Homeland – Tower of David (3 x 3) – කොහෙට කැරකේවිද…


යාන්තම් මට 3 වෙනි සීසන් එක එපා වේගන ආව එක “Tower of David” කතාවෙන් යම් පමණකට වගේ නැති උනා කියන්න පුලුවන්. පළමු කොටස් දෙකම ගලාගෙන ගියේ හෝම්ලෑන්ඩ් හි ප්‍රධාන තේමාව අමතක කරලා වගේ. කැරීගේ පිස්සුව මතම කතාව දිගටම ගලාගෙන යාවිදෝ කියන සැකය ආවා දෙවනි කොටස ඉවර උනාම. නමුත්…

නමුත්, “ඩේවිඩ්ගේ කුළුන” මගින් ඒක වෙනතකට හැරෙව්වා කියලයි මට හිතෙන්නේ. පහුගිය කොටස් දෙකේදීම බ්‍රෝඩි ගැන කිසිදු සටහනක් නොදැකපු අපිට මෙන්න එක පාරම කොණ්ඩේ බූ ගාපු තට්ටයෙක් විලසින් බ්‍රෝඩි මතුවෙනවා බරපතල ලෙස තුවාල ලැබූවෙක් ලෙසින් වෙනිසිව්ලාවේ එක් නගරයකින්. මට මේ කොටස හිතට ඇල්ලුවේ මේ නිසයි. මොකද කැරී සහ බ්‍රෝඩි කියන්නේ හෝම්ලෑන්ඩ් හි කකුල් දෙක වගේ. එක කකුලක් නැතිවත් හැමෝටම අවිදින්න පුලුවන් තමා. නමුත් ඒ ඇවිදිනකොට අපි ඒක දකින්නේ සාමාන්‍ය කෙනෙක් ඇවිදිනවා විදියට නෙමෙයිනේ. ඉතින් පහුගිය කතා දෙකත් ගෙවුනේ අන්න ඒ වගේ. හෝම්ලෑන්ඩ් කියන කතාව නම් දිගටම යනවා.නමුත් ඒ මම (අපි) බලාපොරොත්තුවෙන විදියට නෙමෙයි වගේ. කොහොම උනත් ඒක වෙනස් කලා කියලා මට හිතෙනවා මේ තුවෙනි කොටසින්.

මුල් විනාඩි 30 පමණ ටිකක් උණුසුම් ලෙස කතාව ගොඩ නැගිලා තිබ්බා කියලා මට දැනුනා. බ්‍රෝඩි ලබා තියන බරපතල තුවාල, ඒක හොඳ කරන්න දඟලන අමුත්තා, තරුණිය, තරුණියගේ පියා, ටිකෙන් ටික සුවපත් වෙන බ්‍රෝඩි. මේ කාරණා නිසා කතාව ටිකක් වෙනස් විදියකට දකින්න අපට සැලැස්සුවා. මට නැගුන ප්‍රශ්ණයක් තමා, බ්‍රෝඩි කොහෙන්ද මේ මතු උනේ ? මෙතෙක් කල් ඔහු මොකද්ද කලේ ? වගේ කාරණා. හෝව්… හෝව්.. අපි ඉතින් හදිස්සි වෙන්න ඕනේ නෑනේ.කතාව තවමත් ඉවර නෑනේ. ඒවට උත්තර ලැබේවි.

බ්‍රෝඩිට ඇයි අර එතරම් හදිසියක් තිබුනේ එතනින් ඉක්මනින්ම යන්නට… හොඳටම අසාධ්‍යව හිටිය තමන්ව බේරාගත්ත, ඒ වගේම තමන් ගැන හොඳින් දන්න, මේ ඉන්නා තැන ආරක්ශිතයි කියන එක පුන පුනා කියද්දි, ඇයි බ්‍රෝඩිට උවමනා උනේ එතනින් පලායන්න. සමහරවිට බ්‍රෝඩි හිතන්න ඇති මේ අයත් තමන්ගේ හිසට ලාබාදෙනවා කිව්ව මුදල ගන්නට ක්‍රමයක් හදාගන්නකම් ඔහුව මෙතන තියාගන්න හදනව ඇති කියලා වෙන්න පුළුවන්.

බ්‍රෝඩිගේ වේදනාව නැති කරන්න දුන්න හෙරොයින්ම ඔහුව බිලී ගනීවොදෝ වගේ හැඟීමක් අද කොටසේ අවසානෙ නම් මට ඇති උනා. මුලින් හෙරොයින් එපා, මට වේදනාව පාලනය කරගන්න පුළුවන් කිව්ව බ්‍රෝඩිම ඇයි අවසානේ තමන් විසින්ම සිරිංජය ගහගත්තේ. ම්ම්ම්… සමහරවිට, තමන්ගේ පසුම්බිය හොරාගත්ත මිනිසාට උන ඉරණම, තමන්ගේ මුස්ලිම් මිතුරන්ට සිදු දෙය යන කාරණා දරාගන්න බැරිවද..?

කවුද මේ කැරීව හමුවෙන්න ආව අමුත්තා. තමන්ගේ තාත්තා තමන්ව බලන්න එනකම් පාරදිහා බලාගෙන හිටිය පොඩි ගැහැණු දරුවෙක් වගේ තමා කැරී, සෝල් එනකම් මග බාලාන හිටියේ. නමුත් මේ කවුද ? කවුද මේ මැගෙන් උදව් ඉල්ලන්න හදන්නේ ? බ්‍රෝඩි සම්බන්ධවෙලා හිටිය ත්‍රස්ත කණ්ඩායමද ? එහෙම නැත්තන් කැරී ඔහුගෙන් අහපු විදියට ඉරානය, ඊස්‍රායල වගේ වෙනත් රටක්ද ? මේවටත් උත්තර ලැබේවි නේ අනාගතේ. අපි බාලගෙනෙ ඉමු..

කොහොම උනත් මේ කොටස අවසන් උන රූපරාමු නම් මගේ සිත් ගත්තා. පිස්සන් කොටුවක කාමරයක් මුල්ලක කැරී හුදෙකලාව ඉන්නවා, මෙහේ කොනක තමන් ඉරාකේ ගුහාවක හිරවී සිටි අයුරින් හිරවී, හෙරොයින් මතින් මත්වී බ්‍රෝඩි වැතිරි සිටිනවා.අපිට තුන්වෙනි සීසන් එක පුරාම මේ කතන්දරය දිහා බලාගෙන ඉන්න වේවිද ?

මේ අකුරු කලේ අද “ඩේවිඩ්ගේ කුළුන” බලපු මට හිතුන කාරණා කිහිපයක්. සමහරවිට කතාව බලපු ඔයාලට එහෙම නෙමෙයි වෙන්න ඕනා දැනුනේ. ඉතින් අපි කතා කරමු ඒ ගැන. පහල තියන ප්‍රතිචාර තීරුව යොදාගමු අපි ඒකට. ඔයාලට කතාව දැනුන හැටිත් කියමු බලන්න එහෙනම්.

මෙන්න තියනවා “ඩේවිඩ්ගේ කුළුන” (3‍x3) හි රූගත කිරීම් කල ආකාරය.

http://www.youtube.com/watch?v=P_2DbvOXn30&feature

[poll id=’2′]

කතෘ (3 Posts)


6 thoughts on “Homeland – Tower of David (3 x 3) – කොහෙට කැරකේවිද…

  • October 22, 2013 at 9:52 PM
    Permalink

    maru

  • Pingback: Homeland [3x04 - Game On ] | සෙල්ලම පටන් ගත්තා…. [සිංහල උපසිරැසි සමඟ] | බයිස්කෝප් සිංහලෙන්

  • October 17, 2013 at 4:44 PM
    Permalink

    අනිවා අනිවා… ඒක ඇහුන ගමන් බ්‍රෝඩිත් ටිකක් ගැස්සිලා ගියා වගේ උනා. මිනිහටත් පුදුමයි ඒක…

  • October 17, 2013 at 4:42 PM
    Permalink

    ඔව් සමහර විට ඒ ආවේ සෝල් ගෙම කෙනෙක් වෙන්න පුලුවන් තමා. මොකද කොහොමත් කැරීව CIA එකට තාමත් කොහෙත්ම විශ්වාස නෑනේ. අපි බලමු ලබන සතියේ කොහොම වේදිද කියලා.. 🙂

  • October 15, 2013 at 9:00 PM
    Permalink

    අමතක උනා, ඇයි අර පොර බ්‍රොඩිගෙන් අහන්නේ ඔයා කැරි ව අදුනනවද කියලා..
    කැරි ඒ පොරට මොනා හරි ලොකු උදාව්වක් කරලා ඇති, ඒක නිසයි බ්‍රොඩිව ආරක්ෂා කරන්නේ..

  • October 15, 2013 at 8:56 PM
    Permalink

    අනිවා මචෝ…
    මමත් බැලුවා මේ කතාව මොන පත්තකටද මේ යන්නේ කියලා..
    ඒත් මගේ නම් කුතුහලය පොඩ්ඩක් වත් අඩු උනේ නැහැ..බ්‍රොඩි දකින කම් පිස්සුවෙන් වගේ උන්නේ.
    අනික මටනම් හිතෙන්නේ අර කැරි ව බලන්න ආවේ සෝල් ගේ හෝ බුද්ධි අංශයේ මොකෙක් හරි, මොකද උන් දැනගන්න එන්නේ ඇත්තේ තවමත් කැරි උන්ට අවධානමක්ද, උන්ට විරුද්ධව ආයෙත් වැඩ කරයිද කියල බලන්න වෙන්න ඇති. ඒත් කැරි ඒ පරීක්ෂාවෙන් සමත් උනා වගේ මටනම් හිතෙන්නේ.
    බලමුකෝ, තව පටන් ගත්තා විතරනේ….
    මචෝ මෙන්න මෙහෙම පුලුවන් නම් හැම කොටසකම වගේ විස්ථරයක් දෙන්න පුළුවන් නම් පට්ට..
    මොකද තේරුම් ගන්න බැරි දේවල් ගොඩක් තේරුම් ගන්න පුළුවන්..
    ජය වේවා මචෝ…

Leave a Reply

Your email address will not be published. Required fields are marked *