පාරාදීසය අහිමිව ගිය මත්රජා සිනමාව හමුවට!

කොකේන් රජු නමින් හඳුන්වන Pablo Escobar ගේ ක්‍රියාකලාපය ‍රැගත් (ඔහුගේ උපක්‍රම, ජීවන චර්යාව, ක්‍රියාකාරීත්වය වැනි…) චිත්‍රපටයක් නිර්මාණය කරන්නට සූදානමක් පවතිනවා. කෙසේ වෙතත් මෙය ජීවිතකතා ගණයට අයත් වන්නක් නොවන බව සඳහන්. ඒ වෙනුවට ‘The Last King of Scotland (2006)’ චිත්‍රපටයේ වැනි වෘත්තාන්ත ආඛ්‍යානයක් යොදා ගැනෙනු ඇතැයි සඳහන්.

Pablo Escobar කියන්නේ කොකේන් රජු ලෙස හඳුන්වන ලද, මත්ද්‍රව්‍යත්‍රස්තයෙක්. කොළොම්බියානු මත්ද්‍රව්‍ය ප්‍රවාහකයෙක් සහ මත්අධිපතියෙක් වූ ඔහු එක්සත් ජනපදයට මත්ද්‍රව්‍ය ‍රැගෙන ආ ජාවාරමක් මෙහෙය වූ අයෙක්. ඔහුගේ මේ ජාවාරම් නවත්වාලීමට USA සහ අනිකුත් කලාපීය රටවල බලකායන් කොතෙක් උත්සාහ කළත් තමන්ගේ වැඩ කටයුතු නොකඩවා කරගෙන යන්නට තරම් ඔහු සූක්ෂම පුද්ගලයෙක් වුණා. නමුත් අවසානයේදී පොලිස් වෙඩි පහර කා මිය යන්නට වූ බව සඳහන් වූවත්, එය පොලිස් වෙඩි පහරක්ද? සිය දිවි නසා ගැනීමක්ද? යන්න අද වනතුරා නිශ්චිත නැහැ.

‘Savages (2012)’ හි රංගනයෙන් එකතු වූ Benicio Del Toro මෙම චරිතය සඳහා පණ පොවනු ඇතැයි සඳහන්. මෙය ඩොලර් මිලියන 25ක වියදමකින් තැනෙන චිත්‍රපටයක්. චිත්‍රපටයේ රූගත කිරීම මාර්තුවේ ආරම්භ වීමට නියමිතයි. සති 11ක් පුරා පැනමාවේදී එම කටයුතු සිදු කිරීමට සැලසුම් සකස් කොට තිබෙනවා. තිරරචනය සහ අධ්‍යක්ෂණය ඉතැලියානු චිත්‍රපට නිර්මාණකරුවෙකු වන Andrea di Stefano විසින් සිදු කරනු ඇති බවක් සඳහන්.

කතාව මෙහෙමයි; Nick නම් තරුණ රළපදින්නෙක්(Surfer) තමන්ගෙ සොහොයුරා හමුවීමට කොළොම්බියාවට ආපු ගමනේදී, Maria එක්ක පෙමින් බැ‍ඳෙනවා. නමුත් Maria කියන්නේ Escobar ගේ ලේලිය බව ඔහු දන්නේ නෑ. ඔහු හමු වන තෙක් මේ දෙපළගේ සුන්දර විසිතුරු ප්‍රේමය මැනවින් ගළා යනවා. නමුත් ඔහු හමු වූ පසු? ඔහු හමුවීමත් සමග තරුණ Nick මුහුණ දෙන තත්ත්වයන් හා Escobar කෙරෙහි ඇති නුරුස්නාවත් දෙගිඩියාවත් නිසා උද්ගත වන තත්ත්වයන් මැද්දෙන් කතාව ඉදිරියට ඇදෙනවා. මෙහි නම වන්නේ Paradise Lost.

Del Toro ගැන කියනවානම් මෙම චරිතය අංගසම්පූර්ණ ලෙස සාර්ථකව කිරීමට හැකි සීමිත නළුවන් ටික දෙනා අතුරින් ඔහු මෙයට වඩාත්ම ගැළපෙන බවයි සඳහන් වෙන්නේ. එමෙන්ම Del Toro ඉදිරියේදී තැනෙන්නට යන Sin City‘හි දෙවැන්නට එක්වෙනු ඇතැයි කටකතා පැතිර තිබෙනවා. නමුත් ඒ ගැන තවමත් හරියටම ඔහුට දැනුම් දී නැහැ.