ඉදිරි දිගහැරුම (XLIX) | Think Like A Man 2 – දෙපාරක් හිතන්න!!!

Think-Like-a-Man-Too-Poster-647x472

තවත් දිගහැරුමක් ගැන විස්තරයක් වුණත්, මම හිතන හැටියට මේක වැඩි දෙනෙක් දන්න කියන එකක් නෙවෙයි. ඒ වුණත් බොහොමත්ම ජනප්‍රිය වුණ හාස්‍ය චිත්‍රපටයක දෙවැන්න නිසා, හාස්‍යමය සිනමාවට ප්‍රිය කරන පිරිසකුත් ඉන්නා නිසා, නොසලකා හරින එක හොඳ නැහැ. එනිසා තරමක් කෙටියෙන් වුණත් විස්තරයක් දෙන්න අදහස් කෙරුවා.

2012 වර්ෂයේදී නිකුත් වෙච්ච Think Like A Man තමා මෙහි පළමුවැන්න. බයිස්කෝප් සිංහලෙන් වෙතින් මේ චිත්‍රපටය ලබා දීලා නැහැ තවමත්, මගේ මතකය හරිනම්. ඒ වුණත් මේක ඇමෙරිකාවෙ වගේම ලෝකයේ සෙසු රටවලත් නොසිතූ තරම් ජනප්‍රිය බවක් උපයාගත් චිත්‍රපටයක් තමයි.

ඇමරිකාවේ රූපවාහිනී සහ ගුවන්විදුලි වැඩසටහන් ඉදිරිපත් කරන්නෙකු වන Broderick Steven Harvey නැතිනම් Steven Harvey ඒ වැඩසටහන් ආශ්‍රිත තමන්ගේ අත්දැකීම් වලින් “Act Like a Lady, Think Like a Man” නමින් පොතක් පළකළා 2009 වර්ෂයේදී. ඉතින් මෙන්න මේ පොත තමා චිත්‍රපටයට පදනම වුණේ. එහි අඩංගු වෙන්නේ ගැහැණු පිරිමි අතර ඇති පරස්පර බව ගැන සහ ඊට හේතුත් එය මගහැර ගන්නට කාන්තාවන් කටයුතු කළ යුතු අයුරුත් තමයි. නමින්ම තේරෙනවනේ ඒ ගැන! නේද?


තනිකඩ පිරිමින් පිරිසක් සහ තනිකඩ ගැහැණුන් පිරිසක් අතර මුල් වටයේ කතාව ගොඩනැගුණා. පිරිමින්ව තමන්ගේ දැලේ දාගෙන කියන කියන දේට අවනත කරගන්නට උත්සාහ දරනා කෙල්ලෝ සෙට් එකක් සහ ඔවුනට එරෙහිව කැරළි ගහන කොල්ලෝ සෙට් එකක් අතරේ ඇවිලෙන සටනක් එහි තිබුණා. වැඩේ කියන්නේ මේ කෙල්ලෝ සෙට් එකේ හැම කෙනාම අර කිව්ව පොත ගුරුහරුවට අරගෙන තමා වැඩේට බහින්නේ. මේක දැනගන්න කොල්ලෝ සෙට් එක හුලහට කරන වැඩයි, ඒ මේ වැඩ නිසා හැමදේම අංජබජල් වෙන හැටියි බලන්න නම් මේ කියපු මුල්ම චිත්‍රපටිය බලන්න වෙනවා.

දෙවැන්නේ තියෙන්නේ, මේ කට්ටිය කාලෙකට පස්සේ ආපහු එකතු වුණාම වෙන දේවල් ගැනයි. මේ වගේ හැප්පිලිකාරයෝ වගයක් එක්කාසු වෙන තැනක ඉතින් හොඳ හොඳ සෙල්ලම් තියෙන බව අමුතුවෙන් කියන්න දෙයක් නැහැනෙ. අපෙත් ඉන්නවානේ ඉතිං මේ වගේ හටන්කාරයෝ. කාන්තා පිරිමි දෙගොල්ලොම නේද? 😛


ගියවර වගේම මේකත් අර පොත මත පදනම් වී ගොඩනැගෙනවා. මෙවරත් අධ්‍යක්ෂණය Tim Story සිදු කරනවා. මතකනේ; Fantastic Four (2005)/ Fantastic Four: Rise of the Silver Surfer (2007) කියන චිත්‍රපට. ඒ වගේම Ride Along (2014) ත් ඔහුගේ තමයි. මෙවරත් තිරරචනාව සිදුකර තියෙන්නේ Keith Marryman සහ David A. Newman කියන දෙන්නාමයි. Michael Ealy(Underworld: Awakening/ About Last Night/ Almost Human), Regina Hall(Scary Movie Franchises/ Law Abiding Citizen/ About Last Night), Kevin Hart(This is The End/ Ride Along/ About Last Night) කියන තරු සමග පෙර දී එක් වූ නළු-නිළි බොහෝ දෙනෙක් සහ අලුත් කිහිප දෙනෙකුත් මෙවර එක්වනවා.

නිෂ්පාදනය කරන්නේ, Sony Pictures අනුබද්ධිත Screen Gems සමාගමයි. ඉතින් 2012 දී, මේ කාන්තා-පිරිමි ගැටුමට, එක දිගට සති 4ක් ඇමරිකාවේ අංක එකේ ප්‍රවේශ අලෙවිය හිමිකරගත් Hunger Games දෙවැනි තැනට ඇද දාලා, සති 2ක් ඒ තැන රැක ගන්නත් හැකි වූ නිසා; මෙවරත් මේ ගැන ඉහළ බලාපොරොත්තු තබාගෙන තියෙන බව කියැවෙනවා. මිලියන 12කින් ලොව පුරා මිලියන 96 කටත් වඩා හොයපු පළමුවැන්න වගේ මේ දෙවැන්නත් කොතෙක් දුරක් යාවිද කියලා දැකගන්නට හැකි වේවි ළඟදීම…

https://www.youtube.com/watch?v=www.youtube.com/watch?v=N8b6kVSZNLE

තිරයට එන දිනය: 2014 ජුනි 20

උදා (217 Posts)


One thought on “ඉදිරි දිගහැරුම (XLIX) | Think Like A Man 2 – දෙපාරක් හිතන්න!!!

  • June 14, 2014 at 12:53 AM
    Permalink

    කොමඩියක්නම් අතහරින්නේ නෑ. අනිවා බලනවා මේකත්
    ස්තූතියි සහෝ ලිපියට වගේම දැනුවත් කිරීමටත්

Leave a Reply

Your email address will not be published. Required fields are marked *