ස්පයිඩර්මෑන් කල්තියාම MCU වල දැන් බඳියි…

ඔන්න එනවා ! කවුද….. ? ස්පයිඩි…! 🙂 😀

ඔබ, අප, වගේම කොමික් රසික හෝ පොදුවේ චිත්‍රපට නරඹන සියලුම දෙනා පුන පුනා බලා සිටින දිනයක් තමයි 2016 අප්‍රේල් 29 කියන්නේ. ඇයි මේ දිනය මෙච්චර වැදගත්? ඔව්, ඒකට හේතුව තමයි මේ දිනයේ දී Captain America: Civil War නිකුත් වීමට නියමිතව තිබීම. ඒ කාලය එන්න එන්න සමීප වෙන අතරේ, අපට MCU එක ගැන විවිධ කතා අසන්නට ලැබෙනවා. මංසලත් සමග නිතරම රැඳී සිටින කෙනෙක් නම් පෙර ලිපියකින් මම ඒ පිලිබඳ දැනුවත් කලා ඔයාලට දකින්නට ලැබෙන්න ඇති. කියෙව්වේ නැතිනම් මෙතනින් ගිහිල්ලා ඒ ලිපිය කියවන්න පුළුවන්. කොහොම නමුත් අදත් මම ගෙන එන්නේ ඒ විදියේ කොමික් රසික සියලුම දෙනා මෙතෙක් පැහැදිලිවම නොදැන වටින් ගොඩින් තොරතුරු දැන හිටපු කරුණක් ගැන තහවුරු කරන තොරතුරක්.

මම කෝකටත් පඳුර වටේ තලලා ඉන්නංකෝ. මේ හැම දෙයක්ම පටන් ගත්තේ නික් ෆියුරි, ටෝනි ස්ටාර්ක්’ගේ ගෙදරට ගිහිල්ලා ඇවෙන්ජර්ස් කණ්ඩායමට ටෝනිව බඳවා ගත්තු දවසේ ඉඳන්. එදා ඉඳන් අපි බලාගෙන ඉන්නේ කවුද මීලඟට Avengers කණ්ඩායමට එකතු වෙන්නේ කියලා. ඉතිං ඔය විදියට ගොඩක් අය එකතු වුනා වගේම තමයි තවත් අය එකතු වෙන්න ඉන්නවා. ඉතිං මේ අලුතෙන් කණ්ඩායමට චරිත හඳුන්වාදීමට එක චරිතයකට එක චිත්‍රපටය ගානේ නිර්මාණය කරපු කාලේ ඉවරයි. දැන් එක ප්‍රධාන චිත්‍රපටයකින් ප්‍රධාන චරිත කිහිපයක්ම MCU එකට ඇතුලත් කරගන්න තරම් කතා පසුබිම් උණසුම් වීගෙනයි යන්නේ. මුලදීම Age of Ultron චිත්‍රපටයෙන් ඒ දේ සිද්ධ වුනා. මෙහිදී තමයි ප්‍රධාන වශයෙන්ම අපට හමුවෙන චරිත ඇවෙන්ජර්ස් දෙවන කණ්ඩායම විදියට බඳවා ගන්නේ. මීලඟට එන්න ති‍බෙන චිත්‍රපටය වන Civil War වලදීත් එහෙම දෙයක් වෙන්නයි යන්නේ. මේ කතාව හුදෙක්ම පාදක වෙන්නේ ස්ටාර්ක් සහ රොජර්ස් අතරේ සිද්ධවෙන හිත නොහොඳ කමක් නිසා ඇතිවෙන ගැටුමක් පිලිබඳවම හෝ චිත්‍රපටය ඇරඹෙන්නේ සෘජුවම ගැටුමකින් නෙමෙයි. මාවල් කතා බලන අපි හැමෝම දන්නවා හැම කතාවක්ම ආරම්භ වෙන්නේ බොහෝම නිස්කලංක පසුබිම් කතාවක් එක්ක කියලා. ගොඩක් වෙලාවට කතාව ආරම්භයේදී සුපිරි වීරයෝ ඉන්න කතාවක්ද කියලත් හිතෙන තරම්. ඉතිං මේ Civil War කතාවේ ප්‍රස්ථාවනාවේදීම අපේ මකුලු දැල් අදින කොලු ගැටයා ඉන්නවා කියලා අන්තර්ජාල පුවත් විස්තර කරනවා.

Marvel Studios සහ Sony සමාගම අතර ඇතිවුනු ගණුදෙනුවට පිං සිද්ධ වෙන්න අපි කවුරුත් දන්න, ආදරේ කරන, පීටර් පාකර් (Peter Parker) Spider-Man අවසානයේදී MCU එකට ඇතුලත් වෙන්නයි යන්නේ. ඉතිං මෙයාට MCU රිදී තිරයට එකතු වෙන්න ප්‍රස්ථාව ලැබුනේ නම් බොහෝම ප්‍රමාද වෙලා. Spider-Man වෙනුවෙන් වෙනම චිත්‍රපටයක් ඉදිරියේදී නිකුත් වෙන්න තිබුණත්, බොහෝ දෙනෙක් සියුම් සිත්තැවුලකින් හිටියේ “ස්පයිඩි Civil War එකටත් හිටියා නං…“ කියලා. 😛 මොකද කිව්වොත් Spider-Man, Civil War චිත්‍රපටයට ඇතුලත් කරන්නට නම් අනිවාර්යෙන්ම Civil War වලට පෙර Spider-Man චිත්‍රපටය එලිදක්වන්න වෙන නිසාවෙන්. (පුරුදු විදියට ලොකු ප්‍රධාන චරිතයක් එකතු වෙන්නේ එහෙම නිසා) ඒ වුනත් අපි හැමෝම දන්නවා ඒක නම් නොවෙන දෙයක් බව. මේ හේතුවෙන් හැමෝම ඒ ගැන බලාපොරොත්තු සුන් කරගෙන හිටපු එක සාධාරණයි. නමුත් මාවල් සමාගම මෙදා පාරත් රසිකයින් පුදුමයට පත් කරන්නයි සූදානම. Spider-Man ගේ නිල්-රතු නිල ඇඳුමට MCU තුල අනෙකුත් ප්‍රධාන චරිත අතරේ තවත් ලොකු හිදැසක් පුරවන්න Captain America: Civil War කතාවේදී ඔන්න අවස්ථාවක් උදාවෙලා.

කොමික් පොත් කියවන අපේ රසිකයෝ දන්නවා, චිත්‍ර කතා පොතේ තිබුණු විදියට නම් සිවිල් වෝ කතාවේදී පීටර් පාකර් කියන්නේ කතාවට බොහෝම වැදගත් චරිතයක් බව. දැන් MCU එකේ වැඩ සිද්ධ වෙන විදියට නම් කතා පොත්වල විදියටම පීටර් පාකර් රිදී තිරයෙත්… නික් ෆියුරි, අයන් මෑන්, තෝර්, හල්ක්, කැප්ටන් ඇමරිකා, හෝක් අයි, බ්ලැක් විඩෝ…, අතරේ නැතුවම බැරි චරිතයක් වෙන්නයි යන්නේ.

ඔන්න ඉතිං ස්පයිඩිත් අනිවාර්යෙන්ම සිවිල් වෝ එකේ ඉන්නවා කියලා නිල වශයෙන් ප්‍රකාශ කරපු එකේ “කොහොමද ඉවසගෙන ඉන්නේ ?“ කොහොම නමුත්, අපිට ඉවසීමෙන් ඉන්න වෙනවා සිවිල් වෝ එකේ ස්පයිඩිගේ වැඩ බලාගන්න නම්. ඒ වගේම තමයි කැප්ටන් සහ අයන් මෑන් අතර වෙන සටනේදී මෙයාටත් එක් පිලකට එකතු වෙන්න වෙනවා කියලා සඳහන් කරලා තියෙනවා. ඒ කියන්නේ වැඩේ තවත් රසවත් වීගෙනයි එන්නේ. 😀 :p

රූසෝ සහෝදරයින්ට ස්තුතිවන්ත වෙන්න, ප්‍රේක්ශකයින්ට Civil War ගැන තවත් විස්තරයක් දැනගන්න ලැබුනා එහෙනං. ඒත් තවත් දැනගන්න දේවල් බොහෝමයි. ඒ අතරේ අවසානයේදී තවත් ලොකුම ලොකු ප්‍රශ්ණාර්ථයක් හමුවේ සියලුම කොමික් රසිකයින්ගේ කුතුහලය පොදි ගැසෙමින් තිබෙනවා.

මකුලු දැල කොයි පැත්තට වදීවි ද?

ආයු -බෝ -වේවා !!!

ප්‍රනීත් චින්තක රණසිංහ