ඉදිරි දිගහැරුම (LV) | Ironclad: Battle for Blood – ලෙයට ලෙයක්…

ඔබට මතකනම් වතාවක් අපේ මව් විබපළින් උපසිරැසි ලබා දුන් Ironclad චිත්‍රපටය; මේ කියන්නට සැරසෙන්නේ එහි දෙවැන්න ගැනයි. 2011 වසරේ නිකුත් වුණ මුල් චිත්‍රපටය නිර්මාණ කාර්‍යයක් විදියට ඉහළ ප්‍රශංසා ලැබුවා. ඊට හේතු වුණේ, මේ නිර්මාණය මෙවැනි වැඩවලට නම් දැරූ කලාපය වන Hollywood වලින් බොහොම දුර බැහැර බ්‍රිතාන්‍යයේ තැනුණු එකක් වීම පමණක්ම නොවෙයි. ඉතාම උසස් ගණයේ සටන් ජවනිකා මනා තාත්ත්වික ගතියකින් ඉදිරිපත් කර තිබීම, මේ චිත්‍රපටය ඒ වසරේ උසස්තම සහ බිහිසුණුම සටන්හරඹ රැගත් චිත්‍රපටයක් ලෙස නොමද විචාරක ප්‍රසාදයන්ට පත් වන්නට හේතුවක් වුණා. ඉතින් එනිසාම වන්නට ඇති, ඒ චිත්‍රපටයේ කතා සංකල්පය මත පදනම්ව එහිම දිගුවක් ලෙස මෙලෙස දෙවැන්නක් හදන්නට නිර්මාණකරුවන් තීරණය කෙරුවේ…

Iron Clad 1

ඉතින්, අර කිවූ පෙර චිත්‍රපටයටනම් උපසිරැසි ගෙනාවේ මමයි. ඒ වුණත් මේ වෙනුවෙන් උපසිරැසි එක්කරන්නට මට ඉස්පාසුවක් ලැබෙයිද කියලා හිතා ගන්නවත් බැරි නිසා, දැන්මම ඔන්න කිසියම් කෙනෙකුට මේක භාරගන්න ආරාධනාවකුත් කරනවා. ඒත් එක්කම කණගාටුවෙන් වුණත් කිව යුතුයි, ඉදිරි දිගහැරුමට මේක එක්කරන්න මේ තරම් ප්‍රමාද නූණානම්, මම මේක නිසැකවම කරනවා. මොකද මධ්‍යතන යුගය කියන්නේ මම බොහෝමත්ම ආශා කරන කාලයක් නිසා. අවාසනාවකට මේ දෙවැන්න ගැන මට දැනගන්නට ඉඩ ලැබුණේ, මෙය බ්‍රිතාන්‍යය තුළ තිරගතවීම් පවා ඇරඹුවායින් පස්සෙයි. ඒ කියන්නෙ මේක දැනටමත් සිනමාශාලාවන්ට ආපු එකක් කියන එකයි. 🙁 ඒ වුණත් අහම්බෙන් වගේ දැනගන්නකොට මේක ඇමරිකාවේ තිරගන්වන්න පටන් අරන් නැති නිසා හිතුවා, වහාම ඉදිරි දිගහැරුමට එකතු කරන්න ඕනෙයි කියලා… 😀 හරි එහෙමනම් හැරෙමු මේකේ විස්තරය දිහාවට.

ironclad 5

කලින් එක බලපු අය දන්නවා එහි ප්‍රධාන චරිතය වුණේ, Knights Templar සාමාජිකයෙකු බව. ඔහු සහ ඔහුට සහාය වූ තවත් Baron‘වරුන් නැතිනම් සිටුවරුන් පිරිසකගේත් රණකාමී සාමාන්‍ය වැසියන් කිහිපදෙනෙකුගේත් අප්‍රතිහත වෑයමකින්, ජීවිත පූජාවෙන් මුල්ම වරට එංගලන්තයට උදා වූ ප්‍රජාතන්ත්‍රවාදය රැකගත් හැටි පළමු කතාවේ අඩංගු වෙලා තිබුණා. සත්‍ය සිදුවීම් එලෙසින්ම නොතිබුණත්; රට වෙනුවෙන්, තමන්ගේම රටේ රජ වී සිටි කෲර පාලකයාට එරෙහිව ගොසින්, ලොව මුල්ම ප්‍රජාතන්ත්‍රවාදී ලියවිල්ල වන මැග්නා-කාර්ටා ගිවිසුම රැකගත් ඉතිහාසගත කතාන්තරයක් ඉන් කියැවුණා.

Ironclad 3

දෙවන්න පෙර පරිදි, වැදගත් ඉතිහාසගත කතාන්තරයක් නම් නොවෙයි. ඒ වෙනුවට මෙවර තිබෙන්නේ, මුල් කතාවෙන් වසර කිහිපයකට පසු කාලයේ සිදුවීමක් පදනම් කරගත් කතාවක්. පළමු වැන්නෙහි කොලු ගැටයෙකු ලෙසින් දුටු Guy the Squire මේ වෙනකොට නාඹර තරුණයෙක් බවට පත්වෙලා. ඒ වුණත් පෙර සටනින් ලද අත්දැකීම් නිසා ව්‍යාකූල එලා ඉන්න ඔහුට මේ පාර සටන්වදින්න වෙන්නේ, තමන්ගේම පරම්පරාගත උරුමයක් වන බලකොටවක් නැතිනම් මාළිගාවක් රැකගන්නටයි. ඉතින් මේ වතාවේ මුහුණ දෙන්න වෙලා තියෙන්නේ, ගියපාර සටනින් මිය ගිය පුතෙකු වෙනුවෙන් ලේ වල පළිය ගන්නට එන පියෙකුගේ ආවේගශීලී ආක්‍රමණයකටයි.

Iron Clad 2

කලින් කතාව ලියපු, Jonathan English/ Stephen McDool සහ Erick Kastel කියන අයගෙන් මුල් දෙන්න අතින් රචනා වෙලා, කලින් කතාව හදපු Jonathan English අතින්ම අධ්‍යක්ෂණය වුණ මේ චිත්‍රපටයේත් කඩු හරඹ, දුනු හරඹ වලින් අඩුවක් නැති බව දැනගන්නට තිබුණත් ගියවර් දුටු මුහුණු නම් දැකගන්නට ලැබෙන්නේ නැහැ. ඒ වෙනුවට වෙනත්ම නළු-නිළි පිරිසක් මේ වෙනුවෙන් එක්කාසු වෙලා තියෙනවා. ඒ අතර The Borgias‘හි රඟන Tom Austen සහ Game of Thrones‘හි රඟන Michelle Fairley ගැන විශේෂයෙන් සඳහන් වෙනවා. ඉතින්, ඒ වගේ නිර්මාණ රසවිඳින උදවියට මේකත් අල්ලලා යාවි.

Ironclad 4

මුල් චිත්‍රපටයට තරම්ම යහපත් ප්‍රතිචාර ලබාගන්නට මාර්තු 14 වැනිදා ඉඳන් බ්‍රිතාන්‍ය සිනමාශාලා වලට ආ මේ චිත්‍රපටයට හැකි වී නැහැ. (බ්‍රිතාන්‍යයේ දැනටමත් තිරගත වන නිසා; සහ පමා වී දැනගත් නිසා; මම මේක ඉදිරි දිගහැරුමක් බවට පත් කෙරුවේ ඇමරිකාවේ තිරගතවීම් ඇරඹෙන දිනය අනුවයි. 😉 ) ඉදිරියේදී ඇමරිකාව ඇතුළු රටවලින් ලැබෙන ප්‍රතිචාරය අනුව එය වෙනස් වන්නටත් ඉඩ තිබුණත්, සමස්ථයක් විදියට සාපේක්ෂව අඩු අගයක් IMDb වල සටහන් කරගෙන ඇති බවත් කියන්නම වෙනවා. ඒ කොහොම වෙතත්, අපටත් මේක සිංහල එක්කම බලන්න ඉඩ ලැබේවා’යි කියලා ප්‍රාර්ථනා කරමු.

තිරයට එන දිනය: 2014 ජුලි 25 (ඇමරිකාව තුළ)

උදා (217 Posts)


2 thoughts on “ඉදිරි දිගහැරුම (LV) | Ironclad: Battle for Blood – ලෙයට ලෙයක්…

  • July 11, 2014 at 10:59 PM
    Permalink

    මෙක බාගෙන නම් ගොඩක් කල් තාම බැලුවෙ නැහැ.සබ් එයි කියලා හිතපු නිසා

  • July 8, 2014 at 8:48 AM
    Permalink

    කතාවනම් හොඳයි වගේ..පලවෙනි ඒක බලලම ඉන්න ඕනි මේක එන්න කලින්.
    ස්තූතියි උදා සහෝ දැනුවත් කිරීමට….

Leave a Reply

Your email address will not be published. Required fields are marked *