ස්නයිඩර් දුටු අප නොදුටු යුක්තියේ ලීගය….

හැමෝම දන්නවානේ Justice League චිත්‍රපටය ගැන.  හැමෝම මග බලාගෙන හිටියේ සැක් ස්නයිඩර් කලින් අධ්‍යක්ෂණය කල Watchmen වගේ නිර්මාණයක් වෙනුවෙන්.එහෙමත්  නැති නම් මාස්ටර්පීස් එකක් දැකගන්න ලැබේවි කියලා. ඉතින් ස්නයිඩර්ගේ සහ අපේ අවාසනාවට ඒ වාසනාව අපිට අහිමි කලේ අධ්‍යක්ෂක ස්නයිඩර්ගේ දියණියගේ අකල් වියෝවයි. කලින් පැය තුනකට අධික කාලයක් පුරා විසිරුන මේ චිත්‍රපටය වර්තමානයේ පැය  දෙකක් වගේ කෙටි කාලයකට අඩුවෙලා DC සිනමා විශ්වය තුල නිර්මාණය උන කෙටිම චිත්‍රපටය විදිහට අදටත් සිනමා ශාලා වල තිරගත වෙනවා. ස්නයිඩර්  දියණියගේ වියෝවත් සමඟ අවසන් අදියරේ පැවති Justice League චිත්‍රපටයේ ඉතිරි වැඩකටයුතු භාරවෙන්නේ මීටකලින් මාවල් සිනමා විශ්වයේ තවත් දැවැන්ත චිත්‍රපට අධ්‍යක්ෂකවරයෙක් වූ ජොස් වේඩන්  හට. ජොස් වේඩන් තමයි ඇවෙන්ජර්ස් චිත්‍රපට මාලාවේ දෙවැන්න තෙක් අධ්‍යක්ෂකවරයා සහ එහි රචකයා උනේ.  කොහොමඋනත් 80%  අවසන් වූ චිත්‍රපටයකට නවක අධ්‍යක්ෂකවරයෙක්  මගින් සිදු උනේ සාධාරණයකට වඩා අසාධාරණයක්  කියලා තමා කියන්න වෙන්නේ. චිත්‍රපටය නැරඹුවෙක් ලෙස පෞද්ගලිකවම මගේ මතය නම් එයයි.

මොකද මේ චිත්‍රපටය BvS  චිත්‍රපටයෙන් පසු ස්නයිඩර්ගේ සිහිනයක් වගේ දෙයක් උනා. කලින් සිදුවූ වැරදි මග අරවාගෙන සෑම දෙයක්ම පැහැදිලි කරමින් පැය තුනක් වගේ අධික කාලයක් පුරාවට මේ සලරුව පෙළ ගැස්වුයේ එහි තිබෙන සියලුම සියුම් තැන් මනාලෙස හඳුනාගෙන ප්‍රේක්ෂකයන් තුලට DC සිනමා විශ්වය කාවැද්දීමේ  සහිතවයි.  ඒ  සියල්ලක්ම පසෙකලා WB හෙවත් Warner Brothers සමාගම තීරණය කලේ නව අධ්‍යක්ෂකවරයා යටතේ මෙහි දර්ශන කාලය පැය දෙකකට අඩුකරන්න. එහි සාර්ථක අසාර්ථක බව තීරණය  කරන්න ඔයාලටම දෙන්නම්. දැන් මම මේ කියන්න යන්නේ ස්නයිඩර් දුටු අප නොදුටු යුක්තියේ ලීගය තුල අපි නොදුටු පැතිකඩවල් මොනවද කියල විස්තර කරන්න. මුලින් අන්තර්ගත වූ කපා දැමු කොටස් වගේම කෙටි කල කොටස් මොනවද කියල කියන්නයි මේ සූදානම. චිත්‍රපටයේ ආරම්භයේ සිට මම  වෙනස්කල ඉවත් කල දර්ශන ගැන හැඳින්වීමක් කරන්නම්.

1. Shortened  – ඇක්වාමෑන්  කණ්ඩායමට බඳවා ගැනීමේ රාජකාරිය  බෘස් වේන් හට පහසු එකක් වෙන්නේ නැහැ. මොකද ඇක්වාමෑන් කියන්නේ තරමක් දරදඬු, දඩබ්බර සහ ස්වාධීනව වැඩ කරන්න කැමති කෙනෙක්. ඔහුව බඳවා ගැනීම මීට වඩා දීර්ග දර්ශන සහ දෙබස්  එකක්. මොකද ඔහු කැමති නැහැ ගොඩබිම වෙසෙන මිනිසුන් එක්ක ගනුදෙනු කරන්න. එහිදී සැක් විසින් යෙදු සමහරක් දෙබස් ඉවත් වී වේඩන් යෙදු දෙබස් එකතුවී  තිබෙනවා. ට්‍රේලරයේ සහ චිත්‍රපටයේ දර්ශන සංසදනය කිරීමෙන් ඔබට ඒ වෙනස දැකගන්න පුළුවන්.
2. Deleted – ෆ්ලෑෂ් හෙවත් බැරි ඇලන්ගේ  දර්ශනයක් මුළුමනින්ම කපා දමා තිබෙනවා. ඒ තමයි ඔහු වීදුරුවක් බිඳගෙන අයිරිස් වෙස්ට්  යාමට උත්සහ කරන දර්ශණය. මේ තමයි මේ චිත්‍රපටය තුලින් මුලින් දකින චරිත වල ඉතිහාසය ප්‍රේක්ෂකයාට හඳුන්වා දෙන දර්ශන. ඉතින් ඒ දර්ශනය චිත්‍රපටය බලන්න ගිය ඔබට මට දකින්න ලැබුනේ නැහැ.
3. Deleted – අතීතයේ පවතී යුද්ධයට පෙර පවතී දෙබස් සහිත දර්ශන පෙළක් කපා දමා තිබෙනවා. එහිදී ග්‍රීන් ලැන්ටර්න්, සියුස්, ඒරිස් (වොන්ඩර්වුමන් චිත්‍රපටයේ දුෂ්ඨයා) සිදුවූ දෙබස් සහිත දර්ශන කප්පාදු කර තිබෙනවා.ඒ වෙනුවට කෙලින්ම යුද්ධය සහිත දර්ශන වෙතට යොමුවී තිබෙනවා.
4. Deleted – තෙමිස්කිරාව තුල ආරක්ෂිතව ඇමසෝනියන් කාන්තාවන්ගේ ආරක්ෂාව යටතේ  තිබුන මදර්බොක්ස් එක ස්ටෙපන්වුල්ෆ් පැහැර ගත් පසු ඔහු මදර් බොක්ස් එක සමඟ කතා කරන අවස්ථාවක් කලින් තිබුනා. සේටපන්වුල්ෆ් මව හෙවත් හේග්‍රා ජිවත් වෙන්නේ මේ බොක්ස් වල. මේ බොක්ස් එකතු කිරීම මගින් ඔහු බලාපොරොත්තු වෙන්නේ සිය මෑණියන් සතු බලය මුදාහැරීමක්. එමගින් ඩාක්සයිඩ් හෙවත් තමන්ගේ මාමාගෙන් යම් වාසියක් ලබාගැනීමටයි ඔහු බලාපොරොත්තු වෙන්නේ. මේ දෙබස ස්නයිඩර්  අන්තර්ගත  තිබුනා. ඔයාල දකින්න ඇති ස්ටේපන්වුල්ෆ් කියන දෙබසක් තිබුනා මෙන්න මෙහෙම  “No protectors here. No Lanterns. This world will fall. You will be free, mother.”  මේ ගැන බලාපොරොත්තුවෙන් යන ඔයාලට ඒ දර්ශනය දකින්න ලැබෙන්නේ නැහැ.
5. Deleted – තවත් නව චරිතයක් තමයි සයිබෝර්ග් කියන්නේ. අර්ධයක් මිනිස්  අර්ධයක් යන්ත්‍රයක් වන ඔහුගේ අතිතාවලෝකනය වේඩන් අවසන් කල චිත්‍රපටයේ දකින්න ලැබෙන්නේ නැහැ.ඔහුගේ මව, ඔහු ගෝතම් ක්‍රීඩා සමාජයේ පාපන්දු ක්‍රීඩා කරන අයුරු දැක්වෙන දර්ශනයක් අන්තර්ගතයි. එහිදී තරඟය ජයග්‍රහණය කරන වික්ටර් තම පියාණන් තරඟය බැලීමට නොපැමිණීම නිසා කේන්තියෙන් සිටිනවා. එහිදී වේගයෙන් තම රථය ධාවනය කරන ඔහුට දරුණු අනතුරකට මු හුණ දෙන්න සිද්ධ වෙනවා. ඒ ආකාරයට තමයි වික්ටර් සයිබෝග් බවට පත්වෙන මූලික කරුණු සිද්ධ වෙන්නේ.ඉතින් මේ සිදුවීම් අපිට දැකගන්න ලැබෙන්නේ නැහැ.
6. Shortened – ජිම් ගෝර්ඩන් දර්ශනය වඩා දිගු දර්ශනයක් ලෙසටයි ස්නයිඩර් නිර්මාණය කර තිබෙන්නේ. එය පවා කප්පාදු කිරීමකට ලක්  වෙලා. ගෝතම පොලිසිය ඇතුලෙදි වගේම වහලය මත ජස්ටිස් ලීගය සමඟ පවත්වන කතා බහ සිනමාහලේ දකිනවාට වැඩ දිගු එකක්. එහිදී ඔහු විසින් වොන්ඩර්වුමන්ගෙන් අහනවා මෙන්න මෙහෙම “if she’s the same woman he keeps seeing reports of in London”. ඒ වගේම සයිබෝර්ග්ගෙන් මෙහම ප්‍රශ්නයක් අහනවා.“how does he eat? Does he even need to?”. මේවගේ දර්ශන තවත් කෙටි කිරීමකට ලක් කරලා තියෙනවා.
7. Deleted – ස්ටෙපන්වුල්ෆ් ඇට්ලන්ටිස් වලට පහර දීමෙන් පසු එහි තිබු මදර් බොක්ස් එකත් පැහැරගනු ලබනවා. ඉන්පසු ඇට්ලන්ටිස් වල සිදුවන සිදුවීම් කපා දමා  තිබෙනවා. මේ සිදුවීමට පසුව ඇක්වාමෑන්, මීරා සහ වුල්කෝ (Willem Dafoe තමා චරිතය රඟපෑවේ.) සමඟ සාකච්චාවක නිරත වෙනවා. වුල්කෝ තමයි ඇට්ලන්ටිස් වල සිටින ප්‍රධාන විද්‍යාඥයා. මේ සාකච්චාව සිද්ධ වෙන්නේ පහරදීමෙන් පසුව ඊළඟ මදර් බොක්ස් එක සොයා ස්ටෙපන්වුල්ෆ් පෘතුවි මිනිසුන්ට පහර දෙන නිසා ඔවුන්ට උපකාර ලබා දීමට යාම පිළිබඳවයි. එහිදී මීරා පවසනවා ඕම් හෙවත් ඇක්වාමෑන්ගේ සහෝදරයා විශ්වාස නැති හෙයින් රජු වශයෙන් දිගටම රැඳී සිටින ලෙසට. වුල්කෝ පවසන්නේ හදවත නිවැරදියි කියා කියන දෙයක් කරන ලෙසට. පසුව ඇක්වාමෑන්පවසනවා පෘතුවි වැසියන් තමන්ගේද වගකීමක් නිසා ඔවුන්ට උදවු .කිරීමට යන බව. මේ සියලුම දර්ශන කපා දමා ඇති බව සලකන්න.
8. Deleted – ඇට්ලන්ටිස්  ආරක්ෂාව යටතේ තිබු දෙවන මදර් බොක්ස් එකත් අහිමු වූ පසු බැට්මෑන්, වොන්ඩර්වුමන්,ඇක්වාමෑන්, ෆ්ලෑෂ් සහ සයිබෝර්ග් බැට් කේව් එකට  පැමිණෙනවා.එහිදී බෘස් තමන් දුටු සිහිනය ගැන කතා කරනවා. ඒ වගේම ඔහු සිතනවා මදර් බොක්ස් තුන යොදාගෙන ස්ටෙපන්වුල්ෆ් විසින් සුපර්මෑන්ව මරණයෙන් අවදි කරයි කියල. ඔහුට කලින් අපි මේ සිදු කල යුතු බව ඔහු පිරිසට කියනවා. නැතහොත් මීට වඩා දරුණු ක්‍රිප්ටෝනියන් කෙනෙක් සමඟ වැදීමට සිදුවන බව සඳහන් කරනවා. එම දර්ශන සිනමා ශාලාවේදී ඔබට දකින්න ලැබෙන්නේ නැත.
9. Deleted – ලෙක්ස් ලූතර්  සිදුවීම අවසානයේ දකින්න ලැබුනත් එහි ආරම්භය සිද්ධ වෙන්නේ චිත්‍රපටය අතරතුරේදී. ඒ සඳහා උදවු සපයන්නේ ඩෙත්ස්ට්‍රෝක් විසින්. ඔහු ලෙක්ස්ව සිරගෙදරින් පිටත් කර නැවත කතා කරගත් ස්ථානයේදී  හමුවෙන අරමුණෙන් වෙන්වී යනවා.
10. Deleted – සුපර්මෑන්ට නැවත ජිවය ලැබුන පසු ඔහුවිසින් සියල්ලන්ටම පහරදී ලොයිස් සමඟ කෙන්ට් ගොවිපලට පැමිණෙනවා. තවමත් ඔහුගේ මතකය හරියාකාරව ලැබී නැහැ. ඔහුට සිදුවූ දේ ගැන කිසිම මතකයක් නැති අතර සමාන්‍ය වැසියන්ට ඔහුගේ ලේසර් කිරණ මගින් පහර දීමට පවා සැරසෙනවා. එහිදී ලොයිස් විසින් ඔහුව සන්සුන් කරගන්නා අතර ඔහු ඇයට පවසනවා “the voices won’t shut up”  කියා. එසේ වීමට හේතුව මදර්බොක්ස් එකේ ආභාෂය ඔහුටත් ලැබීමයි. පසුව එතනට පැමිණෙන මාර්තා කෙන්ට් ඔහුට පැරණි චායා රූපයක් දී යමක් පවසනවා. පසුව ක්ලාක් දකිනවා එළියේ ඔහුගේ මියගිය පියාණන් සිටිනවා. මෙය නිකන් මතකයක් වගේ යමක්. එතැනදී ඔහු ක්ලාක්ට පවසනවා “embracing who you really are”. තවද ඔහු ක්ලාක්ට පවසනවා  “you have to make peace with who you are. You have the power to change the world and you can do that as anyone, good character or bad.” ඉන්පසු ඔහු යතා තත්වයට පත්වන අතර ඉන්පසු ලොයිස් එහි පැමිණෙනවා. එම සිදුවීම තමා අපිට සිනමාහලේ ඇති චිත්‍රපටයේ දකින්න ලැබෙන්නේ. පසුව ඔහු අනෙක් පිරිස සඳහා උදවු වීමට පිටවෙනවා.
11. Deleted – ක්ලාක් බැට්කේව් එකට පැමිණෙනවා ඔහුගේ ඇඳුම ලබාගැනිමට. ඒ මොහොතේදී තමයි ඇල්ෆ්‍රඩ් කියන්නේ “ එයාල කිව්වා ඔබ ආයෙත් ඒවි කියලා” සුපර්මෑන්ට කියන්නේ. මේ කොටස අපිට පූර්ව ප්‍රචාරක පටයේ දකින්න ලැබුනා අවාසනාවකට වර්තමාන චිත්‍රපටයේ දකින්නට නැහැ.
12. Shortened – සුපර්මෑන් නැවත පැමිණි පසු බැට්මෑන්ට පහරදීම නිසා ඔහුගේ අතක් ආබාධයට ලක්වෙනවා. පසුව බැට්කේව් එක තුලදී ඔහු සහ ඩයනා අතර සිදුවන කතා බහ වඩාත් දීර්ග එකක්. බෘස් කියනවා තමුන් ලෝකය බේරගන්න මැරෙන්න උනත් සූදානමින් සිටි බව.ඒ නමුත් සුපර්මෑන් කල දේවල් වලට ඔහුට මේ දේ උරුම විය යුතු බව පවසනවා.නිරපරාදේ මිනිසුන් මැරීම නිසා සුපර්මෑන්ව  මරදාමා නිවැරදි කල නොහැකි බව පවසනවා. නමුත් ඩයනා පවසන්නේ ඔහු දැන් යහපත් කෙනෙක් බවට පත්වී ඇති බවයි.එත් බෘස් ඔහුගේ ස්ථාවරයේම සිටිනවා. මේ කොටස ඉන් ඉවත් කර ඒ කතාබහ කෙටි කර තිබෙනවා.
13. Deleted – බැට්මෑන් විසින් හිතුමතේ නියත මරණයක් ලැබෙන තැනකට ඔහුගේ රථය ධාවනය කරගෙන යනවිට ඇක්වමෑන් සහ වොන්ඩර්වුමන් දෙදෙනා එකතු වී වළක්වනවා. එහිදී ඔවුන් ඔහුට පවසනවා යුද්ධයේදී මියයාමෙන් කිසි දෙයක් වෙන්නේ නැහැ ඔබ සටන් කිරීමට ජිවත් විය යුතු බව. මෙම දර්ශනයත් කපා දමා ඇත.
14. Deleted – අවසානයේදී මදර්බොක්ස් තුන වෙන් කිරීමට දරන උත්සාහයේදී සයිබෝර්ග් සමග මදර්බොක්ස් තුල බලය පතුරන හේග්‍රා කතා කිරීමට උත්සහ දරනවා. කේන්තියට පත්වන ස්ටෙපන්වුල්ෆ් විසින් ඔහුව ඉරාදමනු ලබනවා.
15. Deleted – අවසන් සටනට එකතුවන සුපර්මෑන් ස්ටෙපන්වුල්ෆ් සමඟින් සටන්  වදිනවා.එහිදී ඔහු විසින් සුපර්මෑන්ව තමන්ගේ පාලනයට නතුකරගන්න උත්සහ කරනවා.ඒ අවස්ථාවේදී ප්‍රථම වරට සුපර්මෑන්ගේ විෂන් එක හරහා ඩාක්සයිඩ්ගේ දර්ශනයක් දකින්නට ලැබෙනවා. ඉන් මිදෙන සුපර්මෑන් ස්ටෙපන්වුල්ෆ් පරාද කරනු ලබනවා.
16. Deleted – පරාජයෙන් පසුව පලා යන ස්ටෙපන්වුල්ෆ්  ඇපොකලිප්ස් වෙතට පලා යනවා. පරාද වී හිස් අතින් තමුන් වෙත පැමිණෙන ස්ටෙපන්වුල්ෆ්ව  ඩාක්සයිඩ් මරා දමනු  ලබනවා. එහිදී ඩාක්සයිඩ් තීරණය කරනවා ක්‍රිප්ටෝනියන් වැසියා මුණ ගැසීමට පෘතුවිය වෙතට එන්න.
17. Deleted – ඇක්වාමෑන් සහ මීරා ධීවර ගම්මානයේ වෙරළේදී නැවත මුණ ගැසෙනවා. ඒවගේම බෘස් සහ බැරි දෙදෙනා වික්ටර්ගේ කොටස් රැගෙන බැට්කේව් එකට පැමිණෙනවා. එහිදී බැරි පවසනවා ඔහුගේ යාන්ත්‍රික කොටස් වලට නැවත පණගැන්වීමට ඔහු කෙසේ හෝ උදවු වන බව. බැරි සහ අයිරිස් දෙදෙනා මුණ ගැසෙන අවස්ථාවක්ද එහි අන්තර්ගත වෙනවා.
18. Deleted – ලොයිස් විසින් ක්ලාක් සුපර්මෑන් ලෙසට පෙරී වයිට්ට මුන ගස්වනවා. මුලින් තිබුන ආකාරයට පෝස්ට් ක්‍රෙඩිට් දර්ශනය වුයේ බෘස් වේන්ගේ  නිවසට ග්‍රීන් ලැන්ටර්න් කණ්ඩායමේ දෙදෙනෙක් කොළ පැහැති  ආලෝකයක් සමඟ පැමිණෙන ආකාරයයි. ඒ දෙදෙනා ටෝමාර් රේ සහ කිලෝවොග් දෙදෙනායි. ඒ කොටසත් අපිට දකින්න ලැබුනේ නැහැ. ඒ තමයි ග්‍රීන් ලැන්ටර්න්ලා ගැන දකින්න තිබුන අවස්තාව.

මේ තමයි දැනට ලැබුන ආරංචි අනුව පැයක වගේ කාලයක් අඩුවීමට හේතු වූ කරුණු කාරනා. මේ දේවල් මේ ලෙසින්ම Extended Cut  හෝ DIrector’s Cut  එකක් ලෙසින් බලාපොරොත්තු වීමට අපහසුයි. මොකද කතාවේ යම් යම් කොටස් මෙමගින් වෙනස් වන නිසා. එමනිසා WB සමාගමට පින්සිද්ධ වෙන්න හොඳට සැලසුම් කල කතාවක් කොට කරන්න ගිහින් මෙසේ සෝදාපාලු වීමකට ලක්වෙලා වගේ කියල හැඟීමක් චිත්‍රපටය බලපු හැමෝටම දැනෙනවා. එහෙනම් ගිහින් එන්නම් මේවගේ තවත් කොමික් විස්තරයකින් මුණ ගැහෙන්නම්. ජය!!!

හසන්ත වික්‍රමරත්න (70 Posts)

මෙතන පහළින් තියන සබැඳුම් වලිනුත් ඔබට මාව හමුවෙන්න පුළුවන්.

හසන්ත වික්‍රමරත්න

මෙතන පහළින් තියන සබැඳුම් වලිනුත් ඔබට මාව හමුවෙන්න පුළුවන්.