සුපිරි චිත්‍රපටිවල ඉදිරි දිගහැරුම… (IV) | Dawn of the PoA නව යුගයක උදාව… [Update]

Planet of the Apes 7 (2nd Reboot)

20th Century Fox සමාගම තනපු ‘Rise of the Planet of the Apes (2011)’ තමයි මින් පෙර නිර්මාණය වූ චිත්‍රපට 06 කින් යුතු Planet of the Apes සිනෙ මාලයට අලුතින්ම එක් කළ පබළුව. මෙහි දිග හැරුණේ පෙර තැනුණු සියලුම සිනෙපටවලට පෙරනිමිති පහළ කළ සිදුවීම් ‍රැස. ඉන් කියැවුණේ වානර සමාජය වෙනුවෙන් –චේ ගුවේරා වැනි- විප්ලවීය පියවරක් තැබූ, ජාන වැඩිදියුණු කිරීමකට ලක් වූ Caesar (Andy Serkis) නම් චිම්පන්සියෙකුගේ නායකත්වය යටතේ, වානර වර්ගයා මිනිසුන් අභිබවා ලෝකයේ පාලනය නතු කරගන්නා කතාවක්. Rupert Wyatt ගේ අධ්‍යක්ෂණයෙන් යුතුව නිමැවුණු මෙය, විචාරක පැසසුම් සමගම අලෙවි වාර්තා අතිනුත් හොඳ ප්‍රගතියක් පෙන්නුම් කළේ ලොව වටා $482m උපයමින්. එහෙයින්ම මෙය තවත් ඉදිරියට රැගෙන යන්නට තීරණය වුණා.

~මේ චිත්‍රපට පෙළ තුළ මින් පෙර තැනුණු 5ක්ම එකම චිත්‍රපට පෙළහරේ නිර්මාණයන් ලෙසින් එළි දුටුවා. ඒ 1968 වසරේ තැනුණු මුල් නිර්මාණයට අනුබැදෙන තවත් චිත්‍රපට 04ක් විලසින්. ඉන් අනතුරුව 2001 වසරේදී යළි මුල් චිත්‍රපටයෙහි ප්‍රතිනිර්මාණයක් එළි දුටුවා එනමින්ම යුතුව. මේ 2011 වසරේ තැනුණු එක ප්‍රතිනිර්මාණයක් නොවෙයි. එය ප්‍රත්‍යාරම්භයක් එනම් Reboot එකක්. මේ කියන දෙවැන්න ඊට අනුබැදී නිර්මාණය වන එහිම දෙවැනි පණ පෙවීමයි. (මේ සියලුම චිත්‍රපටයන්ට මූල බීජය වුණේ ප්‍රංශ විදු පබැදි ලේඛක “Pierre Boulle” අතින් විරචිත La Planète des singes(Planet of the Apes orMonkey Planet) නම් වන නවකතාව)~

දැන් ඔන්න ඒ සඳහා සියලු කටයුතු සූදානම්. Andy Serkis යළි වරක් Caeser ලෙසින් දෙවැන්නට එක්වෙනවා. මෙම දෙවැන්නට දී ඇති නම වන්නේ ‘Dawn of the Planet of Apes (2014)’ යන්නයි. නමුත් අධ්‍යක්ෂණය සඳහා ‘Cloverfield (2008)’ අධ්‍යක්ෂකවරයා වූ Matt Reeves එක්වන්නට යන බවයි සඳහන් වෙන්නේ. මේ වෙනකොටත් එහි රූගත කිරීම් ‘නිව් ඕලියන්ස්, ලූසියානා, වැන්කූවර්’ යන ස්ථානවලදී සිදු කෙරෙනවා.

20th Century Fox සමාගමේ නිල නිවේදයනක දැක්වෙන පරිදි මෙහි අඩංගු වන්නේ මෙවැනි කතාවක්;

“සීසර් ඇතුළු ජානමය වශයෙන් වැඩි දියුණු බවට පත් වානට පරපුරට, මින් දශකයකට පමණ පෙර සිදු වූ ඒ මාරක වෛරස පැතිර යාමෙන් දිවි ගළවා ගන්නට තරම් වාසනාවන්ත වූ මිනිසුන් කණ්ඩායමකින් තරජන එල්ල වෙලා. දෙපිරිස අතර ගැ‍ටුම්, සාම සංධාන ගිවිසුමකින් තාවකාලිකව වැළකී ගියත් දෙපක්ෂයේම වර්ධනය වන, ‘බලය පිළිබඳ ශක්තිය’ ගැන වන හැඟීම් වළකාලන්නට එය සමත් වන්නේ නෑ. එනිසා තවදුරටත් පෘථිවියේ රජයන බුද්ධිමය සත්ත්ව වර්ගයා කවුරුන්ද යන්න තීරණය වන තීරණාත්මක සටනකටයි මෙවර මග හෙළි වන්නේ.”

මෙය නිෂ්පාදනායතනයෙන්ම කළ නිලාත්මක ප්‍රකාශයක් නිසා; ඔන්න මෙවර ත්‍රාසයත්, විශ්මයත්, අනපේක්ෂිත බවත් මුසු කළ කුතුහලාත්මක සිනෙ වින්දනයකට ඉඩ සැලසෙනු ඇති බව පැහැදිලියි. Andy Serkis හැරුණු කොට සෙසු ප්‍රධාන චරිත සඳහා එක්වන නළු-නිළි කැළත් ‍තෝරා අවසන් මේ වෙද්දි. නමුත් ගියවර සීසර්’ව හදාගත් පියා ලෙස, මිනිසුන්ට විනකළ වෛරසය මුදා හළ විද්‍යාඥයා වූ Dr. Will Rodman ලෙසින් එක‍තු වූ James Franco මීට එක් නොවනු ඇති. ඒ කියන්නෙ පිය-පුතු බැඳීම් වලින් ඔබ ගිය, සීසර් ගේ නායකත්ව අද්දැකීම් හා සම්බන්ධ වෙමින් මෙය ගොඩනැගෙනවා කියන එකයි.

ගියවර වගේම පිටපත Rick Jaffa/ Amanda Silver යුවළගෙන්. නමුත් අධ්‍යක්ෂකවරයාගේ මනාපය ලෙසින් මෙය යළි සංශෝධනයන්ට ලක් වුණා. ඒ Mark Bomback අතින්. කෙසේ නමුත් මෙහි සියලු කුළුබඩු අරපරිස්සමින් ‍තෝර බේරාගෙන හොඳින්ම සම්මිශ්‍රණය කර ඇති නිසා මේ චිත්‍රපටය අතිසාර්ථක වනු ඇතැයි යන්නයි දැනට දැනගන්ඩ තියෙන විස්තරේ.

 

තිරයට එන දිනය: 2014 මැයි 23(US)

 

නවමුව:- බුද්ධිමය ජීවියා සීසර්; මිනිස් ග්‍රහණයේ පසුවෙමින්, මිනිසාගේ අධිකාරීත්වය යටතේ, තවදුරටත් සත්ත්වයෙකු ලෙස ජීවත්වීම ප්‍රතික්ෂේප කර වසර 10ක් ගෙවී ගිහින්. ඔහු විසින් පොළඹවනු ලැබ නිදහස පතා පළා ගිය බුද්ධිමත් නේක විධ වානර ගහණය, දැන් සිය බිරිඳ සහ දරුවා සමග ජීවත් වන සීසර්(Andy Serkis) යටතේ ව්‍යාප්ත වෙමින් පවතිනවා.

Dawn of the Planet of the Apes (2014)
Dawn of the Planet of the Apes (2014)

වානර නගරය, ක්‍රම ක්‍රමයෙන් වානර ග්‍රහලොවක් බවට පත්කිරීමේ සීසර්’ගේ බුද්ධි විප්ලවය ක්‍රියාත්මක වෙමින් පවතිනවා. තම සගයන්ට කතා කරන්නට හෝ අශ්වයෙකු පැදයන්නට උගන්වනවාට වඩා මහාපරිමාණ අභියෝග රෑසක් මෙවර සීසර් හමුවේ දිගහැරෙන්නට නියමිතයි. වානර මොළ පරිමාව පරිණාමයේ යුග ගණනක් දුර ‍රැගෙන ගිය “සිමියන් වෛරසය” මිනිස් ගහණය දිවි‍රැකගන්නට තරම් වාසනාවක් ලද කොලනි කිහිපයකට සීමා කර දමලා. තැනින් තැන පිහිටි මේ කොලනිවලින් සීසර්’ගේ වර්ගයා හා සාමගතවීමේ ගිවිසුමකට ආරාධනා ලැබෙනවා. නමුත් එය යටි කූට්‍ටු මර උගුලක්!

එනිසාවෙන් සිය සෙනග ‍රැකගන්නටත්; -යළි තමන් අභිබවා හිරකරලන්නට කැසකන, ලෝකය තමන්ගේ පරම ඒකායන අයිතියක් කරගනිමින්, අලුත පහළ වූ නව ජීවී වර්ගයා මැඩලන්නට උගුල් අදින කෑදරකාර/ ආත්මාර්ථකාමී- මිනිසා සමග සටන් වදින්නටත් සීසර් හට සිදු වෙනවා. “මිනිසා විසින් විනාශයේ මරුකටටම ‍රැගන ගිය ලෝකය විකල්ප බුද්ධි ප්‍රජාවකගේ මගපෙන්වීම ඔස්සේ යළි පුබුදන්නට කාලයයි. යුධ සායමින් සැරසී දිවි කෙළවර තෙක් තමන්ගේ උරුමය ‍රැකගන්නට කාලයයි”

යුධ වර්ණයෙන් සැරසී, යුදයට පෙළ ගැසුණ 'සීසර්' බලකාය...
යුධ වර්ණයෙන් සැරසී, යුදයට පෙළ ගැසුණ ‘සීසර්’ බලකාය…

Toby Kebbel/ Terry Notary ‘වානරයන් ලෙසිනුත් ‘Gary Oldman/ Jason Clarke ‘මනුෂ්‍යයන් ලෙසිනුත්’ චරිත මවන මෙම චිත්‍රපටයේ තිරගත දිනය වෙනසකට ලක්ව තිබෙනවා. හදිසියේ මියගිය Paul Walker‘ගේ හිස්තැන පුරවන්නට ක්‍රමයක් සොයාගන්නා තෙක් F&F7 දින නියමයකින් තොරව කල් දැමීමට සිදුවීම නිසා, ඒ දිනයට මෙම චිත්‍රපටය එළිදක්වන්නටයි Universal Pictures සමාගමේ අවසන් තීරණය. ඒ අනුව කලින් නියමිතව තිබුණාට වඩා, මාසයක් පමණ කල්වේලා ඇතුව වානර සෙනඟ සිනමාහල් තුළට කඩාවදිනවා…

තිරයට එන දිනය: 2014 ජුලි 11

උදා (217 Posts)


6 thoughts on “සුපිරි චිත්‍රපටිවල ඉදිරි දිගහැරුම… (IV) | Dawn of the PoA නව යුගයක උදාව… [Update]

  • February 17, 2014 at 3:59 PM
    Permalink

    Niyama film ekak..Thanks bro

  • December 27, 2013 at 10:00 AM
    Permalink

    Thanks saho…

  • December 17, 2013 at 7:29 PM
    Permalink

    ‍නි‍ය‍ම‍යි ‍ස‍හෝ.

  • December 16, 2013 at 10:53 PM
    Permalink

    thanks Uda saho…

  • May 10, 2013 at 8:52 AM
    Permalink

    thanks saho post 1kt 5 ekt danna hode!!!

  • May 10, 2013 at 3:29 AM
    Permalink

    නියම ලිපි පෙළක් නේද මෙහෙම ගියොත් මේක…
    හොලිවුඩ් උදවිය චිත්‍රපට මාලා ගහෙන්නෙත් සුපිරිම ඒවායේ නොව…
    එහෙනම් දැනුවත් කලාට බොහොම ස්තුතියි…!

Leave a Reply

Your email address will not be published. Required fields are marked *