් තියනවා,

” මේක හරියට විකිරණ නිම්නයට උඩින් පැනගෙන ගිහිල්ලා වගේ “

කියලා. මෙතනින් අපිට හිතාගන්න පුළුවන් තවමත් වාසයට සුදුසු පරිසර පෘථිවියේ ඉතුරු වෙලා තියනවා කියන එක. සමහරවිට බේරිලා ඉන්න ජන කොටස් මෙතන ජීවත් වෙනවා වෙන්නත් පුළුවන්. මොකද සීසන් 04 අවසාන කොටසේදි හැමෝම පුදුමයට පත් කරමින් අපිට ක්ලාක් එක්ක ඉන්න තවත් පුංචි ගෑණු ළමයෙක් (මැඩී) දකින්න ලැබුනා. කොහොමද මෙයා විතරක් මෙහෙම බේරුණේ.? එක්කෝ කලින් කිව්වා වගේ තවමත් ජීවත් වෙලා ඉන්න ජන කොටසකින් කෙනෙක්, ඒ වගේම මෙයා නයිට්බ්ලඩ් කෙනෙක් (ක්ලාක් මැඩීට කතා කරන්නේ එහෙමයි) . කොහොම උනත් මේවට උත්තර අපිට පස්වෙනි කතා සමයෙන් ලබාගන්න පුළුවන් වේවි.

පස්වෙනි කතා සමය ගලාගෙන යන්නට සම්බන්ධ වෙන ප්‍රධාන කොටස් හතරක් මට බෙදලා වෙන් කරන්න පුළුවන්.

  1. ඔක්ටේවියා, ජාහා ඇතුළු බංකරයේ ජීවත් වෙන ගෝත්‍ර අතර සිදුවීම්.
  2. තනියම දිවි ගෙවන ක්ලාක්.
  3. බෙලමි, රේවන්, මර්ෆි ඇතුළුව අභ්‍යවකාශයේ දිවි ගෙවන අය අතර සිදුවීම්.
  4. අවසානයට, සීසන් 04 දී අපිට දැකගන්න ලැබුන අමුත්තන් පිරිස සම්බන්ධ සිදුවීම්

ඇත්තටම කවුද මේ හතරවෙනි සීසන් එකේදී අන්තිමට දකින්න ලැබුනේ. බැලූ බැල්මට අපිට පේන්නේ ක්ලාක් උනත් මේ ගැන කිසිම දෙයක් නොදන්න බවයි. ඒ වගේම කලින් සීසන් වලදිත් අපිට මේ ගැන කිසිම ඉඟියක්වත් ලැබුනේ නෑ. ඔයාලා හොඳට බැලුවානම් ඒ එන යානයේ බඳේ සටහන් කරලා තියනවා ELIGIUS Corporation / Prisoner Transport කියලා. පස්වෙනි කතා මාලාවේ ට්‍රේලර් එක බැලුවා නම් ඉන්න පිරිස ගැන පොඩි අවබෝධයක් අරගන්න පුළුවන්. මොකද එක දර්ශනයක් තියනවා මෙයින් එක්කෙනෙක් සොනික් තුවක්කුවක් වගේ උපකරණයකින් වෙඩි තියන එකක්. ඒ වගේ උපකරණ තියෙනවානම් හිතාගන්නකෝ ඉතින්.. ඒ වගේම මේ පිරිස අපිට පස්වෙනි කතා මාලාවේ ප්‍රතිවාදී කණ්ඩායම වෙනවා කියන එක අනුමාන කරන්න පුළුවන්. මොකද මෙච්චර කාලයක් තිස්සේ අභ්‍යවකාශයේ ඉඳලා එන පිරිස අනිවාර්යෙන්ම ඉතිරි වෙලා තියන භූමියට අයිතිවාසිකම් කියන නිසාවෙන්. අන්තර්ජාලයේ සඳහන් වෙන විදිහට මේ අය අතරිනුත් ප්‍රධානම ප්‍රතිවාදියා විදිහට නම් කරලා තියෙන්නේ Robert McCreary කියන චරිතය. මොහු තරමක් රළු ගති පැවතුම් තියන පතල් කරුවෙක් වෙන සිරකරුවෙක් කියලයි සඳහන් වෙන්නේ. බලමු ක්ලාක් මේ වතාවේ කොහොම මේ අය එක්ක හැප්පෙයිද කියලා.

තවත් විශේශම දෙයක් තමයි මෙතන තියන අවුරුදු හයක ටයිම් ජම්ප් එක. මේකනම් මඟ හැරලා කතාව ඉස්සරහට යන්න ටිකක් අමාරුයි. හතරවෙනි කතා මාලාවේ අන්තිමටම කෙලින්ම ආවේ අවුරුදු හයක් ඉස්සරහට. මෙතන ඉඳන් ඉදිරියට වෙන සිදුවීම් වලින් පටන් අරගෙන කතාව ඉස්සරහට ගලාගෙන යයි කියලා අපිට සෑහෙන්න ලොකු විශ්වාසයක් තියාගන්න පුළුවන්. හැබැයි අනිවාර්යෙන් අවුරුදු 6 ඇතුලත උන සිදුවීම් flash back සීන් විදිහට අපිට බලාගන්න පුළුවන් වේවි. මොකද The 100 කතා මාලාවේ ප්‍රධාන කතා තේමාව වෙන්නේ දිවි බේරා ගැනීම. ඒක නිසාවෙන් ක්ලාක් කොහොමද අවුරුදු හයක් නොමැරී ජීවත් උනේ, බංකරය ඇතුලේ ජීවත් වෙන අය කොහොමද ඔක්ටේවියාගේ නායකත්වය යටතේ ජීවත් උනේ, (අවසානයේදී කේන් ගෑස් දුමක් ගහලා ජීවත් විය යුතු, නොවිය යුතු අය තෝරා ගත්ත එකේ පල විපාක අපිට පස්වෙනි කතා සමයෙන් බලාගන්න පුළුවන් වේවි) සහ රේවන් ඇතුළු පිරිස කොහොමද නොමැරී අභ්‍යවකාශයේ ජීවත් උනේ.? කියන දේවල් වල පසු සිදුවීම් බලාගන්න පුළුවන් කියලා හිතන්න පුළුවන්.

ට්‍රේලර් එකේදී අපිට දකින්න ලැබුනා දර්ශනයක රේවන් (වෙන්න ඕන) සහ මර්ෆි සටන් කරන පොඩි කොටසක්, මේක ඇත්තටම පරණ තරහ පිරිමහගන්න සටනක්ද එහෙමත් නැත්නම් අභ්‍යවකාශයේ ඉන්න කාලයේ සටන් පුහුණු වීමක් වගේ දෙයක්දත් කියන්න බෑ. මොකද 2017 සැන් ඩියාගේ කොමිකෝන් එකේ The 100 පැනල් ඩිශ්කශන් එකේදී ප්‍රේක්ශකයෙක් ප්‍රශ්නයක් යොමු කරනවා The 100 චරිත වල මොන වගේ වෙනස්කම් වෙනවානම්ද ආසා කරන්නේ කියලා. රේවන්ගේ චරිතයට පණපොවන Lindsey Morgan ප්‍රශ්ණයට පිළිතුර විදිහට දෙන්නේ ” මම කැමතියි රේවන් සටන් කරන්න ඉගෙන ගන්නවානම් “ කියලා. මේ අතරේදී එකවරම The 100 නිශ්පාදක වෙන Jason Rothenberg කියනවා ” ඔයා ඉගෙන ගනීවී “ කියලා. ඉතින්….. අපිට චරිත වල වල වෙනස්කම් ගැනත් බලාපොරොත්තු තියාගන්න පුළුවන්. මගේ නම් මතය මර්ෆිගේත් මැර ගති පොඩ්ඩක් අඩු වේවි කියලා.

අන්තිමටම සඳහන් කරන්නම ඕන කෙනා, ඔක්ටේවියා. The 100 කතාමාලාවේ අපි හැමෝම ආසා කරන විදිහට කැරැක්ටර් එක බිල්ඩ් අප් වෙලා ආව කෙනෙක් තමයි ඔක්ටේවියා. මුළින්ම පොළොවට එන්නේ සුකොමාල ගෑණු ළමයෙක් විදිහට උනත් පස්සේ අති දක්ශ සටන් කාරිණියක් වෙනවා. අවසානයේදී ගෝත්‍ර සියල්ලටම නායිකාවක්. අවුරුදු හය ඇතුළත බංකරය ඇතුලේ තත්ත්වේ නරකෙනුත් නරක අතට හැරෙනවා කියන එකනම් අමුතුවෙන් කියන්න ඕන කාරණාවක් නෙවෙයිනේ. ට්‍රේලර්වලදිත් අපිට දකින්න ලැබුනා ඔක්ටේවියා තවත් අය එක්ක සටන් කරන දර්ශන කීපයක්ම. ඒ වගේම CW ආයතනය සමාජ මාධ්‍ය ඔස්සේ ඔක්ටේවියා වෙනුවෙන් විතරක් පොඩි ට්‍රේලර් එකක් නිකුත් කරල තිබුනා. ඒකේ දකින්න ලැබුන හැටියටත් ඔක්ටෙවියා බොහෝම දරුණු පාලනයක් ගෙනියන කෙනෙක් විදිහට අපිට බලාගන්න ලැබේවි කියලා අපිට අනුමාන කරන්න පුළුවන්.

එහෙනම් ඔන්න ඔය වගේ දේවල් The 100 කතා මාලාවේ පස්වෙනි කතා මාලාව ගලාගෙන යන කතාංග 13 ඇතුළත දකින්න පුළුවන් වේවි කියලා අනුමාන කරන්න අපිට පුළුවන්. හැමදාමත් වගේ The 100 කතා මාලාව අවසාන උනේ අපිව පුදුම වෙන විදිහේ දේවල් වලින්. මේ වතාවෙත් එහෙම දෙයක් දකින්න ලැබේවි කියලා අපි හිතමු. මොකද පොත් මාලාව ආශ්‍රයෙන් කතාව නිර්මාණය උනත් 100% ක්ම ඒ දේවල්ම අපිට දකින්න බැහැනේ. ඉතින් කොහොම උනත් හැමෝම ආසා කරන, පෞද්ගලිකව මගේත් ප්‍රියතම කතා මාලාවක් වෙන The 100 කතා මාලාවේ සීසන් 5 ප්‍රිමියර් එක අප්‍රේල් මාසේ 24 වෙනිදා නිකුත් වෙනවා. බලලම අපි තීරණය කරමු කතාව කොයි විදිහට කතාව ගලාගෙන යාවිද කියලා. මම දුන්නේ අනුමානයන් කීපයක් විතරයි. එහෙනම් මේ දීර්ඝ ලිපිය අවසාන කරන්නයි මේ සූදානම..

The 100 විදිහටම
” May we meet again “

කවින්ද . බුද්ධික (2 Posts)


2 thoughts on “The 100 පස්වෙනි කතා සමයේ මොනවා වේවිද.?

  • May 10, 2018 at 8:12 PM
    Permalink

    thanks for the review.

  • April 24, 2018 at 7:13 PM
    Permalink

    අන්තිමට අවා වාහනේ මේ අය වගේ අහසේ ඉදපු තව කට්ටියක් වෙන්ඩත් ඉඩ තියෙනවනේද

Leave a Reply

Your email address will not be published. Required fields are marked *