G.I. Joe: 3 දැනටම පටන් අරං…

දැන් දැන් හොලිවුඩයේ චිත්‍ර-කතා ඇසුරින්/ දිසිරූ ක්‍රීඩා ඇසුරින්, වගේම සෙල්ලම් බඩු ඇසුරින් තැනෙන චිත්‍රපටි ගණන බොහොම ඉහළයි. G.I. Joe කියන්නෙ පළමු ලෝක යුද්ධයෙන් පසුකාලීනව භාවිතයට පැමිණි යෙදුමක්. පළමු ලෝක යුධ සමයේදී මේ යෙදුම භාවිතා වුණේ සොල්දාදුවන්ට ලබා දෙන උපකරණ මත Galvenized Iron යන්න සටහන් කරන්නට. නමුත් පසුව මේ ඇසුරින් Hasbro ළමා ක්‍රීඩා භාණ්ඩ නිෂ්පාදනායතනය පිරිමි ළමුන් සඳහා විශේෂිත වූ බෝනික්කන් වර්ගයක් නිපදවූවා. ඒවා හැඳින්වුණේ Action Figures යනුවෙන් මිස Doll යනුවෙන් නොවෙයි. ඒ පිරිමි ළමුන් බෝනික්කන් හා සෙල්ලම් නොකරන බව ඇඟවීමට. මෙහි ඇමෙරිකානු අවි බලකායන් හතරටම අයත් ආකෘතීන් අඩංගු වුණා.

කොහොම වුණත් 1960 තරම් ඈත ඉතිහාසයක් උරුම මේ G.I. Joe ක්‍රියාන්විත දේහාකෘතීන් පසුව චිත්‍ර-කතා බවට පත් වෙලා, ඉන් පස්සෙ කාටූන් ලෙසින් රූපවාහිනියටත් ඇවිදින් දැන් ජීවමාන සිනමා පෙළක් ලෙස පුළුල් තිරයත් ආක්‍රමණය කර අවසන්. ඉතිහාසය ටිකක් කිව්වෙ මෙහි ආරම්භය ගැනත් කිව යුතුයි කියලා හිතුණු නිසයි. දැන් හැරෙමු චිත්‍රපටිය දිහාවට.

G.I. Joe: Retaliation (2013) – $ 130m වැයකින් $ 360m‘කට අධික මුදලක් ලොව වටා උපයන්නට සමත් වීම නිසා සිනමා අයිතිය හිමි Paramount සමාගමට මෙහි තුන්වැන්න තිරයට ගෙන එන්නට ඉවසුමක් නැහැලු. මෙහි පූර්වයා වන G.I. Joe: Rise of the Cobra (2009)ත් $ 175m වැයකින් $ 302m‘ක් උපයා තිබෙන බව සඳහන්. සාපේක්ෂව දෙවැන්න පළමුවැන්න ඉක්මවා ඇති බව බැලු බැල්මටමත් පෙනෙන්නට ඇති දෙයක්. එනිසා විචාරකයන් සහ සිනමාවේදීන් දෙවැනි චිත්‍රපටිය ගැන මොනවා කිව්වත් G.I. Joe: 3 ඉක්මනින්ම තිරයට ගෙනෙන්නයි නිෂ්පාදකයන්ගේ අදහස.

දැනටම දෙවැන්න සඳහා තිරරචනාවෙන් එකතු වූ දෙපළ: Rhettt Reese සහ Paul Wernick තෙවැන්නත් ලියන්නට ගිවිසුම්ගතව අවසන්. ඒ විතරක් නොවෙයි, දෙවැන්නෙහි අධ්‍යක්ෂක Jon M. Chu තෙවැන්නටත් එක්කාසු වෙනු ඇති බව සඳහන් පෙර පරිදිම. මේ අධ්‍යක්ෂකවරයාගේ ප්‍රථම අධි-වැය චිත්‍රපටිය වුණේ G.I. Joe: 2. මුලින් මෙය නිකුත් වන්නට තිබුණේ 2012 වසරේ ජුනි මාසයේ වුණත් මෙය 3මාන ස්වරූපයෙන් එළිදක්වන්නට තීරණය කළේ පසුව නිසා 2013 මාර්තු දක්වා කල් දමන්නට සිදු වුණා. නමුත් මේ වෙනකොට ඔහුට ඒ ගැන අත්දැකීම් ඇති නිසා මෙවර එවැන්නක් නොවෙනු ඇති. විචාරකයන් චිත්‍රපටිය ගැන මොනවා කීවත් සිනමාරසිකයන් මෙහි වූ සංකලනයට බොහෝම කැමති වූ බව සඳහන්.

කොහොමවුණත් ඉහත කිවු චිත්‍රපටියේ නිසි ගැළපුමකින් යුතු කතාවක් හෝ ගළායෑමක් නැති බවයි කියවෙන්නේ. එහෙම තිබෙද්දිත් ලක්ෂ ගණනින් මුදල් හොයන්නට සමත් වීම නිසා කතාව ගැන වැඩි සැලකිල්ලක් නැතිව වුණත් සල්ලි හොයන්ඩ පුළුවන් බව තහවුරු වෙලා. උදාහරණයක් විදිහට 2009 චිත්‍රපටියේදී මියගිය Storm Shadow චරිතය යළි මෙවර ජීවතුන් අතර සිටියත් එය සිදු වූ අයුරු ගැන කිසිදු ඉඟියක් පවා නැහැ. එනිසා එය එතරම් ප්‍රේක්ෂක අවධානයට කරුණක් නොවෙන බවයි නිර්මාණශිල්පීන්ගේ අදහස. හේතුව නිසි පැහැදිලි බවකින් තොරව වුවත්, ක්‍රියාන්විතයන් සමග ආකර්ෂණීය ගැ‍ටුම් පෙළගැස්වීමෙන් ඇති තරම් මුදල් උපයන්ඩ පුළුවන් බව මෙමගින් සනාථ වෙලා. ඉතින් තෙවැන්නෙන් යළි වරක් The Baroness කියන චරිතය මළයකෙකු ලෙස එක්වනු ඇතැයි කිව්වත්, ඇය මිය ගිය අයුරක් මුල් චිත්‍රපටි දෙකෙහිම අඩංගු වන්නේ නෑ…

මෙය 3මාන කිරීමෙන් සැලකිය යුතු ආදායම් ප්‍රතිශතයක් විදේශයන්හිදී හම්බකරන්ඩත් හැකි වෙලා තියෙනවා. ඒ අනුව 3 වැන්නටත් එවැන්නක් කෙරෙහි නිෂ්පාදකයන් මුල සිටම සැලසුම් කරනවා ඇති. සඳහන් වන අන්දමට Dwayne Johnson සහ Channing Tatum වැන්නන් යළිත් සූරුදු චරිතවලින් 3 වැන්නට එක්වෙනු ඇති. කොහොම වෙතත් නරඹන්නන්ට ප්‍රියශීලී චිත්‍රපටියක් ලෙසින් මෙය නිකුත් වනු ඇතැයි අපේක්ෂා කෙරෙනවා. මේ ගැන වෙනත් විස්තර තවමත් හෙළිවී නැහැ. හෙළි කළ වහාම මංසලේ ඉදිරි දිගහැරුම ලිපි පෙළින් ඒ ගැන දැනගන්නට ලැබේවි.

ඒ වෙනුවට සිංහල උපසි‍රැසි බලන අපට වැදගත් වන තොරතුරක් දෙන්නම්! මෙහි DVD/ BluRay පිටපත් 2013 ජුලි 30 වැනිදා නිකුත් වෙනවා. ඒ කියන්නෙ තව කෙටි කලකින් අපටම බලාගන්ඩ ලැබෙයි මේ චිත්‍රපටියේ වරුණාව. එතෙක් ටිකක් ඉවසලා ඉමු 😉

උදා (217 Posts)


6 thoughts on “G.I. Joe: 3 දැනටම පටන් අරං…

  • June 14, 2013 at 7:50 PM
    Permalink

    පට්ට උදා දිගටම දාහන් මේවා,,,,,,,,

  • June 14, 2013 at 2:32 PM
    Permalink

    ae macho 2 weni aka mey news aka issarahata anna thiyena 3 weni aka gana

  • June 13, 2013 at 8:33 PM
    Permalink

    elakiri macho lipiya,digatama dahan meywa

  • June 13, 2013 at 7:39 PM
    Permalink

    පට්ට පට මචං

Leave a Reply

Your email address will not be published. Required fields are marked *