Black Panther – වකන්ඩා රටේ රජතුමා හා ආරක්ෂකයා බ්ලැක් පැන්තර්

බ්ලැක් පැන්තර්” කියන්නේ ඇමෙරිකාවේ කොමික් පොත්වල මාවල් කොමික් විසින් ප්‍රකාශිත සුපිරි වීර චරිතයක්. මේ චරිතය නිර්මාණය කරලා තියෙන්නේ අපි කවුරුත් හොඳින්ම දන්න හඳුනන හැම මාවල් චිත්‍රපටයකම, ඇනිමේෂන් එකකම පාහේ කැමියෝ එකක් දකින ස්ටෑන් ලී විසින් සහ ජැක් කර්බි විසින්. මුලින්ම මේ බ්ලැක් පැන්තර් චරිතය ජනතාව අතරට එන්නේ Fantastic Four #52 (ජූලි 1966)  ඒ කිව්වේ කොමික් පොත්වල රිදීමය යුගයෙයි.

 

 

 

 

 

 

 

 

 

 

 

 

Fantastic Four #52 (ජූලි 1966) 

මෙතනින් පටන්ගන්න බ්ලැක් පැන්තර් ගොඩක් කොමික් පොත් වල අමුත්තෙක් විදිහට පෙනී ඉන්නවා. පසු කාලයේ බ්ලැක් පැන්තර් නිව්යෝක් වලට යනවා The Avengers #52 (මැයි 1968) කොමික් පොතේදී ඇවෙන්ජර්ස්ලා සමග වැඩ කරන්න, ඇවෙන්ජර්ස් එක්ක වැඩ කරන අතරේම Daredevil එකේදිත් Doctor Doom සමග සටන් කිරීමට Astonishing Tales #6–7 (1971) පොත්වලටත් එක් වනවා. ඔහුට මුල්ම ප්‍රධාන චරිතයක් විදිහට පෙනී ඉන්න ලැබෙන්නේ Jungle Action #5 (ජූලි 1973) ප්‍රකාශනයෙන්. 
Jungle Action #5 (ජූලි 1973) 
කොමික්වල බ්ලැක් පැන්තර් ගැන කතා කරද්දී ඔහුගේ සැබෑ නම තමයි ටි’චල්ලා. අප්‍රිකාවේ වකන්ඩා කියන මනඃකල්පිත කුඩා රටේ රජතුමා සහ ආරක්ෂකයා ඔහුයි. වකන්ඩා රටේ තියෙනවා හදවතක හැඩය ගත්තු ශාකයක්. ඒ ශාකයෙ යුෂ බ්ලැක් පැන්තර් කෙනෙක්නම් ඔහු බොන්න ඕනේ. ඒකෙන් ශක්තිය වැඩි වීමක් වෙනවා කියලා විශ්වාස කෙරෙනවා. ටි’චල්ලා විද්‍යාව විෂයේ ප්‍රවීණයෙක්, හොඳ කාය පුහුණුවක් ලබලා තියෙනවා, සටන් කලාව දියුණු කර ඇති ඔහුට සතුරන්ට විරුද්ධව භාවිතා කිරීම සඳහා ධනය සහ යුධ තාක්ෂණයත් ඔහු සතුව තිබෙනවා.
 
බ්ලැක් පැන්තර් තවත් විශේෂ වන්නේ ඇමරිකාවේ කොමික්වල අප අතරට ආව පළමු අප්‍රිකානු සුපිරි වීරයා වන නිසයි. ඒ කිව්වේ අපි දන්නා ෆැල්කන් (1969), ලූක් කේජ් (1972) වගේම DC කොමික්වල එන ග්‍රීන් ලැන්ටන් චරිතයක් වන ජෝන් ස්ටුවට්ටත් (1971) කලින් තමයි බ්ලැක් පැන්තර්ගේ එළිදැකීම සිදු වෙන්නේ.
 
අද වෙද්දී බ්ලැක් පැන්තර් රූපවාහිනී කතාංගවලින්, ඇනිමේටඩ් චිත්‍රපටවලින් සහ වීඩියෝ ක්‍රීඩාවලින් අප අතරට ඇවිල්ලා තියෙනවා. බ්ලැක් පැන්තර් චරිතය ගැන කතා කරද්දී අමතක කරන්නම බැරි දේ තමයි MCU හෙවත් මාවල් සිනමා විශ්වය කියන්නේ. අපිට MCU එක තුළ පළමු වතාවට 2016 වසරේදී Chadwick Bosemanගේ විශිෂ්ඨ රංගනයෙන් හැඩ වුණු බ්ලැක් පැන්තර්ව Captain America: Civil War (2016) සිනමාපටයෙන්  මුණගැහෙනවා. ඒ විතරක් නෙමෙයි මේ වන විට වාර්තා පිට වාර්තා තබමින් තිරගත වෙමින් පසුවෙනවා MCU එකට අදාළ බ්ලැක් පැන්තර්ගේම සොලෝ චිත්‍රපටය වන Black Panther (2018). 2011දී IGN කියන මාධ්‍ය ආයතනය විසින් නම් කළ “Top 100 Comic Books Heroes” ලැයිස්තුවේ 51වෙනි තැන ලබාගන්නත් බ්ලැක් පැන්තර් සමත්කම් කිව්වා.
Black Panther (2018) 
කවුද මේ බ්ලැක් පැන්තර්?
 
බ්ලැක් පැන්තර් කියන්නේ මූලිකවම යම් පුද්ගල චරිතයක් නෙමෙයි, වකන්ඩාවේ පවතින චාරිත්‍රානුකූල පදවියක්. හරියට ජනාධිපති කෙනෙක් හෝ රජ කෙනෙක් වගේ. කලින් කියලා තිබුනා වගේ වකන්ඩාව පාලනය කරන එක සහ ආරක්ෂා කිරීම බ්ලැක් පැන්තර්ගේ වගකීමයි. 
 
මාවල් කොමික් ලොව වටිනාම ලෝහය වයිබ්‍රේනියම්…
 
බ්ලැක් පැන්තර්, වකන්ඩාව ගැන කතා කරද්දී අමතක කරන්නම බැරි දේ තමයි වයිබ්‍රේනියම්. වයිබ්‍රේනියම් වලින් කෙරෙන කාර්ය තමයි කම්පන උරාගැනීම. තව මේ ගැන සඳහන් කරන්න උවමනා නෑනේ මාවල් සිනමා විශ්වයේ රසිකයෙක්නම්. ඉතින් මේ වයිබ්‍රේනියම් වකන්ඩාවට කඩා පාත් වෙන්නේ මීට අවුරුදු 10,000කට පමණ පෙර උල්කාවක් මගින්. මේ වටිනා ලෝහය ආරක්ෂා කිරීමත් බ්ලැක් පැන්තර්ගේ වගකීමක්.
 
බ්ලැක් පැන්තර් පදවිය  ලැබෙන්නේ කොහොමද?
 
බ්ලැක් පැන්තර් පදවිය නොහොත් මේ වකන්ඩා රජකම ලබාගැනීමට අවුරුදුපතා සටනක් පැවැත්වෙනවා. මේ සටනේදී ඉන්න ඕනම කෙනෙක්ට පුළුවන් ඉන්න බ්ලැක් පැන්තර් එක්ක සටන් කරලා ඒකෙන් දිනලා රජකම ලබාගන්න. 
 
නව බ්ලැක් පැන්තර්, ටි’චල්ලාගේ ආගමනය
 
අපි දන්න මෑත අතීතයේ මේ රජකම ලබාගත්තු බ්ලැක් පැන්තර් කෙනෙක් තමයි ටි’චල්ලාගේ පියා වන ටි’චකා. ටි’චකා ඉහල මම කිව්ව වයිබ්‍රේනියම් ගැන ලෝකයට සඟවනවා. ඒ වෙන හේතුවක් නිසා නෙමෙයි පිටස්තරයන් විසින් මේ ලෝහය ගන්න එන නිසයි. කාලයේ ඇවෑමත් සමග ටි’චකාගේ පළමු බිරිඳ වුණු න’යාමි ටි’චල්ලාට උපත ලබා දීමේදී මිය යනවා. ටි’චකාගේ දෙවන බිරිඳ රමොන්ඩාව, තමන්ගේ වාසභූමිය වූ දකුණු අප්‍රිකාවට ගිය අතරතුරකදී  ඇන්ටන් ප්‍රෙටෝරියස් විසින් ඇයව සිරභාරයට ගන්නවා. මෙන්න මේ හේතු නිසාවෙන් වී’චල්ලා වැඩි කොටසක් හැදී වැඩෙන්නේ තමන්ගේ පියා යටතේයි. පසු කලක යුලිසියස් ක්ලෝව්නම් පුද්ගලයෙක් වයිබ්‍රේනියම් ගොඩැල්ල ඒ කිව්වේ එයාලගේ වයිබ්‍රේනියම් නිධි අත්පත් කරගැනීමට පැමිණ, ටි’චකාවත් ඝාතනයට ලක් කරනවා. ටි’චල්ලා පොඩි නිසා රජකම ලබාගන්න සුදුසු වයස එළඹෙනකල් රජකම හිමි වෙන්නේ ස්’යාන් නොහොත් ටි’චකාගේ පොඩි මල්ලිටයි. ටි’චල්ලා වැඩිහිටි වූ පසු අවුරුදුපතා රජකම වෙනුවෙන් පැවතුනු සටනින් දිනා බ්ලැක් පැන්තර් පදවිය නැත්නං වකන්ඩා රජකම ලබාගන්න සමත් වෙනවා.
 
මේ තොරතුරු ටිකෙන් බ්ලැක් පැන්තර් ගැන දළ අදහසක් ලබාගන්න ඔයාලට පුළුවන් වෙන්න ඇති කියලා හිතනව. 
 
තවදුරටත් විස්තර දැනගන්න පුළුවන් වේවි Black Panther (2010) ඇනිමේෂන් රූපවාහිනී කෙටි කතා මාලාවෙන් (මේ කතා මාලාවට සිංහල උපසිරස ළඟදීම බයිස්කෝප් සිංහලෙන් අඩවියෙන් ලැබෙන්න නියමිතයි) ඒ වගේම තිරගත වෙමින් පවතින Black Panther (2018) චිත්‍රපටයෙන්.
එල් සී දමැල් (28 Posts)


4 thoughts on “Black Panther – වකන්ඩා රටේ රජතුමා හා ආරක්ෂකයා බ්ලැක් පැන්තර්

Leave a Reply

Your email address will not be published. Required fields are marked *

error: Content is protected !!