සුපිරි චිත්‍රපටිවල ඉදිරි දිගහැරුම… (VIII) | Godzilla අසමතුලිතයේ පළිගැනීම! [Update]

Godzilla – Reboot

Warner Bros. සහ Legendary Pictures සමාගම් මෙම චිත්‍රපටයේ නිෂ්පාදන කටයුතු ගැන සනාථ කොට තිබෙනවා. මෙය වැන්කුවර් දූපතෙහි නනයිමෝ නගරයෙහිදී නිෂ්පාදන කටයුතු ඇරඹීමට සැලසුම්කොට තිබෙනවා. Aaron-Taylor Johnson (Kick-Ass නළුවා)මෙහි ප්‍රධාන පිරිමි චරිතයෙන් එක්වන අතරතුරේ Elizabeth Olsen, Bryan Cranston, Juliette Binoche  සහ David Strathairn යන නළුනිළියන් සෙසු චරිත සඳහා දායකත්වය ලබා දෙනු ඇති බව සඳහන්. එයට අමතරව Ken Watanabe (The Last Samurai, Batman Begins, Inception) මේ සඳහා එක්වන්නට නියමිත බව සඳහන් වෙනවා.

Max Borenstein සහ Dave Callaham යන අය තිරරචනය කරනවා. මෙම ප්‍රතිනිර්මාණයේදී, යළිවරක් මහත් ව්‍යසනකාරී සිදුවීම් හේතුවෙන් හටගන්නා පළවිපාකයක් ලෙසින් බිහිවන විකෘති සත්ත්වයෙක් වෙත කතාව යොමු වෙනු ඇති. මෙවර මේ සිනමා පටයට අධ්‍යක්ෂණයෙන් එක්වන්නේ, ‘Monsters (2010)’ -(මෙහිත් දෙවැන්නක් එන්නට යන බව සැලයි. මේ අධ්‍යක්ෂකවරයා ඒ සදහා විධායක නිෂ්පාදනයෙන් දායක වන්නට යන බව තමයි පැවසෙන්නේ)- අධ්‍යක්ෂණය කරමින් අවධානය දිනාගත් Gareth Edwards කියන නවක අධ්‍යක්ෂකවරයා. ලාභ වුණත් උසස් තත්ත්වයේ දෘශ්‍ය ප්‍රයෝග යොදාගෙන කෙරුණු එම චිත්‍රපටයෙන් පසු ඔහුත් දැන් දැවැන්ත වැඩ භාරදෙන්නට තරම් හැකියාවක් ඇත්තෙකු බව සනාථ වෙලා. JP4 සඳහා අධ්‍යක්ෂණයෙන් එක්වන Collin Trevorrow වගේම මොහුත් මේ අභියෝගය ජයගනු ඇතැයි කියන එකයි හොලිවුඩ්පුරයේ කාගෙ කාගෙත් අදහස.

මෙවර ප්‍රතිනිර්මාණයෙන් පෙරදීට වඩා තාත්ත්වික සහ විශ්වසනීය අන්දමේ චිත්‍රපටයක් නිර්මාණය කරන්නට තමනට හැකිවනු ඇතැයි කියා ඔහු අදහස් පළකර තිබෙනවා. මොකද මෙය ඔහුගේ එක්තරා සිහිනයක් බවයි ඔහු පවසා තිබෙන්නේ. දැනටමත් මෙහි පෙර නිෂ්පාදන කටයුතු සහ සැලසුම් කටයුතු සිදුවෙමින් පවතිනවා. Frank Darabont අතින් කෙරෙන තිරපිටපත් සංශෝධන කටයුතු හමාර වූ විගසින් රූගත කිරීම් ඇරඹෙනු ඇති.

 

තිරයට එන දිනය: 2014 මැයි 16

 

නවමුව:- මුළු ලෝකයම විපරීත වී ගොසින්. අදූරදර්ශී පර්යේෂණ ප්‍රතිඵල වාතය දූෂණය කරද්දී, විෂකාරක රසායනයන් පස විනිවිද ඇදෙනවා. අකාබනික අපද්‍රව්‍යවල අවසන් ගිමන්හල වී ඇත්තේ මහා සාගර පත්ළයි. මෙවන් තත්ත්වයක් යටතේ පෘථිවි හරයේ ස්වභාවික රටාව විකෘත කරවන අසමතුලිත බලපෑම්ද ඇති වෙමින් තිබෙනවා. Godzilla නම් ජෛවවිකෘතයා එහි එක් ප්‍රතිඵලයක් පමණයි. එහෙත්, එහි අවසන් ප්‍රතිඵලය කෙබඳු’දැයි කිසිවෙකු දන්නේ නැහැ.

Godzilla චිත්‍රපටයේ අපායේ පිවිසුම දැක්වෙන රූපයක්
Godzilla චිත්‍රපටයේ අපායේ පිවිසුම දැක්වෙන රූපයක්

පරිසර විනාශයේ බලපෑමෙන්, පාරිසරක හැසිරීම් රටාව කණපිට හැරී ගොසින්. එහි බලපෑම මුළු ලොවටම ගෙන එන්නේ දරුණු අනතුරක්. කිසිවෙකුත් නොසිතන ආකාරයේ ජානවිකෘතීන් සිදුවීමටත්/ නොවූ විරූ ජීවී හැකියාවන් බිහිවීමටත් ඉන් ඇති කළ හැකි බලපෑම ගැන කියැවෙන තේමාවක් ‍රැගත් ගොඩ්සිලා මෙවර සිනමා තිරයට එන්නේ මිනිසාට ඒ ගැන සිහිකැඳවීමක් කරමින්ම අනතුරු හඟවා යන්නටයි.

Godzilla නවතම චිත්‍රපටයේ තේමාව වී ඇත්තේ පරිසර බලපෑම පෘථිවියේ හදවත ලෙඩ කරමින් පෘථිවි හරයට බලපෑම් කිරීම ගැනයි. විද්‍යාඥයන් වෙනිසියුලාවේ ඇති මහා ආගාධයන් දෙකක්වන Sima Humboldt සහ Sima Martel‘හි අගාධ බිත්ති ගැන පර්යේෂණ කරන්නේ මේ ගැන හොයාගන්නා අරමුණින්. ටර්ක්මේනියාවේ තිබෙන, ලෝදිය දැවෙන “අපායේ පිවිසුම”(Door to Hell) නමැති ආවාටයේ හැසිරීමෙන් පෙන්නුම් කරන්නේ පෙර කිසිදා නොවූ ආකාරයේ ව්‍යසනකාරී යමක් පෘථිවි හරය ගිලගනිමින් ඇති බවයි. මේ Godzilla’ගේ උප්පත්තිය සිදුවන තැන ද? එසේත් නොමැතිනම්, එකිනෙකට ඈඳුණු සිද්ධීන් දාමයක තවත් එකක් පමණක්ද? ලෝකයේ විශාලතම ගිලුම්වළෙන්(Sinkhole)හමුවන ජීවත්වන ශෛලකය(පොසිලය) කුමක් විය හැකිද? මේ සියල්ල ගැන පර්යේෂණ මෙහෙයවන – සම්බන්ධීකරණය කරන M.U.T.O. නමැති ගුප්ත සංවිධානයේ අරමුණ කුමක් විය හැකිද?

ජීවී පොසිලය හමුවන ස්ථානය දැක්වෙන රූපයක්
ජීවී පොසිලය හමුවන ස්ථානය දැක්වෙන රූපයක්

Aaron Taylor-Johnson/ Elizabeth Olsen ගේ ප්‍රධාන රංගනයෙන් සහ Bryan Cranston/ Ken Watanabe/ Sally Hawkins/ Juliette Binoche ගේ සහය රංගනයෙන් යුතු චිත්‍රපටයේ, තිරරචනය Max Borensteinගෙන්. කතා සංකල්පය Dave Callahan/ Frank Darabont යන දෙදෙනාගෙන්. ප්‍රධාන භූමිකාව නිරූපණය කරනා Godzilla නම් විකෘත-ජීවියා තිරය මත ජීවමාන කරන්නේ අධ්‍යක්ෂක Gareth Edwards‘ගේ මෙහෙයවීම සහිතව, Legendary Pictures නිෂ්පාදනයක් විදිහටයි.

දැන්නම් හොඳටම ළඟයි. මේ මාසෙත් ඉවරවේගෙන යන නිසා තව මාස 05යි කිව්වට කමක් නෑ නෙහ්? 😉 තිරය මත ගොඩ්සිලාගේ සංත්‍රාසය අත්විඳින්නට අපට හැකිවෙන දිනය පෙර කී පරිදිම 2014 මැයි 16 ‘ම තමයි…

උදා (217 Posts)


4 thoughts on “සුපිරි චිත්‍රපටිවල ඉදිරි දිගහැරුම… (VIII) | Godzilla අසමතුලිතයේ පළිගැනීම! [Update]

Leave a Reply

Your email address will not be published. Required fields are marked *