බයිස්කෝප් සිංහලෙන් අපේ පිරිස මේතාක් කලක් සිය කැමැත්තෙන් බොහොම සන්සුන් ගමනක් ආව බව ඔබට මතක ඇති. මේ කටයුත්ත පටන් ගනිද්දි විවිධාකාරයේ චිත්‍රපට එහෙමත් නැත්නම් චලන චිත්‍ර ගැන ලිපි සමගින් ඒවා බාගත කර ගන්නට මග පෙන්වීමක් පමණයි සිදු කළේ. පසුව සිංහල උපසි‍රැසි නිකුත් කිරීම කෙමෙන් වර්ධනය වෙලා මේ වෙනකොට එහි ඉහළතම තැනකට ඇවිදිල්ලා ඉන්නවා. ඔබට මතක ඇති ලිපි 1000ක් සම්පූර්ණ වෙනදා අපි ආරම්භ කරපු අලුත් වැඩේ. එදා තමයි අපි ලෝකයේ හොඳම චිත්‍රපට යැයි පිළිගැනෙන ඒවා ඔබ වෙත සිංහල සමගින් සමීප කරවන්නට එක් වැදගත් පියවරක් තිබ්බේ. නමුත් අපේ බලාපොරොත්තුව වුණේ එයින් සෑහීමට පත් වෙන එක නොවෙයි.

 බයිස්කෝප් විබපළ අරඹලා දෙවර්ෂ පූර්ණය වෙනුවෙන් කිසියම් වෙනසක් අඩවියට එක්කළ යුතුයි කියලා එක්තරා අදහසක් යෝජනා වුණා. නමුත් අවාසනාවකට අධික කාර්යබහුලකම නිසා එය කල්දමන්නට සිද්ධ වුණා. ඉන්පස්සෙ අපි හිතුවේ ලිපි 1000ක් දෙන දවසට මේ කටයුත්තත් දියත් කළ යුතුයි කියන එකයි. එවර අපි වැඩේ පටන් ගත්තා කලින් හිතුවාටත් වඩා පියවරක් ඉස්සරහට ගිහින්. ලිපි 1000 වන විට එම කටයුත්ත සම්පූර්ණ කරගන්නට බැරි වුණත් මෙවර එය අතපසු වන්නට ඉඩ නොහැරීමට අපි තීරණය කළා. ඒ අනුව ඔන්න අද අපි බයිස්කෝප් සිංහලෙන් අඩවිය හා බැඳුණු උප අඩවියක් ලෙස මේ බයිස්කෝප් මංසල අඩවියේ වැඩ පටන් ගන්නවා. අපි ගැන අමුතුවෙන් කියන්ඩ දෙයක් නෑ. පරණ පුරුදු අයමයි. වැඩේ විතරයි වෙනස්.

 මේ අඩවියෙන් අපි බලාපොරොත්තු වෙන්නේ කාලීන සිනමා පුවත් හා සම්බන්ධ තතු විත්ති ඔබ වෙත ‍රැගෙන එන්නයි. ඒ අතරට විදෙස් සිනමාව ගැන වගේම, අපේ රටේ සිනමාව ගැනත් විස්තර හැකි අයුරින් ගෙන එන්නට අපි බලාපොරොත්තු වෙනවා. ඒ විතරක් නෙමෙයි, නවතම රූපවාහිනී වැඩසටහන් ගැන තොරතුරු සහ සිනමාව ගැන ලිපි පෙළකුත් ඒ අතරට අඩංගු කරන්නයි අපේ බලාපොරොත්තුව. එහෙමනම් බයිස්කෝප් සිංහලෙන් අඩවිය හා සබැඳි ඔබ අපේ මේ නවතම කටයුත්තටත් ඒ ලෙසින්ම සහාය පළ කරාවි කියලා අපි හිතනවා.