PIXAR සමාගමේ Toy Story 3 ලෝකෙන්ම පළවෙනිය ලු…

එකෝමත් එක කාලෙක එකමත් එක කට්ටියක් අලුත් වැඩක් පටන් ගත්තා. ඒ වෙද්දි ඒ වගේ වැඩක් ලෝකෙ කොහේවත්ම කෙරිල තිබ්බෙ නෑ. එයාල තමා මේ වැඩේට මුලපිරුවේ. ඒ කාලෙදි ඒ කට්ටිය තමා ඒ වෙනුවෙන් යොමු වුණු ළාබාලතම උදවිය වුණේ…

නැ… නෑ… මේ සුරංගනා කතාවක් කියන්ඩ හැදුව නෙමෙයි. මේක මේ ඇත්තම කතාවක්! හැබැයි මේක සුරංගනා කතාවකටත් වඩා බොහොම පුදුමාකාර වැඩ කරපු කට්ටියක් ගැන කතාවක්! ඒ කට්ටිය තමයි Pixar Studios. ලෝකෙ ප්‍රථම සජීවීකරණ සිනමා නිර්මාණ සමාගම. මේ ගොල්ලන් ලොවට දායාද කළ මුල්ම චිත්‍රපටය -එහෙමත් නැතිනම් ලෝකයේ බිහි වූ මුල්ම සජීවීකරණිත චිත්‍රපටය- වුණේ Toy Story. මේ කතාව ඒ මුල්ම නිර්මාණය ගැන නෙමෙයි. එයාගෙ බාලම සහෝදරයා ගැන. ඒ කියන්නෙ Toy Story 3!

මේ කතාව අපි දැනගෙන දැන් සෑහෙන දවසක් වෙනවා. ඒත් තමන් ආරම්භ කරපු; තමන්ම පිහි‍ටුවපු; සමාගමෙන් නෙරපා හැරීමෙන් පස්සෙ අත ගහපු හැමදේම ගඟට ඉණි කැපීමක් වේගෙන යද්දි තමන් විසින් මිලට ගනිපු එක්තරා සමාගමක් ගැන අචල විශ්වාසයෙන් යුතුව ඒ අයගේ අලුත් අදහස වෙනුවෙන් ඉවසීමෙන් ඉඩ සලසපු Steve Jobs නමැති ශ්‍රේෂ්ට මිනිසා ගැන තොරතුරු ඇතුළත් සිනෙ සිතුවම්පටක් පිරිනමන අද දවසේදීම මේ ගැනත් කියන එක හොඳයි කියලා හිතලායි අපි මේක ටිකක් පමා කළේ. ඔහු: නැතහොත් Steve Jobs නොහිටින්නට, අපට කිසිදාක Animation Films බලන්ඩ වෙන එකක්නම් නෑ. එනිසා සජීවීකරණ සිනමා නිර්මාණ ගැන සඳහන් කරද්දී Steve Jobs කියන්නේ අමරණීය නාමයක්. එනිසා ඔහුට ගරු කිරීමක් විදිහට අපි මේ ලිපිය අද දවසේදී පළ කරන්නට හිතුවා ඔහු ගැන කියැවෙන වාර්තාමය සලරුවක් සිංහල සමගින් ඔබට තිළිණ කරන්නට සැරසෙන මොහොතක.

අපි එහෙනම් දැන් බලමු මොකද්ද මේ කතාව කියලා…? හරි කතාව මෙහෙමයි! ලෝකයේ ඉහළතම ආදායම් වාර්තාවට හිමිකම් කියන සජීවීකරණිත සිනෙපටය බවට Toy Story 3 පත් වෙලා. Toy Story පටන් ගත්තේ 1995 දී නිකුත් වූ ලොව ප්‍රථම සජීවීකරණ සිනමා නිර්මාණය එළි දැකීමත් සමගයි. එවකට සිටි එකම සජීවීකරණ සිනමා නිර්මාණ සමාගම වුණේ Pixar Studios. එහෙම නොවී බැහැනේ, නේද? ඒ ගොල්ලොනේ මේ වැඩේ ආරම්භ කළ උදවිය. 😛

1986 දී තමන්ගෙම සමාගමෙන් නෙරපා දැමුණු Jobs විසින් LucasFilms නිෂ්පාදනායතනයේ පරිගණක චිත්‍රණ අංශය(Computer Graphics Division) මිලට ගන්නවා. Pixar යනුවෙන් නම් කෙරුණ මේ සමාගම නිරන්තරයෙන් අසාර්ථක වේගෙන යද්දී තමයි ඔවුනගේ පරිගණක චිත්‍රණ අංශය වෙනත් සමාගම්වලට තමන්ගේ නිෂ්පාදන විවිධාකාරයෙන් අලෙවි කරන්නට ගන්නේ. ඒ අතර Walt Disney සමාගම ප්‍රධානයි. පසුව මේ සමාගම මිලට ගන්නටත් ඔවුන් කටයුතු කළේ පසුකාලීනව අතිශය තීරණාත්මක සහ සුපිරි හැකියාවක් පෙන්නුම් කළ නිසාමයි. සඳහන් වෙන විදිහට Jobs මෙය විකුණා දමන්නට නොසිතුවාමත් නෙමෙයි. ඔහු මෙය තම පරම ප්‍රතිවාදියා වන Microsoft සමාගමට විකුණා දමන්නට පවා සිතූ බව සඳහන්. නමුත් Toy Story වෙනුවෙන් උණුසුම් ප්‍රතිචාර ලැබෙන බවට ඉඟි පළ වෙද්දී ඔහු එම අදහස වෙනස් කළා. කෙසේ වෙතත් එක පිට එක පාඩු ගෙනෙද්දීත්, ඇතැම් අය හැර යද්දීත්, එහි සියලු වියදම් තනිවම දරමින් ඔහු ඒ තැබූ විශ්වාසය නිවැරදි බව Toy Story චිත්‍රපටය සනාථ කර දැක්වූවේ, Jobs යළි වරක් විශිෂ්ට ආයෝජකයෙකු බව ලොවටම පසක් කරමින්. ඒ කතාවේ දිගුවක් ලෙස තවත් සජීවීකරණ සිනමා නිර්මාණ 2ක්ම ඉන් පසුව තිරයට ආවා. එහි තෙවැන්න තමයි අද වන විට ලොව වැඩිම ආදායම වාර්තා කරන සජීවිකරණ චිත්‍රපටය බවට පත් වන්නේ…

Toy Story වලින් ඇරඹූ ඇනිමේෂන් චාරිකාවෙහි මග දිගට මේ වනවිට සිනෙ සිතුවම් 13ක් ඔවුන් නිර්මාණය කර තිබෙනවා. ඒ සේරම බෙදා හැර තිබෙන්නේ Disney-Pixar ලේබලය යටතේයි. ඉන් 7ක් හොඳම සජීවිකරණිත සිනමා නිර්මාණය වෙනුවෙන් වූ ඔස්කා සම්මානය හිමිකරගැන්මට පවා සමත් වුණා. ඒ අතරින් Up/ Toy Story 3 යන දෙක හොඳම චිත්‍රපටය සඳහා මේ තාක් කලකට නාම යෝජනා ලද සජීවීකරණ චිත්‍රපට තුන අතර ට පවා ඇතුළත්. එමෙන්ම ‘Finding Nemo (2003)’ සහ ‘Toy Story (2010)’ යන චිත්‍රපට 2 ලොව ඉහළතම ආදායම් ලාභී චිත්‍රපට 50 ලැයිස්තුව තුළටත් අඩංගු වෙනවා. ඒ වගේම සමාගමේ සියලූම නිර්මාණයන් ලොව ඉහළතම ආදායම් ලාභී සජීවීකරණිත චිත්‍රපට 50 ලැයිස්තුවේ ‍රැ‍ඳෙනවා. ඒ අතරින් ලොව ඉහළතම ආදායම වාර්තා කරන්නේ Toy Story 3. ඒ එතෙක් ඒ තැන හිමිකරගෙන සිටි Shrek 2 අභිබවා යමින්.

Toy Story නිර්මාණ ත්‍රිත්වය තමයි Pixar‘ලගෙන් බිහි වූ එකම ත්‍රිත්ව චිත්‍රපටය. Cars තමයි මේ තාක් තිබුණු එකම ද්විත්ව චිත්‍රපටය. දැන්නම් ‘Monsters, Inc (2001)’ පෙරබැඳිය වන ‘Monsters University (2013)’ ත් ‘Finding Nemo (2003)’ අනුබැඳිය වන ‘Finding Dory (2015)’ සමගින් ද්විත්ව චිත්‍රපට ගණන 3 දක්වා ඉහළ යනු ඇති. 😉

එහෙමනම් දැන් බලමු මේ වාර්තාවේ විස්තරේ කොහොමද කියලා;

Toy Story 3 අනෙකුත් Pixar චිත්‍රපටවලට වඩා විශාල දියුණුවක් අලෙවි වාර්තාවන්හි සටහන් නොකළා වුවත්, Finding Nemo‘හි වාර්තාව $30m කින් අතික්‍රමණය කරන්නට එය සමත් වෙලා. මෙතෙක් Pixar උදවියගේ ඉහළතම ආදායම් වාර්තා උසුලන්නා වුණේ Finding Nemo (2003). Nemo පසුකරමින් එය මේ තත්ත්වයට ළඟා වී තිබෙන්නේ මාස දෙකකට අඩු කලකින් වීමයි විශේෂත්වය. දැනට වාර්තාගත වන පරිදි Pixar Studios‘හි පමණක් නොවෙයි සියලූම සජීවීකරණ සිනෙ නිපැයුම් සමාගම්හි නිර්මාණ අතරිනුත් $1b කඩඉම ඉක්මවූ එකම චිත්‍රපටය වන්නේ ද Toy Story 3 පමණමයි.

Pixar සමාගමේ ආදායම් සටහන මෙහෙමයි:

  1. Toy Story 3 (2010) – $1, 063 m [worldwide]
  2. Finding Nemo (2003) – $921 m [worldwide]
  3. Up (2009) – $731 m [worldwide]
  4. The Incredibles (2004) – $631 m [worldwide]
  5. Ratatouille (2007) – $623 m [worldwide]
  6. Monsters, Inc. (2001) – $562 m [worldwide]
  7. WALL-E (2008) – $521 m [worldwide]
  8. Toy Story 2 (1999) – $485 m [worldwide]
  9. Cars (2006) – $461 m [worldwide]
  10. A Bug’s Life (1998) – $363 m [worldwide]
  11. Toy Story (1995) – $361 m [worldwide]

Toy Story 3 මෙතරම් කෙටි කාලයකින් මෙතරම් දුරක් එන්නට හේතු වූ කරුණු මේවාලු,

1. මේක අනුබැඳියක් නොවෙයි, අනුබැඳියකට හැදූ අනුබැඳියක්. ඒ කියන්නේ මෙය තෙවන නිර්මාණය. එනිසා කලින් ආ චිත්‍රපට දෙකක්ම තිබෙනවා මේ කෙරෙහි අවධානය දිනා දෙන. එමෙන්ම දැනටමත් රසිකයන් චරිත හඳුනනවා විතරක් නෙමෙයි බොහොම ප්‍රියමනාපයකුත් දක්වනවා. එනිසා ඉන් ලැබෙන ආභාෂය ලොකු හයියක්.

2. ඒ වුණත් මේ චිත්‍රපටය 3D තාක්ෂණයෙන් ප්‍රදර්ශනය කෙරුණු Pixar නිර්මාණ දෙකෙන් එකක්. ඒ කියන්නේ ප්‍රවේශපත් මිල ඉහළ යාමෙන් එකතු වන අගයෙහි සමස්තය මෙහි ආදායම ඉහළ නැංවීමට සෘජුවම බලපානවා. මින් පෙර 3D තාක්ෂණයෙන් ප්‍රදර්ශනය වූ එකම Pixar චිත්‍රපටය වුණේ Up (2011) පමණයි.

ඒ වගේම Toy Story 3 නිතැතින්ම අපූර්ව චිත්‍රපටයක්. නමුත් Pixar‘ලට එය කිසිසේත්ම නුහුරු දෙයක් නොවෙයි. ඒ එදා සිට අද දක්වාම Pixar පිරිවර මෙවන් නිර්මාණකරණයේ කිරුළු පළන් රජුන් වන නිසා. එය ඔවුන්ගෙන් වරක් උදුරාගන්නට Dreamworks Animations‘හි Shrek 2 සමත් වුවත්, යළි වරක් කිරුළේ හිමිකාරත්වය Pixar වෙනුවෙන් හිමිකර දෙන්නට Toy Story 3 සමත්ව තිබෙනවා පමණක් නොවෙයි, අනිකුත් නිර්මාණකරුවන් හට අසීරු ඉලක්කයක් ලබාදීමටත් එය සමත්ව තිබෙනවා. එමෙන්ම යළි වරක් ත්‍රිමාණ තාක්ෂණයෙක් තිරයට ආ Finding Nemo දැන් ඉහළතම ආදායම් ලාභී සජීවීකරණිත ලැයිස්තුවේ තෙවන තැනට පත් වෙන්නට වරම් ලබා ගෙන තිබෙද්දී, එම ලැයිස්තුවේ ප්‍රථම ස්ථාන තුනම හිමි කරගන්නට Pixar Studios‘හි මව් සමාගම වන Walt Disney Pictures සමත්ව තිබෙනවා. ඉන් දෙකක්ම Pixar නිර්මාණයන් වීම Steve jobs හට කරන උපහාරයක් වාගෙයි. කොහොම වුවත්; ඉදිරියේදී කටයුතු කෙලෙසක විසඳුණත් සජීවීකරණ සිනමා කලාව ලොවට බිහිවන්නේ Jobs ගේ මහන්සියක, ආයෝජනයක ප්‍රථිපලයක් වශයෙන් බව ලොවට කිසි දා අමතක නොවේවි. 🙂

උදා (217 Posts)


3 thoughts on “PIXAR සමාගමේ Toy Story 3 ලෝකෙන්ම පළවෙනිය ලු…

Leave a Reply

Your email address will not be published. Required fields are marked *